28 nō Fepuare–6 nō Māti

Genese 28–33

« E riro tei ’ō nei Iehova »

’A tai’o ai ’outou i te Genese 28–33, ’a feruri i te mea tā ’outou e ha’api’i mai nā roto mai i te mau hi’ora’a o Iakoba ’e tōna ’utuāfare. Pāpa’i i te mau mana’o tā ’outou e fāri’i.

Pāpa’i i tō ’outou mau mana’o

Tē fa’ati’a nei te pene 28 ’e te 32 o te Genese e piti ’itera’a pae vārua tei fāri’ihia e te peropheta Iakoba. ’Ua tupu teie nā ’itera’a e piti i roto i te medebara, terā rā e mea ta’a ’ē roa te huru tupura’a o te tahi ’e te tahi. I roto i te ’itera’a mātāmua, tē rātere ra ’o Iakoba i te fenua ’āi’a o tōna metua vahine nō te ’imi i te hō’ē vahine, ’e i roto i tōna tere, ’ua ta’oto ’oia i te hō’ē pō i ni’a i te hō’ē turu’a ’ōfa’i. ’Aita paha ’oia i mana’o ē, e ’ite ’oia i te Fatu i roto i taua huru vāhi ano ra, terā rā, ’ua fa’a’ite mai te Atua iāna iho ia Iakoba i roto i te hō’ē moemoeā tei taui i tōna orara’a, ’e nā ’ō a’era Iakoba ē, « e riro tei ’ō nei lehova, ’e ’aore ho’i au i ’ite » (Genese 28:16). E rave rahi matahiti i muri mai, tei roto fa’ahou ’o Iakoba i te medebara. Te reira taime, tē ho’i ra ’oia i Canaana, e fa’aruru i te hō’ē fārereira’a pohe e tōna taea’e riri ’o Esau. Terā rā, ’ua ’ite ’o Iakoba ē, ’ia hina’aro ’oia i te hō’ē ha’amaita’ira’a, e nehenehe tāna e ’imi i te Fatu, noa atu i roto i te medebara (hi’o Genese 32).

E nehenehe ato’a ’outou e ti’a i roto i tō ’outou medebara i te ’imira’a i te hō’ē ha’amaita’ira’a nō ’ō mai i te Atua ra. Penei a’e tō ’outou medebara o hō’ē ïa auta’atira’a ’utuāfare fifi, mai tō Iakoba. Penei a’e tē feruri nei ’outou ē, tei te ātea ’outou i te Atua, ’aore rā tē hina’aro nei ’outou i te hō’ē ha’amaita’ira’a. I te tahi taime e tae mai te ha’amaita’ira’a ma te mana’o-’ore-hia ; i te tahi atu taime, e tae mai te reira i muri a’e i te ’arora’a. Noa atu te huru o tō ’outou mau hina’aro, e ’ite ’outou ē, i roto i tō ’outou iho medebara, « tei ’ō nei Iehova ».

Mau mana’o nō te tuatāpapara’a pāpa’ira’a mo’a a te ta’ata hō’ē

Genese 28 ; 29:1–18

’Ua fafauhia mai iā’u te mau ha’amaita’ira’a a Aberahama i roto i te hiero.

’A haere ai ’oia i Harana nō te ’imi i te hō’ē vahine, ’ua moemoeā ’o Iakoba i te hō’ē ’ē’a tā’uma mai te fenua e tae atu i te ra’i ra, ’e tē ti’a ra te Atua i ni’a a’e i te reira. I roto i te moemoeā, ’ua fa’a’āpī te Atua ’e ’o Iakoba i te mau fafaura’a tāna i rave ’e ’o Aberahama ’e ’o Isaaka (hi’o Genese 28:10–17 ; hi’o ato’a Genese 12:2–3 ; 26:1–4). ’Ua fa’a’ite mai te peresideni Marion G. Romney i teie mana’o nō ni’a e aha te fa’ahōho’ara’a o te ’ē’a : « ’Ua ’ite a’era ’o Iakoba ē, te mau fafaura’a tāna i rave ’e te Fatu, tē vai ra te mau ta’ahira’a i ni’a i te ’ē’a tei tītauhia iāna iho ’ia tā’uma nō te fāri’i i te mau ha’amaita’ira’a i fafauhia mai—e mau ha’amaita’ira’a e ti’a ai iāna ’ia tomo i roto i te ao ra ’e ’ia ’āpiti atu i te Fatu ra… E riro te hiero nō tātou mai ia Betela i riro nō Iakoba » (« Temples—The Gates to Heaven », Ensign, Māti 1971, 16).

