« Iosepha i Aiphiti », Te mau ’ā’amu o te Faufa’a Tahito (2022)
« Iosepha i Aiphiti », Te mau ‘ā’amu o te Faufa’a Tahito
Iosepha i Aiphiti
E riro mai te hō’ē tītī ’ei fa’atere
’Ua ho’ohia Iosepha ’ei tītī i te hō’ē ta’ata ’o Potiphara te i’oa. E rave ’ohipa ’o Potiphara nā Phara’o, e ta’ata tōro’a nō Aiphiti. E nehenehe tā Potiphara e parau ē ’ua tauturu te Fatu ia Iosepha. ’Ua ti’aturi ’oia ia Iosepha ’e ’ua tu’u iāna ’ei ha’apa’o i tōna fare ’e i tāna mau mea ato’a.
’Ua au roa te vahine a Potiphara ia Iosepha. ’Ua hina’aro ’oia ’ia ’ōfati Iosepha i te mau fa’auera’a a te Fatu ’e ōna. ’Ua parau atu Iosepha iāna ’aita.
’Aita te vahine a Potiphara i hina’aro e fa’aro’o, nō reira ’ua horo ’ē atu Iosepha. ’Ua riri te vahine a Potiphara ia Iosepha.
’Ua fa’a’ite ’oia ia Potiphara i te hō’ē tuha’a ahu ’o Iosepha. ’Ua ha’avare ’oia ia Potiphara nō ni’a ia Iosepha. ’Ua tu’u atu Potiphara ia Iosepha i roto i te fare tāpe’ara’a.
’Ua fa’ata’a-’ē-hia Iosepha i tōna ’utuāfare. ’Ua riro ’oia ’ei tītī, ’e i teienei ’ua riro ’oia ’ei mau ’āuri. ’Ua tauturu mai rā te Fatu ia Iosepha. ’Aita rā Iosepha i ha’aparuparu. ’Ua ha’amaita’i te Fatu i te tīa’i o te fare tāpe’ara’a nō te ’ite i te maita’i i roto ia Iosepha. ’Ua ha’amata te tīa’i i te ti’aturi iāna, nō reira ’ua tu’u ’oia ia Iosepha ’ei ha’apa’o i te tahi atu mau mau ’āuri.
’Ua fārerei atu Iosepha e piti mau ’āuri, hō’ē ta’ata hāmani faraoa, ’e hō’ē ta’ata ha’apa’o fare, tei rave i te ’ohipa nā Phara’o. ’Ua fa’aheita’otohia rāua to’opiti i te mau moemoeā huru ’ē. Nā roto i te mana o te Fatu, ’ua fa’ata’a Iosepha i te aura’a o tō rāua moemoeā. Te aura’a nō te moemoeā o te ta’ata ha’apa’o fare, e matara ’oia i rāpae i te fare ’āuri. E toru mahana i muri mai, ’ua fa’ati’amāhia ’oia ’ia rave fa’ahou i te ’ohipa nā Phara’o.
I te hō’ē mahana, ’ua ahoaho ’o Phara’o i tāna mau moemoeā. ’Aita hō’ē ta’ata e nehenehe e parau iāna i te aura’a o tōna mau moemoeā.
’Ua ha’amana’o a’era te ta’ata ha’apa’o fare ē, e nehenehe Iosepha e tātara i te mau moemoeā.
’Ua tātarahia mai Iosepha i rāpae i te fare tāpe’ara’a nō te tātara i te mau moemoeā ’o Phara’o. ’Ua parau Iosepha ē, te aura’a o te mau moemoeā, e ’auhune ’Aiphiti i te mā’a e hitu matahiti, ’e i muri iho, e hitu matahiti o’e, ma te iti roa te mā’a. ’Ua parau Iosepha ia Phara’o ē, e ti’a ia Aiphiti ’ia ha’aputu i te mā’a i te roara’a o te mau matahiti maita’i.
’Ua ’ite Phara’o ē, e parau mau te mea tā Iosepha i parau nō ni’a i tōna mau moemoeā. ’Ua tu’u ’oia ia Iosepha i rāpae i te fare tāpe’ara’a ’e ’ua fa’ariro ia Iosepha ’ei ta’ata fa’atere rahi i Aiphiti. E hitu matahiti tō Iosepha tauturura’a ia Aiphiti ’ia ha’aputu i te mā’a.
’Ua tae mai te o’e. I roto i te reira tau, ’aita e ta’ata e nehenehe e fa’atupu i te mā’a. ’Ua tere te mau ta’ata i Aiphiti nō te ho’o mai i te mā’a tā Iosepha i ha’aputu. Maoti Iosepha, ’ua ha’aputu te mau ta’ata nō Aiphiti i te mā’a ’e ’ua nava’i nō te tauturu ia rātou ’e ia vetahi ’ē ’ia ora mai i te tau o’e.