« 7–13 nō Māti. Genese 37–41 : ’E tei ia Iosepha ra Iehova’ », Mai, pe’e mai—nō te Paraimere : Faufa’a Tahito 2022 (2021)
« 7–13 nō Māti. Genese 37–41 », Mai, pe’e mai—nō te Paraimere : 2022
Fa’ahōho’ara’a ’o Iosepha nō Aiphiti i roto i te fare tāpe’ara’a, nā Jeff Ward
7–13 nō Māti
Genese 37–41
« E tei ia Iosepha ra Iehova »
E aha te mau parau mau nō roto mai i te Genese 37–41 e ti’a i te mau tamari’i i roto i tā ’oe piha ’ia māramarama maita’i a’e ? E ara maita’i i te mau muhumuhu e tae mai ia ’oe ’a fa’aineine ai ’oe nō te ha’api’i.
Pāpa’i i te mau mana’o e tae mai
Tītau i te mana’o
E hōro’a i te mau tamari’i i te tahi minuti nō te pāpa’i hōho’a i te hō’ē mea tā rātou i ha’api’i mai nō ni’a i te ’evanelia i te fare ’aore rā i te fare purera’a. E ani i te mau tamari’i ia fa’a’ite mai ’e ’ia parau mai nō ni’a i tā rātou mau hōho’a pāpa’i.
Ha’api’i i te ha’api’ira’a tumu : Te mau tamari’i ’āpī a’e
E nehenehe au e fa’a’ite i te maita’i i tō’u ’utuāfare.
’Ua pohehae te mau taea’e o Iosepha iāna ’e ’ua rave ’ino rātou iāna. Nāhea e ti’a ai ia ’oe ’ia tauturu i te mau tamari’i ’ia māramarama i te faufa’a rahi nō te fa’a’itera’a i te maita’i i ni’a ia vetahi ’ē, i te mau melo iho ā rā o te ’utuāfare ?
Mau ’ohipara’a e nehenehe e rave
-
Nō te fa’ati’a i te ’ā’amu o Iosepha ’e tōna mau taea’e i roto i te Genese 37, e nehenehe ’oe e fa’a’ohipa i te mau hōho’a i roto i te Mai, pe’e mai—nō te ta’ata hō’ē ’e te ’utuāfare ’aore rā, « Iosepha nō Aiphiti » (i roto Te mau ’ā’amu o te Faufa’a Tahito). Vaiiho i te mau tamari’i ’ia tauturu mai nā roto i te fa’a’itera’a mai i te mau ha’apāpūra’a tā rātou i ’ite nō ni’a i te ’ā’amu. E ui ia rātou i te mau uira’a mai teie, « Mea nāhea tō te mau taea’e o Iosepha rave-’ino-ra’a iāna ? » Tauturu i te mau tamari’i ’ia feruri i te mau ’ohipa tā te mau taea’e e ti’a ’ia rave nō te fa’a’ite i tō rātou here ia Iosepha. E aha te ti’a ia tātou ’ia rave ’ia riri ana’e tātou i te mau melo o tō tātou ’utuāfare ?
-
E fa’a’ite i te hō’ē hōho’a o te hō’ē ’utuāfare (hi’o Buka hōho’a o te ’evanelia, n° 112), ’aore rā, e ani i te mau tamari’i ’ia pāpa’i hōho’a i tō rātou ’utuāfare. E ani ia rātou ’ia fa’a’ite mai i te mau rāve’a e ti’a ia rātou ’ia fa’a’ite i te maita’i i te mau melo o tō rātou ’utuāfare.
-
E hīmene ’āmui i te hō’ē hīmene nō ni’a i te herera’a i tō tātou ’utuāfare, mai te « Un heureux famille » (Chants pour les enfants, 104). E aha tā tātou e rave nō te tauturu i tō tātou ’utuāfare ’ia ’oa’oa ?
-
Vaiiho i te mau tamari’i ’ia fa’a’ū i te ’api ’ohipara’a nō teie hepetoma ’e, i roto i te vahi i fa’ata’ahia, e pāpa’i hōho’a i te mau melo o te ’utuāfare e fa’a’ite ra i te maita’i.