E aha te tahi atu mau ta’o ’e mau pereota i roto i te Genese 28:10–22 e hōro’a mai nei ia ’oe i te hō’ē tū’atira’a i rotopū i te ’itera’a o Iakoba ’e te mau ha’amaita’ira’a o te hiero ? ’Ia tai’o ’oe i teie mau ’īrava, ’a feruri i te mau fafaura’a tā ’oe i rave ; e aha te mau mana’o e tae mai i roto ia ’oe ?

’A tai’o ai ’oe i te Genese 29:1–18, ’a feruri nāhea te fa’aipoipora’a o Iakoba ia Rahera i riro ai ’ei mea faufa’a nō te fafaura’a tā te Atua i fa’a’āpī ’e ’o Iakoba i Betela (« fare o te Atua » ; hi’o Genese 28:10–19). ’A tāpe’a i teie ’itera’a i roto i te ferurira’a ’a tāmau noa ai ’oe i te tai’o nō ni’a i te orara’a o Iakoba i roto i te Genese 29–33. Nāhea te fare o te Fatu i te ha’afātatara’a ia ’oe i pīha’i iho i te Atua ?

Hi’o ato’a Yoon Hwan Choi, « ’Eiaha e hi’o nā te tahi atu vāhi, ’a hi’o i ni’a ! » Liahona, Me 2017, 90–92.

Genese 29:31–35 ; 30:1–24

E ha’amana’o te Fatu iā’u i roto i tō’u mau tāmatara’a.

Noa atu ē, ’ua ora ’o Rahera ’e ’o Lea i te hō’ē ’anotau ’e i roto i te hō’ē hīro’a tumu ta’a ’ē i tō tātou, e nehenehe tātou pā’āto’a e māramarama i te tahi o tō rāua mau mana’o. ’A tai’o ai ’oe i te Genese 29:31–35 ’e te 30:1–24, ’a ’imi mai i te mau ta’o ’e te mau pereota e fa’ata’a nei i te aroha o te Atua ia Rahera ’e ia Lea. ’A feruri e mea nāhea tō te Atua « hi’ora’a mai i [tō ’oe] nei ’ati » ’e « ’ua ha’amana’o » ia ’oe (Genese 29:32 ; 30:22).

E mea faufa’a ato’a ’ia ha’amana’o ē, noa atu tē fa’aro’o mai nei te Atua ia tātou, i roto i tōna pa’ari e’ita ’oia e hōro’a mau mai i te mau taime ato’a te mea tā tātou i ani. ’A feruri e tuatāpapa i te parau poro’i a Elder Brook P. Hales « Te mau pāhonora’a i te pure » (Liahona, Mē 2019, 11–14) nō te ha’api’i mai i te mau rāve’a rau ’ia pāhono mai te Metua i te ao ra ia tātou.

Nō te ’ite hau atu nō ni’a i te hīro’a tumu o teie ’ā’amu, hi’o Buka ha’api’ira’a a te piahi o te Faufa’a Tahito : Genese–2 Samuela (2003), 86–88.

Fa’ahōho’ara’a nō Iakoba ’e ’o Esau e tauahi ra, nā Robert T. Barrett

Genese 32–33

E nehenehe te Fa’aora e tauturu ia tātou ’ia upo’oti’a i ni’a i te ’āmahamaha i roto i tō tātou ’utuāfare.

’A ho’i ai Iakoba i Canaana, « mata’u roa a’era Iakoba ’e te ahoaho » nō ni’a e nāhea Esau ’ia fāri’i mai iāna (Genese 32:7). ’A tai’o ai ’oe i te Genese 32–33 nō ni’a i te fārereira’a ’o Iakoba ia Esau ’e tōna mau mana’o nō ni’a i te reira, e nehenehe ’oe e feruri i te mau auta’atira’a o tō ’oe iho ’utuāfare—penei a’e terā mau aura’a ’utuāfare e ti’a ’ia fa’aorahia. Penei a’e e nehenehe teie ’ā’amu e fa’auru ia ’oe ’ia toro i te rima i te tahi ta’ata. E nehenehe te mau uira’a mai teie e tauturu i tā ’oe tai’ora’a :

• Nāhea tō Iakoba fa’aineinera’a nō te fārerei ia Esau ?

