« Nō ni’a i te Faufa’a Tahito », Te mau ’ā’amu o te Faufa’a Tahito (2022)
« Nō ni’a i te Faufa’a Tahito », Te mau ’ā’amu o te Faufa’a Tahito
Nō ni’a i te Faufa’a Tahito
Te mau fafaura’a a te Metua i te Ao ra i tāna mau tamari’i erā ’ē te tau
Te tuha’a mātāmua o te Bibilia Mo’a ’o te Faufa’a Tahito ïa. ’Ua pāpa’ihia teie mau pāpa’ira’a mo’a e mea maoro i teienei, hou Iesu Mesia ’a fānauhia ai. E mau ’ā’amu ’o tē tauturu ia tātou ’ia roa’a te fa’aro’o iāna. Tē ha’api’i nei te reira ia tātou ē, e tuha’a te ta’ata tāta’itahi i ni’a i te fenua nei nō te utuāfare o te Metua i te ao ra ’e ’ua here ’oia i tāna mau tamari’i.
Deuteronomi 7:7–9 ; Isaia 45:10–12
I roto i te Faufa’a Tahito, ’ua pi’ihia Iesu Mesia ’o Iehova ’e ’o te Fatu. E pe’e ’oia i te mau arata’ira’a a te Metua i te ao ra. Mai te ’anotau ’o Adamu ’e ’o Eva, ’ua tono mai te Metua i te ao ra i te Fatu ia Iesu Mesia nō te paraparau i tāna mau peropheta. ’Ua tono mai te Metua i te ao ra i te Vārua Maita’i nō te tauturu ia tātou ’ia ’ite ē, e parau mau te mau parau a te hō’ē peropheta.
Exodo 6:2–3 ; 2 Paraleipomeno 20:20 ; Amosa 3:7 ; 2 Petero 1:21 ; Mose 2:1
’Ua fafau te Fatu i te peropheta Aberahama ’e i tāna vahine ’o Sara ē, e tupu tō rāua ’utuāfare i te rahi ’e e ha’amaita’i i te ao ato’a nei. E ’utuāfare rahi tō tā rāua mo’otua tamāroa ’o Iakoba tei riro mai ’ei nūna’a. ’Ua pi’ihia rātou te ’utuāfare o ’Īserā’ela, ’aore rā te ’āti ’Īserā’ela. ’Ua ha’api’i te mau peropheta ia rātou ’ia tīa’i i te taime e tae mai ai Iesu Mesia.
Genese 15:5–6 ; 17:1–8 ; Deuteronomi 18:15 ; Isaia 7:14
E rave rahi ’ā’amu i roto i te Faufa’a Tahito e fa’a’ite nei e mea nāhea tō te Fatu ha’apa’ora’a i tāna mau fafaura’a i te ’āti ’Īserā’ela
Genese 9:13–17 ; Ieremia 11:4–5 ; Hebera 11:1–35
’Ia fa’aro’o ana’e ’Īserā’ela i te mau peropheta ’e ’ia ha’apa’o ana’e i te mau fa’auera’a, e tauturu te Fatu ia rātou. ’Ia ha’apa’o ’ore ana’e rātou, e’ita ’oiatāna e nehenehe e tauturu ia rātou.
Deuteronomi 11:26–28 ; Ioba 36:11–12
E tuha’a ’outou nō te ’utuāfare o te Metua i te ao ra. E mea hāmani maita’i te Metua i te ao ra, ’e tē here nei ia ’outou. E fa’anahonahora’a tāna nō ’outou. Maoti te Fatu ’o Iesu Mesia, e nehenehe ’outou e ho’i fa’ahou e ora i pīha’i iho i te Metua i te ao ra. Mai tei ha’api’ihia i tō ’Īserā’ela e nehenehe ’outou e mā’iti ’ia roa’a te fa’aro’o i te Fatu ’e ’ia ha’apa’o i tāna mau fa’auera’a.