« Aberahama ’e ’o Isaaka », Te mau ’ā’amu o te Faufa’a tahito (2022)
« Aberahama ’e ’o Isaaka », Te mau ’ā’amu o te Faufa’a Tahito
Genese 17:21–22
Aberahama ’e ’o Isaaka
Hō’ē metua tāne, hō’ē tamaiti ’e hō’ē tusia
E ’aiū tamāroa tā Aberahama ’e tā Sara, mai tā te Fatu iho ā i fafau mai. ’Ua pi’i rāua iāna ’o Isaaka.
’Ua here rāua ia Isaaka. ’Ua ha’api’i rāua iāna ’ia mā’iti i te maita’i ’e ’ia ti’aturi i te Fatu.
’Ua fafau te Fatu ia Aberahama ’e ia Sara ē, nā roto ia Isaaka e tupu tō rātou ’utuāfare i te rahi nō te ha’amaita’i i te ao ato’a nei. Terā rā i te hō’ē mahana, ’ua parau te Fatu ia Aberahama ’ia ’āfa’i ia Isaaka i ni’a i te mou’a nō Moria ’e ’ia pūpū atu ia Isaaka ’ei tusia.
I ni’a i tō rāua ’ē’a i ni’a i te mou’a, ’ua ani Isaaka tei hea te ’arenio nō te tusia. ’Ua parau Aberahama ē, e hōro’a mai te Fatu.
I ni’a i te mou’a nō Moria, ’ua patu Aberahama i te hō’ē fata ’e ’ua tu’u i te rā’au i ni’a iho.
Mai tā te Fatu i fa’aue mai, ’ua ani Aberahama ia Isaaka ’ia tārava i ni’a i te fata. ’Ua ti’aturi Isaaka ia Aberahama mai te Fa’aora ’o Iesu Mesia i ti’aturi i tōna Metua tāne.
I te taime ’a ha’amata ai ’o Aberahama i te fa’atusia ia Isaaka, ’ua tāpe’a te hō’ē melahi a te Fatu iāna. ’Ua fa’a’ite Aberahama i tōna fa’aro’o i te Fatu. ’Ua ’ite Aberahama ē, e pe’e noa ’oia i te Fatu.
Hi’o atu ra Aberahama i ni’a ’e ’ua ’ite atu ra i te hō’ē māmoe oni tei mau i roto i te uru ’aihere. ’Ua hōro’a mai te Fatu i te māmoe oni nō te tusia.
’Ua ha’api’i mai Aberahama ’e ’o Isaaka nāhea te Metua i te Ao ra i te pūpū i tāna Tamaiti ia Iesu Mesia ’ei tusia. ’Ua ti’aturi te Fatu Iesu Mesia ia Aberahama nō te mea ’ua ha’apa’o ’oia i te parau. ’Ua ti’aturi Aberahama i te fafaura’a a te Fatu ē, i te hō’ē mahana, e tupu tōna ’utuāfare i te rahi hau atu i te tai’o o te mau feti’a i roto i te ra’i.