« Te ari’i vahine ’o Esetera », Te mau ’ā’amu o te Faufa’a Tahito (2022)
« Te ari’i vahine ’o Esetera », Te mau ’ā’amu o te Faufa’a Tahito
Esetera 2–5, 7-9
Te ari’i vahine ’o Esetera
Te itoito i roto i te hō’ē tau ’ati
’Ua pi’ihia te tahi mau ’āti ’Īserā’ela e mau ’āti Iuda. E ’āti Iuda ’o Esetera e ora ra i Peresia. ’Ua pohe tōna nā metua, nō reira, ’ua ha’apa’o tōna taea’e fēti’i ’o Moredekai iāna. ’Ua anihia ’oia i roto i te aora’i o te ari’i ’e te tahi atu mau tamāhine i roto i te bāsileia. ’Ua hina’aro te ari’i i te hō’ē ari’i vahine ’āpī, ’e ’ua mā’iti ’oia ia Esetera.
Tē vai ra tō te ari’i hō’ē tāvini ’o Hamana te i’oa, e mana rahi tōna. ’Ua tauturu Hamana i te ari’i ’ia fa’atere i te fenua. ’Ua rave te ari’i ’ia pi’o te mau ta’ata ato’a i mua ia Hamana.
E’ita roa rā Moredekai e pi’o i mua ia Hamana. E pi’o noa Moredekai i mua i te Fatu. ’Ua riri Hamana nō te reira. ’Ua hina’aro ’oia e fa’autu’a ia Moredekai ’e i te mau ’āti Iuda ato’a.
’Ua parau Hamana i te ari’i ē, ’aita te ’āti Iuda i pe’e i te mau ture a te ari’i. Nō reira, ’ua vaiiho te ari’i ia Hamana ’ia ha’amau i te hō’ē ture ’āpī : I te hō’ē mahana, e riro te mau ’āti Iuda ato’a i te taparahi-pohe-hia.
’Ua ani Moredekai ia Esetera ’ia paraparau i te ari’i. E nehenehe tā te ari’i e taui i te ture a Hamana ’e e fa’aora i te mau ’āti Iuda. Terā rā, ’ua mata’u ’o Esetera. I te tahi taime, e taparahi pohe te ari’i i te mau ta’ata tei haere mai e paraparau iāna ma te tītau-’ore-hia.
’Ua ani Moredekai ia Esetera ’ia feruri i te mau ’āti Iuda ’o te taparahi-pohe-hia. ’Ua parau Moredekai ē, ’ua tu’u paha te Fatu ia Esetera i roto i te aora’i o te Ari’i nō tē fa’aora i te mau ’āti Iuda.
’Ua ’ite Esetera e mea ti’a iāna ’ia paraparau i te ari’i, noa atu ē e ti’a ’ia taparahi-pohe-hia ’oia. ’Ua ani Esetera i te mau ’āti Iuda ato’a ’e i tōna mau tāvini ’ia ha’apae i te mā’a nā muri iho iāna.
I muri a’e i te ha’apaera’a mā’a nō nā mahana e toru, ’ua fa’aineine Esetera iāna iho ’e ’ua haere e hi’o i te ari’i.
I te ha’afātatara’a atu ’oia i te ari’i, ’ua tono atu ’oia i tāna sepeta. Tē aura’a ra, ’ua ’oa’oa te ari’i i te ’itera’a iāna ’e e’ita ’oia e tu’u iāna ’ia ha’apohehia. ’Ua ui atu te ari’i e aha tāna i hina’aro. ’Ua parau Esetera i te ari’i ē, tē fifi ra tōna mau ta’ata. Nō te ture a Hamana, e taparahi-pohe-hia ’oia ’e te mau ’āti Iuda ato’a i roto i te bāsileia.
’Ua riri te ari’i ia Hamana ’e ’ua ha’apohe iāna. ’Ua ha’amau te ari’i i te hō’ē ture ’āpī ’o te pāruru i te mau ’āti Iuda. I teienei, ’ua fa’ati’ahia rātou ’ia pāruru ia rātou iho mai te mea e tāmata te hō’ē ta’ata i te ha’apēpē ia rātou.
’Ua fa’aora te fa’aro’o o Esetera i te Fatu ’e tōna itoito nō te parau i te ari’i i tōna mau ta’ata. ’Aua’a ’aita te pohe ’e te ’oto, ’ua tupu ra te hō’ē ’ōro’a. ’Ua fa’ahanahana te mau ’āti Iuda.