« Davida ’e ’o Golia », Te mau ’ā’amu o te Faufa’a Tahito (2022)
« Davida ’e ’o Golia », Te mau ’ā’amu o te Faufa’a Tahito
1 Samuela 17
Davida ’e Golia
Tē fa’arurura’a i te hō’ē tītaura’a rahi mau
Tē ’aro nei te mau Philiseti i te ’āti ’Īserā’ela. I te mau po’ipo’i ato’a, e tītau te hō’ē Philiseti rahi mau ’o Golia te i’oa i te hō’ē ’āti ’Īserā’ela e ’aro iāna. E ta’ata rahi mau ’e te ’ā’ano ’o Golia i te mau ta’ata ato’a, ’e te fa’arahi iāna. E ’ō’omo ’oia i te ha’ana tama’i teiaha ’e e amo i te hō’ē ’o’e, te ’ōmore ’e te pāruru rahi. ’Aita te hō’ē ta’ata i hina’aro e ’aro atu iāna.
E tamaiti tīa’i māmoe ’āpī ’o Davida tei vai te fa’aro’o i te Fatu. E mau fa’ehau tōna mau tua’ana i roto i te nu’u o ’Īserā’ela. I te hō’ē mahana, ’ua hōpoi atu Davida i te tahi mā’a nā tōna mau tua’ana. I tōna taera’a atu i te pūhapa o te nu’u fa’ehau, ’ua fa’aro’o ’oia i te tītaura’a a Golia.
’Ua ani Davida i te mau fa’ehau nō te aha ’aita e ta’ata nō te pāruru ia ’Īserā’ela. ’Ua riri tōna mau tua’ana ’e ’ua parau atu iāna e haere e ha’apa’o i te mau māmoe. Terā rā, ’ua ’ite Davida e pāruru te Fatu ia ’Īserā’ela.
’Ua ’ite te ari’i Saula i te fa’aro’o o Davida, nō reira, ’ua ani ’oia e fārerei ia Davida. ’Ua parau Davida ia Saula ē, ’aita ’oia e mata’u i te ’aro atu ia Golia. ’Ua fa’ata’a Davida ē, i te hō’ē taime ’a ha’apa’o ai ’oia i tāna mau māmoe, ’ua taparahi pohe ’oia i te hō’ē liona ’e te hō’ē pea. ’Ua pāruru te Fatu iāna i reira ra, ’e ’ua ’ite Davida e pāruru ā te Fatu iāna i teienei.
’Ua hōro’a Saula ia Davida i tōna ha’ana tama’i. ’Aita rā te reira i tano, nō reira, ’ua tātara atu Davida i te reira. ’Ua fa’aoti ’oia e ’aro ma te ha’ana tama’i ’ore.
’Ua mā’iti Davida e pae ’ōfa’i mānina ’e ’ua tu’u atu i te reira i roto i te hō’ē pūtē. ’Ua rave mai ’oia i tāna ma’a ’e tāna rā’au tīa’i māmoe ’e ’ua haere atu e fa’aruru ia Golia.
I tō Golia ’itera’a ia Davida, ’ua tuō ’oia ’e ’ua fa’a’ō’ō iāna. ’Ua parau ’oia e’ita e ti’a i te hō’ē tamaiti tīa’i māmoe ’ia tā’iri iāna. ’Ua tuō atu ra Davida ē, ’ua ti’aturi ’oia e pāruru te Fatu iāna ! ’Ua parau Davida e tā’iri ’oia ia Golia nō te fa’a’ite i te fāito rahi o te Fatu.
’Ua horo atu Davida i ni’a ia Golia. ’Ua tāora ’oi’oi atu ’oia i te hō’ē ’ōfa’i i tāna ma’a. ’Ua tano atu te ’ōfa’i i ni’a i te rae o Golia, ’e topa ihora te ta’ata rahi ra i ni’a i te repo. ’Ua tauturu te Fatu ia Davida ’ia ’aro ia Golia ma te ’o’e ’e te ha’ana tama’i ’ore.
I te ’itera’a te mau Philiseti ē, ’ua pohe ’o Golia, ’ua horo atura rātou ma te mata’u. ’Ua upo’otia te ’āti ’Īserā’ela i te tama’i. ’Ua ti’aturi Davida i te Fatu, ’e ’ua pāruru te Fatu ia ’Īserā’ela.