2 Te Mau Ari’i 22 ; 2 Paraleipomeno 34–35

Te ari’i Iosia

E tītaura’a ’ia ha’apa’o i te mau fa’auera’a a te Fatu

E va’u matahiti tō Iosia i te taime ’a ha’amauhia ai ’oia e ari’i nō Iuda. E ari’i maita’i ’oia, tei here i te Fatu. ’Ua hina’aro ’oia e tauturu i tōna nuna’a, te ’āti ’Īserā’ela, ’ia ha’apa’o i te parau a te Fatu ’e ’ia fa’aea i te ha’amori i te mau ’īdolo. I tōna pa’arira’a, ’ua ha’amata ’oia ’e tōna mau ta’ata i te tātā’i i te hiero ’e ’ua fa’anehenehe fa’ahou ā i te reira.

2 Te Mau Ari’i 22:1–2 ; 2 Paraleipomeno 34:3–7

’A ’ohipa ai te mau ta’ata i ni’a i te hiero, ’ua ’itehia ia Hilkia te tahu’a rahi, te buka ture, e ’ōtaro parau e vai ra te mau pāpa’ira’a mo’a.

2 Te mau Ari’i 22:3–9

’Ua tai’o te hō’ē tāvini i te buka ia Iosia. ’Ua fa’aro’o Iosia i te mau parau ’e ’ua ’oto nō te mea ’aita tōna mau ta’ata i ha’apa’o i te parau a te Fatu. ’Ua hahae ’oia i tōna ’ahu nō te fa’a’ite ē tē ’oto ra ’oia.

2 Te Mau Ari’i 22:10–13, 19

’Ua parau ’oia ia Hilikia ’ia ani i te Fatu e aha tē ti’a ia rātou ’ia rave. ’Ua fārerei Hilikia ’e te mau tāvini o te ari’i ia Hulada. E peropheta vahine ’oia, e ti’a fa’atere ha’apa’o maita’i tei fa’auruhia e te Atua. ’Ua parau ’oia ē ’ua ’oa’oa te Fatu ia Iosia nō te mea tē tauturu ra ’oia i te ta’ata ’ia ha’apa’o. ’Ua parau fafau mai te Fatu ē e ora te ari’i Iosia ma te hau.

2 Te mau Ari’i 22:12–20

’Ua hina’aro te ari’i Iosia ’ia tāpe’a tōna nūna’a i tā rātou mau fafaura’a i te Fatu. ’Ua ani ’oia ia rātou ’ia fa’ahanahana i te Pāsa a te ’āti Iuda nō te tauturu ia rātou ’ia ha’amana’o e mea nāhea tō te Fatu fa’aorara’a i te ’āti ’Īserā’ela i tahito ra i ’Aiphiti.

2 Paraleipomeno 35:1–19