« Mose i ni’a i te mou’a Sinai », Te mau ’ā’amu o te Faufa’a Tahito (2022)
« Mose i ni’a i te mou’a Sinai », Te mau ’ā’amu o te Faufa’a Tahito
Exodo 19–20 ;24 ; 31–34 ; Deuteronomi 4–7
Mose i ni’a i te mou’a Sinai
Tauturu i te mau ta’ata ’ia ha’amana’o i te Fatu
’Ua rātere ’o Mose ’e te ’āti ’Īserā’ela nā roto i te mēdēbara. ’Ua haere mai rātou i te hō’ē mou’a tei pi’ihia te mou’a Sinai.
’Ua pa’i’uma ’o Mose i ni’a i te mou’a nō te paraparau i te Fatu. ’Ua parau te Fatu ia Mose ē ’ua hina’aro ’oia e paraparau i te ’āti ’Īserā’ela i te mata ’e te mata.
’Ua haere mai te ’āti ’Īserā’ela i raro i te mou’a Sinai, ’e ’ua pou mai te Fatu nā roto i te ata au auahi ma te hā’ati i te mou’a. Tei roto te Fatu i te ata. ’Ua paraparau ’oia i te ’āti ’Īserā’ela ’e ’ua hōro’a ia rātou i te mau fa’auera’a. ’Ua ’āueue te mou’a ’a paraparau ai ’oia ra.
Exodo 19:16–19 ; 20:1–17 ; Deuteronomi 4:12–13, 33 ; 5:4–5
’Ua mata’u te ’āti ’Īsera’ela. ’Ua ani rātou ia Mose ’ia paraparau i te Fatu ’ia ti’a ia Mose ’ia parau ia rātou e aha tā te Fatu i hina’aro.
’Ua rave Mose ia Aarona ’e e 70 peresibutero nō ’Īserā’ela i ni’a i te mou’a ’ia fāri’i rātou e rave rahi atu ā ha’api’ira’a nā te Fatu. ’Ua fā mai te Fatu ia rātou.
I muri mai ’ua parau te Fatu ia Mose ē ’ia vaiiho atu i te mau peresibutero ’e ’ia pa’i’uma ’oia i ni’a a’e i te mou’a. ’Ua ha’apa’o Mose. ’Ua fa’a’ohipa te Fatu i tōna manimani rima nō te pāpa’i i tāna ture ’e tāna mau fa’auera’a i ni’a i te mau papa ’ōfa’i. E 40 mahana tō te Fatu ha’api’ira’a ia Mose e rave rahi mau mea.
’A mau noa ai Mose i ni’a i te mou’a Sinai ra, ’ua fiu roa te nūna’a o ’Īserā’ela i te tīa’ira’a iāna. ’Ua parau rātou ia Aarona ’ia hāmani i te mau ti’i nā rātou nō te ha’amori, mai tā rātou i fana’o i ’Aiphiti. ’Ua ha’aputuputu Aarona i te tā’āto’ara’a o tā rātou ’auro ’e ’ua hāmani i te hō’ē ti’i kāfa.
’Ua ha’amori te ’āti ’Īserā’ela i te kāfa ’auro ’e ’ua pūpū i te mau tusia. ’Ua parau rātou nā te kāfa ’auro, ’eiaha rā te Fatu, i fa’ati’amā ia rātou mai ’Aiphiti mai.
’Ua ’ite te Fatu ē tē ha’amori ra te ’āti ’Īserā’ela i te hō’ē ’īdolo ’e tē ha’amo’e nei iāna. ’Ua fa’aue ’oia ia Mose ’ia ho’i i muri ’e ’ia parau i te nūna’a ’ia tātarahapa.
’Ua pou mai Mose mai ni’a mai i te mou’a Sinai ’e ’ua ’ite i te ’āti ’Īserā’ela i te ha’amorira’a i te kāfa ’auro. ’Ua riri roa ’oia. ’Aita te nūna’a i ineine nō te ha’apa’o i te ture ’e te mau fa’auera’a tā te Fatu i pāpa’i. ’Ua vāvahi Mose i te mau pāpā’a ’ōfa’i ’e ’ua vāvahi i te kāfa ’auro. ’Ua tauturu ’oia i te ’āti ’Īserā’ela ’ia tātarahapa ’e ’ia ha’amana’o i tō rātou Atua mau.
’Ua ani Mose i te Fatu ’ia fa’a’orehia te hapa a te ’āti ’Īserā’ela ’e ’ia rave fa’ahou i te mau fafaura’a ’e ’o rātou. ’Ua fafau Mose e arata’i ’e e ha’api’i ia rātou.
’Ua fa’aue te Fatu ia Mose ē ’ia hāmani fa’ahou ’oia i te mau papa ’ōfa’i ’āpī ’e ’ia ho’i i ni’a i te mou’a Sinai. ’Ua rave te Fatu i te hō’ē fafaura’a ’āpī i te ’āti ’Īserā’ela ’e ’ua hōro’a ia rātou i tāna nā fa’auera’a ’ahuru.