Genese 30 ; 37

Te mau moemoeā fa’auruhia a Iosepha

Te fifi o te hō’ē ’utuāfare ’ia here te tahi i te tahi

E rave rahi matahiti tō Rahera raua ’o Iakoba i te purera’a ia fānauhia mai i te hō’ē tamaiti. ’Ua pāhono mai te Fatu i tā rāua mau pure i te fānaura’ahia ’o Iosepha. E tamaiti here-roa-hia ’o Iosepha nā Iakoba, ’e ’ua hōro’a ’oia i te hō’ē perēue ta’a ’ē nō Iosepha. ’Ua fe’i’i nā tamaiti pa’ari e 10 a Iakoba ra.

Genese 30:22–24 ; 37:1–4

I te 17ra’a o tōna matahiti, ’ua fa’auruhia ’o Iosepha i te tahi moemoeā ē, tē ru’uru’u ra ’oia i te ruru sītona i roto i te fa’a’apu ’e tōna ra mau taea’e. ’Ua ti’a mai ra te ruru sītona a Iosepha. ’E ’ua tāhopu mai te mau ruru sītona a tōna mau taea’e i raro i tā Iosepha ra. I tō Iosepha paraura’a i tōna mau taea’e i taua moemoeā ra, rahi atu ra tō rātou riri iāna ra.

Genese 37:2, 5–8

I muri mai, ’ua fāri’i fa’ahou ā ’o Iosepha i te tahi atu ā moemoeā fa’auruhia. ’E i roto i teie moemoeā, ’ua tāhopu te mahana, te marama, ’e na feti’a tino 11 i mua iāna. ’Ua fa’ati’a ’o Iosepha i tōna utuāfare i teie moemoeā. Nā teie moemoeā i fa’a’ite mai ē e riro ’o Iosepha ’ei fa’atere i ni’a i te ’utuāfare. ’Ua ’ū’ana roa te riri o te mau taea’e o Iosepha iāna ra. ’Aita rātou i au i tāna mau moemoeā.

Genese 37:9–11

I te hō’ē mahana, tei te ātea ’ē i te fare te mau taea’e o Iosepha nō te fa’a’amu i te māmoe. ’Ua tono Iakoba ia Iosepha ’ia haere e hi’o ia rātou.

Genese 37:12–19

’Ua hina’aro te tahi o te mau taea’e o Iosepha e taparahi pohe iāna. ’Ua rave rātou i te perēue o Iosepha ’e ’ua huri iāna i roto i te hō’ē ’āpo’o.

Genese 37:20–24

’A vai noa ai ’o Iosepha i roto i te ’āpo’o, ’ua ’ite tōna mau taea’e i te mau rātere e haere ra i ’Aiphiti. ’Ua fa’aoti te mau taea’e e ho’o ia Iosepha ’ei tītī i te feiā rātere, e 20 tuha’a moni.

Genese 37:25–28

I muri iho, ’ua tu’u te mau taea’e o Iosepha i te toto o te pua’aniho i ni’a i tōna perēue. ’Ua haere te mau taea’e i tō rātou metua tāne ia Iakoba, ’e ’ua fa’a’ite iāna i te perēue. ’Ua ha’avare rātou ia Iakoba ’e ’ua parau atu iāna ē ’ua taparahi pohe te mau ’ānimara taehae ia Iosepha.

Genese 37:31–33

’Ua ’oto ’o Iakoba nō te mea ’ua mana’o ’oia ē ’ua pohe ’o Iosepha.

Genese 37:32–35

Terā rā tē ora noa ra ’o Iosepha. ’Ua ātea roa ’oia i tōna utuafare, ’e tē ora ra ’oia ’ei tītī i ’Aiphiti.

Genese 37:36