« Te ari’i Davida », Te mau ’ā’amu o te Faufa’a Tahito (2022)
« Te ari’i Davida », Te mau ’ā’amu o te Faufa’a Tahito
1 Samuela 18–19 ; 31 ; 2 Samuela 1 ; 5 ; 11–12
Te ari’i Davida
Te mau ’arora’a a te hō’ē ari’i
’Ua māere roa te ari’i Saula, te ari’i o ’Īserā’ela, i te upo’oti’ara’a Davida i ni’a ia Golia. ’Ua fa’ariro Saula ia Davida ’ei fa’atere i ni’a i tāna mau nu’u.
’Ua here Davida i te Fatu ’e ’ua hina’aro tāmau noa i te rave i te mea ti’a. ’Ua here te mau ta’ata o ’Īserā’ela ia Davida.
’Ua tupu te pohehae o Saula i te rahi ’e ’ua tāmata i te taparahi pohe ia Davida. Terā rā, ’ua pe’e Davida i te Fatu, ’e ’ua pāruru te Fatu iāna i mua ia Saula.
’Ua ’aro te ’āti ’Īseraela i roto i te mau tama’i e rave rahi. I te hō’ē mahana, ’ua pohe Saula ’e tāna mau tamaroa i roto i te tama’i. ’Ua here Davida ia rātou ’e ’ua ’oto roa i te fa’aro’ora’a i tō rātou pohe. I teienei, ’ua hina’aro te ’āti ’Īseraela i te hō’ē ari’i ’āpī. ’Ua mā’iti te Fatu ia Davida ’ia riro ’ei ari’i. ’Ua ’oa’oa te nūna’a.
1 Samuela 31:2–6 ; 2 Samuela 1:11–12 ; 5:1–5
’Ua ha’amaita’i te Fatu i te ari’i Davida ’e ’ua arata’i iāna. Ma te tauturu a te Fatu, ’ua upo’oti’a te nu’u o Davida i ni’a i tō rātou mau ’enemi.
I te hō’ē mahana, ’a tītauhia ia Davida e haere i te tama’i, ’ua fa’aea ’oia i te fare. ’Ua ’ite atu ’oia i te hō’ē vahine nehenehe. ’O Bate-Seba tōna i’oa, ’e ’ua hina’aro Davida e fa’aipoipo iāna. Terā rā, ’ua fa’aipoipo a’ena ’oia ia Uria, te hō’ē fa’ehau i roto i te nu’u a Davida.
’Ua hina’aro Davida e fa’aipoipo ia Bate-Seba, nō reira ’ua tono ’oia i tāna tāne ia Uria i roto i te hō’ē ’arora’a ri’ari’a, ’ia ti’a ho’i ia Uria ’ia taparahi-pohe-hia.
’Aita i maoro roa, ’ua ha’api’i mai David ē, ’ua pohe o Uria i roto i te tama’i. ’Ua tono Davida i tāna mau tāvini e ’āfa’i mai ia Bate-Seba i tōna fare, ’e ’ua fa’aipoipo ’oia iāna.
’Aita rā te Fatu i ’oa’oa i te mea tā Davida i rave. ’Ua tono te Fatu ia Natana, te hō’ē peropheta, nō te parau ia Davida e aha te teimaha o tāna hara. ’Ua ’oto rahi roa Davida nō te ’ohipa ’o tāna i rave ia Uria ’e ia Bate-Seba. ’Ua pure ’e ’ua ha’apae ’oia i te mā’a nō te fa’a’orera’a hara a te Fatu.