Deuteronomi 10 ; 31 ; 34 ; Iosua 1 ; 3–6 ; 10–11 ; 21 ; 24

Iosua te peropheta

Te hi’opo’ara’a hope’a hou ’a tomo atu ai i roto i te fenua i fafauhia ra

’Ua pi’i te Fatu ia Iosua ’ei peropheta ’āpī i muri a’e i te ’āfa’ira’ahia te peropheta Mose i ni’a i te ra’i ra. ’A pūhapa ai te ’āti ’Īserā’ela i pīha’i iho i te ’ānāvai nō Ioridana, ’ua parau te Fatu ē ’ua tae te taime nō rātou nō te tomo i roto i te fenua i fafauhia ra.

Deuteronomi 34:1–9 ; Iosua 1:1–4 ; Alama 45:19

Tei Kanaana te fenua i fafauhia ra, i reira tē ora rā te feiā ’ī’ino. ’Ua parau te Fatu ia Iosua ’ia fa’a’eta’eta iāna ’e ’ia itoito roa. Nā roto i te tauturu a te Fatu, e upo’oti’a te ’āti ’Īserā’ela i ni’a i te fenua Kanaana.

Iosua 1:1–9

’Ua ha’aputuputu Iosua i te nu’u. ’Ua parau te Fatu ia rātou ’ia ’āfa’i i te papa ’ōfa’i o nā ture hō’ē ’ahuru, ’e te tahi atu ā mau pāpa’ira’a mo’a. ’Ua amo te mau tahu’a i teie mau tao’a mo’a i roto i te ’āfata tei pi’ihia te āruna faufa’a. I muri mai ’ua fa’aineine te nu’u ’ia tere atu i te tahi pae o te ’ānāvai nō Ioridana. E mea hōhonu te ’ānāvai, ’e te ’ōpape pūai.

Deuteronomi 10:5 ; 31:25–26 ; Iosua 1:10–11 ; 3:1–11

’Ua fafau Iosua i te ’āti ’Īserā’ela ē e tauturu te Fatu ia rātou ’ia haere nā roto i te ’ānāvai.

Iosua 3:10–13

’Ua ani ’o Iosua e 12 tahu’a nō te amo i te āruna faufa’a ’e ’ia haere i roto i te pape. I te haerera’a te mau tahu’a i roto i te ’ānāvai, ’ua fa’ata’a-ē-hia te pape.

Iosua 3:12–17

’Ua tere atu te ’āti ’Īserā’ela nā roto i te ’ānāvai tei pāpāmarōhia. ’Ua parau ’o Iosua i nā ti’a tino 12 o te ’āti ’Īserā’ela ē ’ia rave rātou 12 ’ōfa’i i roto i te ’ānāvai marō. ’Ua ’āpapa ’oia i te mau ’ōfa’i nō te fa’aha’amana’o i te ’āti ’Īserā’ela i te semeio tā te Fatu i rave i taua mahana ra.

Iosua 3:17 ; 4:1–24

’Ua arata’i Iosua i te nu’u ’āti ’Īserā’ela i te fenua nō Kanaana. ’Ua tae atu rātou i te hō’ē ’oire tei pi’ihia ’o Ieriko. E mea pūai roa te ’oire, ’e e mau patu teitei roa. ’Ua parau te Fatu ia Iosua e nāhea ’oia ’ia upo’oti’a i ni’a ia Ieriko. ’Ua parau ’oia e porotē ha’ati te ’āti ’Īserā’ela ia Ieriko i te mau mahana ato’a, e ono mahana te maoro. ’Ua ha’apa’o ’o Iosua i tā te Fatu i parau.

Iosua 5:13–15 ; 6:1–5

’Ua parau Iosua i te mau tahu’a ’ia amo i te āruna faufa’a i mua i te ’āti ’Īserā’ela. I te mau mahana ato’a e porotē ha’a’ati te nu’u ia Ieriko, ’e e hitu tahu’a tei fa’a’oto i tā rātou mau pū. E fa’aea māmū noa te tahi atu mau ’āti ’Īserā’ela.

Iosua 6:6–14

I te hitura’a o te mahana, ’ua porotē ha’a’ati te nu’u ia Ieriko e hitu ā taime. ’A fa’a’oto ai te mau tahu’a i tā rātou mau pū, ’ua parau Iosua i te ’āti ’Īserā’ela ’ia tūtuō. I te reira taime, ’ua topa a’era te mau patu o Ieriko i raro i te repo, ’e ’ua haru mai ra te nu’u a Iosua i te ’oire.

Iosua 6:15–16, 20

’Ua tauturu te Fatu i te ’āti ’Īserā’ela, mai tāna i fafau mai. ’Ua tāmau noa te nu’u a Iosua i te upo’oti’a i ni’a i te fenua Kanaana, ’e ’ua ha’amata te ’āti ’Īserā’ela i te ora i reira. ’Ua fa’aha’amana’o ’o Iosua ia rātou i te mau temeio ’e te mau fafaura’a a te Fatu. ’Ua ani ’oia i te ’āti ’Īserā’ela ’ia mā’iti i te tāvini i te Fatu.

Iosua 10:42 ; 11:23 ; 21:43–45 ; 24:15