« Debora te peropheta vahine », Te mau ’ā’amu o te Faufa’a Tahito (2022)
« Debora te peropheta vahine », Te mau ’ā’amu o te Faufa’a Tahito
Debora te peropheta vahine
Hō’ē ti’a fa’atere tei tauturu ia ’Īserā’ela ’ia ti’aturi i te Fatu
E peropheta vahine ’o Debora, e ti’a fa’atere ha’apa’o maita’i nō ’Īserā’ela tei fa’auruhia e te Fatu. ’Ua fa’aea tōna mau ta’ata i te ha’apa’o i te mau fa’auera’a a te Fatu, ’e ’ua fa’atere te ’āti Kana’ana ia rātou. I muri a’e e piti ’ahuru matahiti, ’ua ha’amata te ’āti ’Īserā’ela e pure nō te tauturu a te Fatu.
’Ua fa’aro’o te Fatu i tā rātou mau pure. ’Ua parau ’oia ia Debora ’ia ha’aputuputu i te hō’ē nu’u ’Īserā’ela nō te ’aro i te ’āti Kana’ana.
E rave rahi fa’ehau ’e mau pere’o’o pua’ahorofenua tō te nu’u Kana’ana. ’Ua ha’amata’u te reira i te nu’u ’o ’Īserā’ela, ’eiaha rā ia Debora. ’Ua ’ite ’oia e tauturu mai te Fatu ia rātou.
’O Baraka te fa’atere nō te nu’u ’Īserā’ela. ’Aita ’oia i hina’aro i te ’aro. ’Ua feruri rā ’oia ē, mai te mea e haere Debora nā muri i te nu’u, e pāruru te Fatu ia rātou. ’Ua fāri’i Debora e haere. ’Ua tohu ’oia ē, nā te hō’ē vahine e ha’apau ia Sisera, te fa’atere nō te nu’u ’o Kana’ana.
’Ua putuputu te nu’u o te ’āti ’Īserā’ela i ni’a i te hō’ē mou’a, ’e ’ua putuputu te ’āti Kana’ana i roto i te ’āfa’a. ’Ua parau Debora ia Baraka e haere i raro i te mou’a. ’Ua fafau ’oia ē, e pārahi mai te Fatu i piha’i iho ia rātou.
’Ua tu’u mai te Fatu i te ua, ’e ’ua hōpoi ’ē te pape i te mau pere’o’o pua’ahorofenua o te ’āti Kana’ana E rave rahi mau ’āti Kana’ana tei paremo i roto i te ’ānāvai, ’ua horo ’ē atu rā Sisera.
Te mau Tāvana 4:15, 17 ; 5:4–5, 19–22
Tē ora ra te hō’ē vahine ’o Iaela te i’oa i roto i te hō’ē fare auta’a i pīha’i iho noa mai. ’Ua ’ite atu ’oia ia Sisera i te horora’a ’e ’ua parau atu iāna ’ia tāpuni i roto i tōna fare auta’a. ’Ua ’ite Iaela ē, ’o ’oia te fa’atere nō te nu’u Kana’ana ’e ’ua taparahi pohe iāna, ’ia ’ore ’oia e ha’apēpē e rave rahi atu ā ta’ata.
’Ua tupu te parau tohu a Debora. ’Ua pohe ’o Sisera i te hō’ē ’aito vahine. ’Ua hīmene Debora i te hō’ē hīmene nō te tauturu i te āti ’Īserā’ela ’ia ha’amana’o e mea nāhea tō te Fatu fa’aorara’a ia rātou. ’Ua ha’apa’o te ’āti ’Īserā’ela i te mau fa’auera’a ’e ’ua ora i roto i te hau e 40 matahiti te maoro.