E nehenehe te Atua e tauturu iā’u, ’ia tupu ana’e mai te mau ’ohipa ’ino.
E rave rahi mau ’ohipa ’ino i tupu i ni’a ia Iosepha, ’ua mā’iti rā ’oia ’ia ha’apa’o i te mau fa’auera’a, ’e tei iāna ra Iehova. Nā roto i teie ’ohipa, e nehenehe te mau tamari’i e ha’api’i mai ē, ’ua hina’aro te Atua e tauturu ia rātou i te mau taime fifi o tō rātou orara’a.
Mau ’ohipara’a e nehenehe e rave
-
E fa’ata’a i te tahi o te mau ’ohipa fifi tei tupu i ni’a ia Iosepha (hi’o Genese 37:23–28 ; 39:20 ; ’aore rā, « Iosepha ’e tōna mau moemoeā » ’e « Iosepha nō Aiphiti », i roto i Te mau ’ā’amu o te Faufa’a Tahito). I muri a’e i tō ’oe paraura’a i te mau tamari’i nō ni’a i te fifi tāta’itahi tei fa’aruruhia e Iosepha, e ani ia rātou ’ia fa’ahiti mai te parau, « E tei ia Iosepha ra Iehova » (Genese 39:2).
-
E fa’a’ite i te mau hōho’a o te Fa’aora e tauturu ra i te mau ta’ata ’o tē fa’aruru nei i te mau tāmatara’a (hi’o Buka hōho’a o te ’evanelia, n° 40–43). E ani i te mau tamari’i ’ia fa’a’ite mai e mea nāhea tō te Fa’aora tauturura’a i te mau ta’ata. E fa’a’ite atu i tō ’oe ’itera’a pāpū ē, e nehenehe te Fatu e tauturu mai ia tātou ’ia tupu ana’e te mau mea ti’a ’ore i ni’a ia tātou.
-
E hīmene i te hō’ē hīmene nō ni’a i te ’atu’atura’a here a te Fa’aora ia tātou, mai te « Jésus est notre ami » (Chants pour les enfants, 37). ’A fa’a’ite i te hō’ē ’ohipa i tupu ’a ’ite ai ’oe i te here o te Atua i te hō’ē taime fifi roa. E fa’a’ite i te hō’ē hōho’a nō Iesu, ’e e ani i te mau tamari’i ’ia fa’a’ite mai e aha tā rātou e fāri’i ra nō ni’a iāna.
E nehenehe te Atua e fa’aara mai iā’u i te ’ati.
’Ua tauturu te Atua ia Iosepha ’ia māramarama ē, ’ua riro te mau moemoeā o Phara’o ’ei fa’aarara’a nō te fa’aineine nō te mau tau fifi i muri nei. E tauturu i te mau tamari’i ’ia māramarama ē, e nehenehe te Atua e fa’aara ia rātou i te ’ati, tae noa atu i te ’ati pae vārua.
Iosepha e tātara ra i te mau moemoeā o te ta’ata fa’atere fare ’e o te ta’ata tunu faraoa, nā François Gerard
Mau ’ohipara’a e nehenehe e rave
-
’A ha’apurara i te mau hōho’a mā’a nā roto i te piha, ’e e ani i te mau tamari’i ’ia ha’aputuputu mai ’e ’ia « tu’u » i te reira i roto i te hō’ē fa’ari’i. E fa’a’ohipa i teie ’ohipara’a nō te parau i te mau tamari’i e mea nāhea tō te Atua fa’aarara’a ia Phara’o ’ia fa’aineine nō te hō’ē tau ’aita e mā’a fa’ahou (hi’o Genese 41:15–36, 47–57). Vaiiho i te mau tamari’i ’ia pāpa’i hōho’a i te mau mea tā Phara’o i moemoeā, ’e i muri iho, e fa’a’ohipa i tā rātou mau hōho’a nō te ha’api’i i tō rātou ’utuāfare i te fare.
