Genese 11–15 ; 17 ; Aberahama 1–2

Aberahama ’e ’o Sara

Hō’ē fafaura’a nō te ha’amaita’i i te ’utuāfare ta’ata nei

’Ua ora na Aberahama i te ’oire nō Ura. ’Ua hina’aro te mau tahu’a ’ī’ino e fa’atusia iāna i tō rātou mau ’īdolo. ’Ua pure Aberahama, ’e ’ua fa’aora te Fatu iāna.

Aberahama 1:1–20

I muri iho, ’ua fa’aue te Fatu ia Aberahama ’e i tāna vahine ia Sara ’ia fa’aru’e ia Ura ’e ’ia rātere atu i te hō’ē fenua ātea. ’Ua fafau ’oia e ha’amaita’i ia rāua i roto i tō rāua tere.

Genese 12:1–3 ; Aberahama 2:2–4

’Ua ti’aturi Aberahama ’e ’o Sara i te Fatu ’e ’ua haere i rāpae ia Ura. ’Ua ’oto rā rāua nō te mea ’aita a rāua e tamari’i. ’Ua tāmāhanahana te Fatu ia rāua. ’Ua fafau ’oia ē, e fānau mai rāua i te hō’ē tamari’i.

Genese 11:30–31 ; 15:1–6 ; 17:2–16 ; Aberahama 2:6–9

’Ua pure Aberahama i te Fatu nō te ha’api’i hau mai nō ni’a iāna. ’Ua fārerei atu te Fatu ia Aberahama ’e ’ua pi’i iāna iho ’o Iehova. ’Ua rave Iehova i te hō’ē fafaura’a ’e ’o Aberahama. ’Ua fafau ’oia ē, e fāri’i Aberahama i te autahu’ara’a. ’Ua fafau ato’a ’oia ē, nā roto i te ’utuāfare o Aberahama, e ha’amaita’ihia te mau ’utuāfare ato’a o te fenua nei.

Aberahama 2:6–11

’A rātere ai Aberahama ’e ’o Sara, ’ua hina’aro rāua e ’ite mai i te mā’a. ’Ua tāmata rāua i te ora i te fenua tei pi’ihia ’o Kana’ana. ’Aita rā e mā’a i reira, haere atura rāua i ’Aiphiti. Terā rā, te orara’a i ’Aiphiti e mea ataata roa ïa nō rāua.

Genese 12:10–20 ; Aberahama 2:21–25

’Ua fa’aru’e Aberahama ’e ’o Sara i ’Aiphiti ’e ’ua ho’i e ora i Kana’ana. ’Ua ’āfa’i nā muri ia rāua i te mā’a ’e i te mau ’ānimara na Aiphiti atu. ’O Kana’ana te tuha’a fenua tā te Fatu i fafau ia rāua.

Genese 13:1–4, 12 ; Aberahama 2:19

’Ua ha’apa’o ato’a te Fatu i tāna fafau ē, e fāri’i Aberahama i te autahu’ara’a. I te hō’ē mahana, ’ua fārerei Aberahama ’e ’o Sara i te hō’ē ari’i parauti’a ’o Melehizedeka te i’oa. ’Ua ’aufau ’o Aberahama i te tuha’a ’ahuru iāna ra.

Genese 14:18–24 ; Alama 13:15

’Ua fāri’i Aberahama i te autahu’ara’a nā roto mai ia Melehizedeka. Hō’ē ā autahu’ara’a ’o tā te mau peropheta ’o Adamu ’e ’o Noa i fāri’i.

’Īritira’a a Iosepha Semita, Genese 14:36–40 ; Aberahama 1:2–4 ; Te Ha’api’ira’a Tumu ’e te mau Fafaura’a 84:14

’Ua ’oa’oa Aberahama ’e ’o Sara i Kana’ana, tē ha’ape’ape’a noa nei rā rāua nō te mea ’aita tā rāua e tamari’i. E ti’a ia rāua e ti’aturi i te parau fafau a te Fatu ē, i te hō’ē mahana e tupu tō rāua ’utuāfare i te rahi ’e e ha’amaita’i ho’i i te fenua ato’a.

Genese 13:12 ; 15:3–6