• E aha tei ha’aputapū rahi a’e ia ’oe i roto i te pure a Iakoba ’o tē ’itehia i roto i te Genese 32:9–12 ?

• E aha tā ’oe i ha’api’i mai nō ni’a i te fa’a’orera’a hara nā roto mai i te hi’ora’a o Esau ?

• Nāhea te Fa’aora e nehenehe ai e tauturu ia tātou ’ia fa’aora i te mau auta’atira’a ’utuāfare ?

Hi’o ato’a Luka 15:11–32 ; Jeffrey R. Holland, « Te ’ohipa nō te fa’atupura’a hau », Liahona, Novema 2018, 77–79.

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Genese 28–33.’A fa’a’ohipa i te « Iakoba ’e tōna ’utuāfare » (i roto i Te mau ’ā’amu o te Faufa’a Tahito) nō te tauturu i te mau tamari’i ’ia māramarama i te mau ’ohipa tei tupu, nō roto mai i teie mau pene. Penei a’e e nehenehe te mau melo o te ’utuāfare e fa’aea ri’i i ni’a i te hōho’a tāta’itahi ’e ’ia ’ite mai e aha tē ha’api’ihia ra, mai te faufa’a rahi o te fa’aipoipora’a, te mau fafaura’a, te ’ohipa, ’e te fa’a’orera’a hara.

Genese 28:10–22.E nehenehe ’outou e fa’a’ohipa i te hō’ē ’ē’a tā’uma (’aore rā hō’ē hōho’a) nō te paraparau e mea nāhea tā tātou mau fafaura’a e au ai mai te hō’ē ’ē’a tā’uma. E aha te mau fafaura’a tā tātou i rave, ’e e nāhea te reira i te ha’afātata atu ia tātou i te Atua ? Penei a’e e au te mau melo o te ’utuāfare ’ia pāpa’i hōho’a i te moemoeā o Iakoba, tei fa’ata’ahia i roto i te Genese 28:10–22.

’Ua fa’auruhia te hīmene ra « ’Ei pīha’i iho vau i tō’u Fatu » (Te mau Hīmene, no. 51) nō te moemoeā o Iakoba. E nehenehe tō ’outou ’utuāfare e hīmene i teie hīmene ’e ’ia paraparau i tā te ’īrava tāta’itahi e ha’api’i nei.

Genese 32:24–32.Tē vai ra paha i roto i tō ’outou ’utuāfare te mau melo e mea au nā rātou te ha’uti taputō. Nō te aha « te taputō » i riro ai ’ei rāve’a maita’i nō te fa’ata’a i te ’imira’a i te mau ha’amaita’ira’a a te Fatu ? E aha tā Enosa 1:1–5 ; Alama 8:9–10 e parau mai nei nō ni’a i te aura’a « te tōra’a i te Atua » ?

Genese 33 :1–12.I muri a’e e rave rahi matahiti i te fāri’ira’a i te mau mana’o teimaha, ’ua hō’ē fa’ahou ’o Iakoba ’e ’o Esau. ’A hani e nehenehe tā Iakoba ’e tā Esau e paraparau mai ia tātou i teie mahana, e aha tā rāua e parau mai nō te tauturu ia tātou i te taime e tupu ai te mārōra’a i roto i tō tātou ’utuāfare ?

Nō te mau mana’o hau atu nō te ha’api’ira’a i te mau tamari’i, hi’o te arata’i nō teie hepetoma i roto i te Mai, pe’e mai—nō te Paraimere

Hīmene i mana’ohia : « E te tamari’i here ē », Te mau Hīmene, nō. 48.

Ha’amaita’i i tā ’oe iho tuatāpapara’a pāpa’ira’a mo’a

’Imi ia Iesu Mesia. Tē fa’a’ite pāpū mai nei te Faufa’a Tahito nō Iesu Mesia nā roto i tōna mau ’ā’amu ’e te mau taipe. ’A feruri e tāpa’o ’aore rā e fa’a’ū i te mau ’īrava e fa’atoro ra i ni’a i te Fa’aora ’e e aura’a faufa’a roa nō ’oe.

Te moemoeā o Iakoba i Betela, nā J. Ken Spencer