« Iakoba ’e ’o Esau », Te mau ’ā’amu o te Faufa’a Tahito (2022)
« Iakoba ’e ’o Esau », Te mau ’ā’amu o te Faufa’a Tahito
Genese 25–27
Iakoba ’e ’o Esau
E piti taea’e ’e hō’ē ti’ara’a matahiapo
E maeha’a tamāroa tā Isaaka ’e Rebeka, ’o Iakoba ’e ’o Esau. E ta’ata ’aravihi Esau nō te ’ohipa a’ua’u ’ānimara. ’Ua ora Iakoba i te hō’ē orara’a ’ōhie ’e ’ua pe’e i te Fatu.
’Ua fānau-nā-mua-hia ’o Esau. I tei matarohia, e fāri’i te fānau-mātāmua-hia i te ha’amaita’ira’a nō te ti’ara’a matahiapo nā tōna metua tāne. Te aura’a o ti’ara’a matahiapo, e arata’i ’oia i te ’utuāfare ’e e fāri’i e rave rahi fenua ’e te mau ’ānimara nō te tauturu i te aupuru i te ’utuāfare. Terā rā, ’ua rahi atu tō Esau ha’apa’ora’a iāna iho i tōna ’utuāfare, ’e ’aita ’oia e ha’apa’o i te parau a tōna nā metua ’e a te Fatu.
I te hō’ē mahana, ’ua ho’i mai Esau nā te a’ua’ura’a ’ānimara. ’Ua po’ia roa ’oia ’e ’ua tāparu ia Iakoba ’ia fa’a’amu iāna. ’Ua hina’aro te Fatu ’ia roa’a ia Iakoba i te ha’amaita’ira’a nō te ti’ara’a matahiapo, nō te mea ’aita ’o Esau i ti’amā nō te reira. ’Ua ani Iakoba ia Esau ’ia ho’o mai iāna i te ti’ara’a matahiapo nō te tahi ma’a mā’a. ’Ua fāri’i Esau ’e ’ua ho’o i tōna ti’ara’a matahiapo ia Iakoba.
Genese 25:23, 29–34 ; Hebera 11:20
’Ua hina’aro Rebeka ’e ’o Isaaka i te mea maita’i a’e nō tā rāua mau tamari’i. ’Ua ’oto rāua i te mea ē, ’ua tāmau noa ’o Esau i te rave i te mau mea tāna i hina’aro, ’eiahā rā i tā te Fatu i hina’aro.
’Ua pa’ari roa Isaaka ’e ’ua matapōhia. Hou ’oia ’a pohe ai, ’ua ani ’oia ia Esau e a’ua’u ’e e tunu i te hō’ē ’ānimara, ’ia ’amu ’oia i reira ’e ’ia ’oa’oa.
’Ua ’ite Rebeka ē, ’ua tae i te taime nō Isaaka ’ia hōro’a i te ha’amaita’ira’a nō te ti’ara’a matahiapo.
’Ua ani Rebeka ia Iakoba ’ia haru mai e piti ’ānimara, ’ia nehenehe iāna e tunu i te mā’a hou ’o Esau e ho’i mai ai. I reira Iakoba ’a fāri’i ai i te ha’amaita’ira’a.
’Ua ’ahuhia Iakoba mai ia Esau ’e ’ua hōpoi i te mā’a nā tōna metua tāne. ’Ua hōro’a Isaaka ia Iakoba i te ha’amaita’ira’a nō te ti’ara’a matahiapo. I te ho’ira’a mai ’o Esau, ’ua riri roa ’oia ia Iakoba. Terā rā, ’ua haere te ti’ara’a matahiapo ia Iakoba nō te mea ’ua ha’apa’o ’oia i te mau fa’auera’a a te Fatu ’e ’o Esau ’aita.