-
E fa’a’ite i te hō’ē hōho’a o te peropheta nō teie mahana. E parau i te mau tamari’i nō ni’a i te mau ha’api’ira’a ’aore rā i te mau fa’aarara’a tā te Atua i hōro’a mai ia tātou nā roto iāna. E fa’ata’a atu ē, e ha’amaita’ihia tātou ’e e pāruruhia mai te mea e pe’e tātou i te peropheta. E ani i te mau tamari’i ’ia ha’uti mai i te mau mea tā rātou e nehenehe e rave nō te pe’e i te a’ora’a a te peropheta.
Ha’api’i i te ha’api’ira’a tumu : Te mau tamari’i pa’ari
Mai te mea e vai ha’apa’o noa vau, e tauturu mai te Atua iā’u i roto i te mau taime fifi.
Noa atu ē, ’ua fārerei ’o Iosepha e rave rahi mau tāmatara’a fifi, ’ua vai ha’apa’o maita’i noa ’oia ’e « tei iāna ra Iehova » (Genese 39:3). E nehenehe te mau ’ohipa tei tupu i ni’a iāna e tauturu i te mau tamari’i ’ia ti’aturi ē, e tauturu te Atua ia rātou i roto i te mau tāmatara’a.
Mau ’ohipara’a e nehenehe e rave
-
E ani i te mau tamarii ’ia imi mai i te mau ta’o ’aore rā, i te mau pereota i roto i te Genese 39:1–3, 20–23 ; 41:38 ’o tē fa’a’ite mai ē, tei ia Iosepha ra te Atua i roto i tōna mau taime fifi. Mai te mea e nehenehe, e ani i te mau tamari’i e hāmani i te hō’ē ’apa na’ina’i e fa’a’ite ra i te hō’ē o te mau pereota tei ’itehia mai ia rātou. E fa’aitoito ia rātou ’ia hōpoi i tā rātou ’apa i te fare nō te fa’aha’amana’o ia rātou ē, e vai mai te Fatu i pīha’i iho ia rātou i roto i tō rātou mau fifi.
-
E ani i te mau tamari’i ’ia fa’a’ite mai i tō rātou mana’o nō ni’a i te aura’a o te parau ra « tei ia Iosepha ra Iehova » (Genese 39:2). E ani ia rātou ’ia fa’a’ite mai i te mau ’itera’a i te taime ’a ’ite ai rātou ē, tei pīha’i iho te Fatu ia rātou ’aore rā i tō rātou ’utuāfare i roto i te mau taime fifi. ’A fa’a’ite i te mau ’itera’a mai te reira nō roto mai i tō ’oe orara’a.
E nehenehe au e ’oa’oa ’ia tupu ana’e te mau mea maita’i nō vetahi ’ē.
Nā te pohehae i arata’i i te mau taea’e o Iosepha ’ia rave i te mau mā’itira’a ri’ari’a. ’Ua ha’amauiui tā rātou mau mā’itira’a ia Iosepha ’e ’ua fa’atupu i te ’oto i roto i te māfatu o tō rātou metua tāne. E nehenehe teie ’ā’amu e tauturu i te mau tamari’i ’ia mā’iti ’ia ’oa’oa ’ia ha’amaita’i ana’e te Fatu ia vetahi ’ē.
Mau ’ohipara’a e nehenehe e rave
-
E ani i te mau tamari’i ’ia hi’o fa’ahou Genese 37:3–11 ’e ’ia pāpa’i hōho’a i te pereue o Iosepha ’e tōna nā moemoeā e piti. E aha tā te mau taea’e o Iosepha i fāri’i nō ni’a ia Iosepha ? E aha te ’ohipa ta’a ’ē tei ti’a ia rātou ’ia rave ? E ’āparau nō te aha e mea faufa’a roa ’ia fa’a’ite i te ’oa’oa ’ia tupu ana’e te mau ’ohipa maita’i nō te tahi atu mau ta’ata.
