« Te nu’u a Gideona », Te mau ’ā’amu o te Faufa’a Tahito (2022)
« Te nu’u a Gideona », Te mau ’ā’amu o te Faufa’a Tahito
Te nu’u a Gideona
Ti’aturi i te Fatu i roto i te tama’i
’Ua ha’amaita’ihia te mau ta’ata o ’Īserā’ela e rave rahi matahiti te maoro. Tera rā ’ua mā’iti rātou ’ia ha’apa’o ’ore i te parau a te Fatu. Nō te tauturu ia rātou ’ia ha’amana’o iāna, ’ua vaiiho te Fatu i tō rātou mau ’enemi te mau ’āti Midiana ’ia rave i tā rātou mā’a ’e tā rātou mau ’ānimara. ’Ua pohe te mau ’āti ’Īserā’ela i te po’ia, nō reira ’ua ha’amana’o rātou i te Fatu ’e ’ua pure rātou iāna nō te ani i te tauturu.
Nō roto mai Gideona i te hō’ē ’utuāfare veve. ’Ua tono te Fatu i te hō’ē melahi nō te pi’i iāna ’ia fa’aora ia ’Īserā’ela. ’Ua uiui ’o Gideona nō te aha te Fatu i mā’iti ai iāna.
’Ua parau te Fatu ia Gideona ’ia ha’amou i te mau vāhi i reira te ’āti ’Īserā’ela e ha’amori nei i te mau atua ha’avare. I te ha’apa’ora’a Gideona i taua parau ra, ’ua riri mai te mau ta’ata.
’Ua hina’aro te ’āti ’Īserā’ela e taparahi pohe ia Gideona. ’Ua noa’a i te metua tāne o Gideona ’ia paraparau i te ta’ata ’eiaha rātou e ha’amāuiui iāna. ’Ua pāruruhia ’o Gideona.
’Aita ’o Gideona i mana’o ē e nehenehe iāna e fa’ati’amā ia ’Īserā’ela. ’Ua hau i te 135 000 fa’ehau i roto i te nu’u a te ’āti Midiana. ’Ua hōro’a rā te Fatu i te pa’ari ’e te pūai ia Gideona.
’Ua hina’aro te Fatu ’ia ’ite te ’āti ’Īserā’ela ē e nehenehe rātou e upo’oti’a nā roto i tōna pūai, ’eiaha rā i tō rātou. Noa atu e 32 000 fa’ehau ana’e tā ’Īserā’ela, ’ua ani te Fatu ia Gideona ’ia fa’aho’i i te mau fa’ehau tei mata’u i tō rātou ti’ahapa. I muri mai, e 22 000 ta’ata tei ho’i i tō rātou ti’ahapa, ’e ’ua toe noa mai 10 000 fa’ehau ’āti ’Īserā’ela.
’Ua parau te Fatu ē ’ua rahi roa te nā 10 000 fa’ehau. ’Ua parau ’oia ia Gideona ’ia ’āfa’i i te nu’u i raro i te pape. ’O rātou ’o tē miti i te pape ’e tō rātou vaha e fa’aho’ihia ïa i te fare. Te feiā ’o tei fa’a’ohipa i tō rātou rima nō te inu i te pape e fa’aea mai ïa rātou. I teienei e 300 ana’e ta’ata tei toe mai.
I te hope’a, ’ua ineine te ’āti ’Īserā’ela nō te ’aro. ’Ua fa’a’ite te Fatu ia Gideona e nāhea ’oia i te ’aro i te ’āti Midiana. ’Ua parau Gideona i tōna nu’u ’ia fa’a’ohipa i te mau pū ’e te mau lāmepa nō te fa’ari’ari’a ia rātou. Nō te rapura’a rahi tā te māniania ’e te mau mōrī i fa’atupu i ni’a i te mau ’āti Midiana ’ua ha’amata rātou i te ’aro te tahi i te tahi. I muri iho ’ua tūtuō rātou ’e ’ua horo ’ē atu.
Nō te mea ’ua ti’aturi Gideona i te Fatu, ’ua upo’oti’a nā faehau ’āti ’Īserā’ela e 300 i ni’a iho i te nu’u rahi ’āti Midiana. ’Ua fa’aora te Fatu i te nūna’a o ’Īserā’ela.