« Daniela ’e te moemoeā o te ari’i », Te mau ’ā’amu o te Faufa’a Tahito (2022)
« Daniela ’e te moemoeā o te ari’i », Te mau ’ā’amu o te Faufa’a Tahito
Daniela 2
Daniela ’e te moemoeā o te ari’i
Te poro’i māere a te Atua i te hō’ē ari’i
’Ua fāri’i te ari’i ’o Babulonia i te hō’ē moemoeā ’o tei ha’ape’ape’a iāna. ’Ua tītau ’oia ’ia fa’a’ite mai tāna mau tahu’a ’e te mau ta’ata pa’ari iāna i te aura’a o te moemoeā.
E’ita te ari’i e parau ia rātou i te moemoeā. ’Ua parau ’oia ē, mai te mea e mana mau tō te mau tahu’a ’e te mau ta’ata pa’ari, e nehenehe tā rātou e fa’a’ite iāna i te moemoeā ’e te aura’a o te reira.
’Ua parau te mau tahu’a ’e te mau ta’ata pa’ari i te ari’i ē, e’ita tā rātou e nehenehe e tātara i tōna moemoeā mai te mea ’aita ’oia e fa’a’ite atu ia rātou i te moemoeā. ’Ua parau rātou ’aita te hō’ē ta’ata e nehenehe e rave i te reira. ’Ua riri te ari’i ’e ’ua parau atu ’oia ē, e taparahi pohe ’oia i te mau ta’ata pa’ari ato’a i roto i te bāsileia, ’oia ato’a ia Daniela ’e tōna mau hoa.
I te taera’a mai te tīa’i o te ari’i nō te haru ia Daniela ’e tōna mau hoa, ’ua ani ’o Daniela i te tahi taime ’ia nehenehe iāna ’ia parau i te ari’i e aha te aura’a o tōna moemoeā. ’Ua ’ite ’o Daniela ē, e ’ite te Atua ’e e hi’o ’oia i te mau mea ato’a, e tae noa atu i te mau moemoeā. ’Ua ani Daniela i tōna mau hoa ’ia pure nā muri iāna.
’Ua fa’a’ite mai te Atua ia Daniela i te moemoeā o te ari’i i roto i te hō’ē ’ōrama ’e ’ua ha’api’i ia Daniela i te aura’a o te reira. ’Ua ha’amāuruuru Daniela i te Atua nō te pāhonora’a i tāna ’e tā tōna mau hoa mau pure ’e nō te fa’aorara’a i tō rātou ora. I muri iho, ’ua haere atu ’oia e parau i te ari’i i te aura’a o te moemoeā.
’Ua parau Daniela, te moemoeā o te ari’i ’o te hō’ē ïa ti’i rahi tei vāvāhihia e te hō’ē ’ōfa’i tei ’ō’otihia mai i te hō’ē mou’a. Tē fa’ahōho’a nei te ti’i i te mau bāsileia o te fenua nei. Te ’ōfa’i i ’ō’otihia mai i te moua e fa’ahōho’a ïa i te bāsileia ’o te Atua ’o tē fa’a’ī i te fenua nei. ’Ua ’ite te ari’i ē, ’ua parau Daniela i te parau mau.