-
E ani i te mau tamari’i ’ia fa’a’ite mai i te tahi mau huru tupura’a i reira te hō’ē ta’ata e fa’atupu ai i te mana’o pohehae nō te tahi atu ta’ata. E hīmene ’āmui i te hō’ē hīmene nō ni’a i te fa’a’itera’a i te here ia vetahi ’ē, mai te « Aimez vos frères » (Chants pour les enfants, 74). E ha’apāpū ē, e nehenehe te Metua i te Ao ra e tauturu ia tātou ’ia mono i te mau mana’o pohehae i te mau mana’o nō te here.
Nā roto i te tauturu a te Fatu, e nehenehe au e horo ’ē i te fa’ahemara’a.
’A fa’aruru ai te mau tamari’i tā ’oe e ha’api’ira’a i te mau fa’ahemara’a i te roara’a o tō rātou orara’a, e nehenehe te pūai e roa’a ia rātou nā roto mai i te hi’ora’a a Iosepha i te horo-’ē-ra’a i te fa’ahemara’a.
Mau ’ohipara’a e nehenehe e rave
-
E fa’a’ite i te hō’ē hōho’a nō Iosepha ’e te vahine a Potiphara (hi’o Buka hōho’a o te ’evanelia, n° 11), ’e ’a fa’a’ite i te ’ā’amu i roto i te Genese 39:7–12. E mea nāhea tō Iosepha pāto’ira’a i te fa’ahemara’a ? Tauturu i te mau tamari’i ’ia ’imi mai i te mau ta’o i roto i te Genese 39:7–12 ’o tē pāhono i teie uira’a—’ei hi’ora’a, ’ua ’ite ’o Iosepha ē, te fa’aeara’a i pīha’i iho i te vāhine a Potiphara, e riro ïa ’ei « hara i te Atua » (’īrava 9).
-
E ani i te mau tamari’i ’ia feruri i te mau ’ohipa i reira te mau tamari’i o tō rātou fāito matahiti e fa’ahemahia ai ’ia rave i te mau fa’aotira’a ti’a ’ore. E ani ia rātou ’ia ha’uti mai e mea nāhea rātou e nehenehe ai e pe’e i te hi’ora’a o Iosepha i roto i teie mau huru ’ohipa—’ei hi’ora’a, e aha te tahi mau rāve’a e nenehene ai tātou e ha’amana’o i te Atua ’ia fa’ahema-ana’e-hia tātou ?
-
E fa’a’ite e piti auri ’ōvāhine, ’ei fa’ahōho’ara’a i te Atua ’e ia Sātane, ’e hō’ē tao’a auri na’ina’i mai te pine papie, nō te fa’ahōho’a ia tātou. E fa’a’ohipa i nā auri ’ōvāhine nō te fa’ahōho’a ē, rahi atu tātou i te ha’afātata atu i te Atua, rahi ato’a atu tōna fa’aurura’a i ni’a ia tātou, ’e mai te reira ato’a nō te ha’afātatara’a ia Sātane. E aha tā tātou e nehenehe e rave nō te ha’afātata atu i te Atua ? Nāhea e ti’a ai i te Vārua Maita’i ’ia tauturu ia tātou ?
Fa’aitoito i te ’apora’a mai i te fare
E ani i te mau tamari’i ’ia fa’a’ite mai i te mau rāve’a nō te fa’a’ī i te fa’ahitira’a parau i muri nei : « E nehenehe au e riro mai ia Iosepha nā roto i ». E ani ia rātou ’ia fa’a’ite atu i tō rātou ’utuāfare e nāhea rātou i te fa’a’ī i te fa’ahitira’a parau.
Ha’amaita’ira’a i tā tātou ha’api’ira’a
Ani ’ia fa’a’ite mai. ’A ’āparau ai ’oe i te mau parau tumu o te ’evanelia, e ani i te mau tamari’i ’ia fa’a’ite mai i tō rātou mau mana’o, mau ’āehuehura’a, ’e te mau ’itera’a. E ’ite mai ’oe ē, e rave rahi tō rātou mau mana’o faufa’a roa.