Genese 42–46

Iosepha ’e te o’e

Te fanaōra’a te hō’ē taea’e i te tāhō’ē i tōna ’utuāfare

’Ua po’ia te ’utuāfare o Iakoba nō te o’e. Nō reira, ’ua tono Iakoba i tāna mau tamaiti i Aiphiti nō te ho’o mai i te mā’a. ’Ua tape’a ’oia i tāna tamaiti hope’a, ’o Beniamina, i te fare. ’Ua ri’ari’a ’oia ’o te mo’e ’o Beniamina mai tāna tamaiti ’o Iosepha tei mo’e e rave rahi matahiti nā mua atu. ’Aita ’oia i ’ite ē, ’ua ho’o tāna mau tamaiti pa’ari ia Iosepha ’ei tītī.

Genese 42:1–4

I te reira tau, e fa’atere rahi Iosepha i Aiphiti. Nāna e ha’apa’o i te ho’ora’a i te mā’a i te tau o’e. ’Ua fārerei te mau tua’ana ia Iosepha ’e ’ua ani iāna i te mā’a. ’Ua hi’o’atā rātou iāna.

Genese 42:5–8

’Ua ’ite Iosepha ia rātou, ’ua ha’avare ’ite ’ore rā ’oia ia rātou. ’Ua ui ’oia nō ni’a i tō rātou utuāfare nō te ’ite ē, tē ora ra ānei tōna metua tāne ’e tōna taea’e ’o Beniamina.

Genese 42:10–14

I muri iho, ’ua hōro’a Iosepha i te mā’a nā tōna mau tua’ana. ’Ua parau ’oia ia rātou ’eiaha e ho’i fa’ahou mai nō te ti’i i te mā’a, maori rā ’ia arata’i ato’a mai i tō rātou teina, ’o Beniamina, nā muri iho ia rātou.

Genese 42:15–20

I te paura’a te mā’a a te ’utuāfare, ’ua ’ite Iakoba ē, e ti’a iāna ’ia tono ia Beniamina ’e te tahi atu mau tamaiti tāna i Aiphiti. Tē mata’u noa ra Iakoba e vaiiho ia Beniamina ’ia haere. ’Ua fafau mai rā Iuda, te hō’ē o te mau tua’ana, e pāruru ’oia ia Beniamina.

Genese 43:1–15

I tō te mau tua’ana ho’ira’a i Aiphiti, ’ua hina’aro Iosepha e pari ha’avare ē, ’ua ’eiā o Beniamina i te ’āu’a ’ārio. ’Ua hina’aro ’oia ’ia ’ite ē ’ua taui ānei tōna mau tua’ana. ’Ua tāparu Iuda ia Iosepna ’eiaha e fa’autu’a ia Beniamina, e fa’autu’a rā ia Iuda.

Genese 44

’Ua oa’oa roa Iosepha i te ’itera’a ē, ’ua taui tōna mau taea’e. E here rahi tō rātou ia Beniamina nō te pāruru iāna. Nō reira, i te pae hope’a, ’ua parau Iosepha ia rātou ’o vai ’oia.

Genese 42:21–24 ; 45:1–4

’Ua fa’a’ore Iosepha i te hapa a tōna mau taea’e nō te ho’ora’a iāna ’ia riro ’ei tītī. ’Ua parau Iosepha ē, ’o te rāve’a ïa a te Fatu nō te tauturu i tō rātou ’utuāfare ’ia ora i te tau o’e.

Genese 45:5–8

’Ua ho’i fa’ahou te mau taea’e o Iosepha i tō rātou metua tāne ia Iakoba, ’e ’ua parau iāna i te mau mea ato’a i tupu. ’Ua fa’ahaere Iakoba i tōna ’utuāfare tā’āto’a i Aiphiti.

Genese 45:24–28 ; 46:1–26

’Ua fāri’i poupou Phara’o i te ’utuāfare o Iakoba. ’Ua hōro’a ’oia nō rātou te mau fenua ’e te mau ’ānimara ’ia rahi tā rātou mā’a. ’Ua ora maoro te ’utuāfare o Iakoba i roto i te hau.

Genese 45:16–23