« Rahaba ’e te mau hi’o », Te mau ’ā’amu o te Faufa’a Tahito (2022)
« Rahaba ’e te mau hi’o », Te mau ’ā’amu o te Faufa’a Tahito
Rahaba ’e te mau hi’o
Te mā’itira’a tei fa’aora i te hō’ē ’utuāfare
Tē ora ra te hō’ē vahine ’o Rahaba te i’oa i Ieriko hou ’a haruhia ai e te ’āti ’Īserā’ela. ’Ua fa’aro’o ’oia i tō te Fatu vāhira’a i te miti ’Ute’ute nō te ’āti ’Īserā’ela. ’Ua ’ite ’o Rahaba ē e tauturu iho ā te Fatu i te ’āti ’Īserā’ela ’ia ’aro i tōna ’oire. Te nūna’a ta’ata nō Ieriko e feiā ’ī’ino roa.
Nā te peropheta ’o Iosua i arata’i i te nu’u ’āti ’Īserā’ela. ’Ua tono ’oia i e piti hi’o i Ieriko. ’Ua ’itehia rā rāua, ’e ’ua tono te ari’i nō Ieriko i te mau tīa’i nō te tāpe’a ia rāua.
’Ua haere mai te mau hi’o i te fare o Rahaba. ’Ua fāri’i Rahaba e tauturu i te mau hi’o, nō reira ’ua ha’atāpuni ’oia ia rāua i ni’a i tōna tāpo’i fare.
’Ua pāheru te mau tīa’i o te ari’i i te fare o Rahaba ’aita rā te mau hi’o i ’itehia e rātou. I te revara’a rātou, ’ua ani Rahaba i te mau hi’o ’ia pāruru i tōna ’utuāfare i te taime ’a haere mai ai tā rātou nu’u e ’aro ia Ieriko. ’Ua fafau mai te mau hi’o ia Rahaba ē e pāruruhia tōna ’utuāfare. I muri iho ’ua tāora ’o Rahaba i te hō’ē taura mai tōna ha’amāramarama ’ia nehenehe i teie nā hi’o ’ia horo ’ē atu.
’Ua ho’i atu teie nā hi’o i te peropheta ra ’o Iosua ’e ’ua parau atu i te nu’u ’āti ’Īserā’ela ’eiaha e hāmani ’ino i te hō’ē ta’ata nō te fare o Rahaba. I muri mai, ’a ’aro ai te ’āti ’Īserā’ela ia Ieriko, ’ua tāpe’a rātou i tā rātou fafaura’a ia Rahaba. Te itoito o Rahaba tei fa’aora i tōna ’utuāfare. ’Ua ’āmui tōna ’utuāfare i te nūna’a o te Fatu.