« Adamu ’e o Eva », Te mau ’ā’amu o te Faufa’a Tahito (2022)
« Adamu ’e o Eva », Te mau ’ā’amu o te Faufa’a Tahito
Genese 2-3 ; Mose 3-5 ; Aberahama 5
Adamu ’e ’o Eva
Fāri’ira’a i te ’itera’a rau ma te ravera’a i te mau mā’itira’a
’O Adamu ’e ’o Eva te mau tamari’i mātāmua a te Metua i te Ao ra tei ora i ni’a i te fenua nei. ’Ua ora rāua i roto i te ’ō nehenehe i Edene, tei fā’atihia e te mau huru rā’au tanu ’e mau tumu rā’au ato’a. ’Ua fārerei te Atua tō tātou Metua i te Ao ra ’e te Fatu ’o Iesu Mesia ia rāua ’e ’ua paraparau ia rāua.
Genese 2:8–9 ; 3:8 ; Mose 3:8–9 ; Aberahama 5:8, 14–19
’Ua vaiiho te Atua ia rāua ’ia ’amu i te hotu o te mau tumu rā’au ato’a, ’eiaha rā hō’ē. Mai te mea e ’amu rāua i tō te tumu rā’au nō tē ’ite i te maita’i ’e te ’ino, e ti’a ia rāua ’ia fa’aru’e i te ’ō ’e e pohe mau i te hope’a. ’Ua ha’avare Sātane ia Adamu ’e ia Eva. ’Ua parau Sātane mai te mea e ’amu rāua i te hotu, e ’ite mai rāua i te maita’i ’e te ’ino, e’ita rā rāua e pohe.
Genese 2:16–17 ; 3:1–5 ; Mose 3:9 ; 4:6–11 ; Aberahama 5:9, 12–13
’Ua mā’iti Eva e ’amu i te hotu.
’Ua hōro’a Eva ia Adamu i te hō’ē tuha’a o te hotu. ’Ua mā’iti ato’a ’oia e ’amu i te reira.
’Ua fārerei atu te Atua ’e te Fatu ia rāua, ’ua mata’u rā ’o Adamu ’e ’o Eva ’e ’ua tāpuni. ’Ua ani atu te Atua ia rāua ē, ’ua ’amu ānei rāua i te hotu nō te tumu rā’au nō te ’ite i te maita’i ’e te ’ino.
’Ua parau Adamu ’e ’o Eva i te Atua ē, ’ua mā’iti rāua ’ia ’amu i te hotu. Nō tā rāua mā’itira’a, ’ua tītauhia ia rāua ’ia fa’aru’e i te ’ō i Edene. ’Ua fa’ata’a-’ē-hia rāua i te Atua, terā rā e fa’anahora’a tā te Atua nō rāua. I teie nei, ’ua ’ite rāua i te maita’i ’e te ’ino ’e ’ua ti’a ia rāua ’ia fāri’i i te tamari’i.
’Ua fafau Adamu ’e ’o Eva ’ia ha’apa’o i te mau fa’auera’a ato’a a te Atua. ’Ua ha’api’ihia rāua ’ia rave i te mau tusia ’ānimara. ’A ha’apa’o ai rāua, ’ua ha’api’i rahi mai rāua nō ni’a i te Tamaiti a te Atua ’o Iesu Mesia. ’Ua fāri’i rāua to’opiti ato’a i te ’oa’oa rahi nō te mea e tauturu ’oia i tō rāua ’utuāfare ’ia ho’i i te Atua ra.