Ruta 1–4

Ruta ’e ’o Naomi

Te upo’oti’ara’a i te mau tāmatara’a ma te here ’e te ha’avare ’ore

Naomi ’e tōna ’utuāfare e fa’anu’u ra i Moabi nō te mea ’aita i nava’i te mā’a i roto i te fenua nō Iuda. I muri iho, ’ua pohe te tāne a Naomi. ’Ua fa’aipoipo te mau tamaiti a Naomi i te mau vahine nō Moabi, ’o Oraphe ’e ’o Ruta te i’oa. ’Ua aupuru rāua ia Naomi i te roara’a e 10 matahiti.

Ruta 1:1–4

I muri iho, ’ua pohe te mau tāne a Oraphe ’e a Ruta. I teienei, tē vai ’ōtahi nei te nau vahine. E’ita Naomi e nehenehe e hōro’a i te mā’a nā Ruta ’e nā Oraphe.

Ruta 1:5, 8–10

’Ua ho’i atu Oraphe i te tōna fare. Tera rā, ’ua hina’aro Ruta e fa’aea noa ’e e ha’apa’o ia Naomi. ’Ua fa’aro’o Ruta ’e ’o Naomi, ’ua tupu fa’ahou te mā’a i te fenua nō Iuda, nō reira, ’ua rātere atu rāua i reira.

Ruta 1:16–19

’Ua tae ’o Ruta ’e ’o Naomi i Iuda i te taime nō te tau ’auhunera’a. ’Ua hina’aro rāua i te mā’a. E mau fa’a’apu tā te metua feti’i o Naomi i Iuda, ’o Boaza te i’oa. ’Ua vaiiho ’oia ia Ruta ’ia rave i te mau huero toe i roto i tāna mau ’āua. E ’ohipa rohirohi te reira.

Ruta 1:22 ; 2:3

Tē fa’atura nei Boaza ia Ruta nō te mea tē rave neix ’oia i te ’ohipa ma te itoito ’e nō te mea, e mea ha’apa’o maita’i ’oia ia Naomi ’e i te Fatu. ’Ua parau atu ’oia i te mau tāvini ’ia fa’aru’e rahi i te mau huero i roto i te ’āua nā Ruta.

Ruta 2:5–17

’Ua hina’aro Naomi ia Ruta ’ia fāri’i i te hō’ē ’utuāfare. ’Ua fa’aitoito ’oia ia Ruta ’ia fa’aipoipo ia Boaza. ’Ua ’ite Ruta ē, mai te mea e fa’aipoipo ’oia ’e ’o Boaza, e nehenehe ïa tā rāua e ha’apa’o ’āmui ia Naomi.

Ruta 3:1–2 ; 4:15

’Ua fa’aoti Ruta e ani ia Boaza ’ia fa’aipoipo iāna. ’Ua ’ite Boaza ē, e vahine ha’apa’o maita’i ’e te vi’ivi’i ’ore ’o Ruta. ’Ua fāri’i ’oia i te reira.

Ruta 3:3–18 ; 4:13

’Ua fa’aipoipohia Ruta ’e ’o Boaza. ’Aita i maoro roa, ’ua fāri’i Ruta i te hō’ē ’aiū tamāroa. ’Ua riro mai ’oia ’ei pāpā rū’au nō Davida, te ari’i nō muri iho. E rave rahi mau matahiti i muri mai, ’ua fānauhia Iesu Mesia i roto i teie rēni ’utuāfare.

Ruta 4:13–17