« ’Ua fa’aora Elisaia ia Naamana », Te mau ’ā’amu o te Faufa’a Tahito (2022)
« ’Ua fa’aora Elisaia ia Naamana », Te mau ’ā’amu o te Faufa’a Tahito
’Ua fa’aora Elisaia ia Naamana
Nāhea te hō’ē temeio rahi i te pe’era’a i te fa’aro’o ’ōhie
I te ātea roa i Arama, tē ora ra te hō’ē ta’ata tei pi’ihia ’o Naamana. E tāpena rahi ’oia i roto i te nu’u nō Arama. Terā rā, e ma’i ’iri māuiui tō Naamana tei pi’ihia e rēpera.
E tamāhine ’āti ’Īserā’ela te tāvini o te vahine a Naamana. E fa’aro’o i te Fatu tō teie tamāhine. ’Ua parau oia ē, mai te mea e nehenehe tā Naamana e haere e farerei i te peropheta Elisaia, e ora ïa Naamana i tōna ma’i.
’Ua rātere ātea Naamana nō te ’imi mai ia Elisaia. ’Ua mana’o Naamana, e fa’aorahia ’oia nā roto i te hō’ē temeio rahi.
’Ua haere Naamana i te fare ’o Elisaia ’e tōna mau tāvini, mau pua’ahorofenua, ’e te mau pere’o’o pua’ahorofenua. ’Ua tono Elisaia i tōna tāvini nō te hōro’a ia Naamana ra te mau arata’ira’a a te Fatu. E fa’aora te Fatu ia Naamana mai te mea e horoi ’oia iāna iho i roto i te ’ānāvai pape nō Ioridana e hitu taime.
’Ua riri Naamana nō te mea ’ua hina’aro ’oia ’ia haere mai te peropheta a te Fatu i rāpae ’e ’ia fa’aora oi’oi iāna. ’Ua amuamu Naamana ē, e ’ere te ānāvai nō Ioridana i te mea maita’i mai te mau ’ānāvai rarahi nō Arama.
’Ua ui rā te mau tāvini ’o Naamana nō te aha Naamana i ’ore ai e rave i te hō’ē ohipa ’ōhie roa. Noa atu ē, e ’ere te reira e aura’a nō Naamana, ’ua ani te peropheta a te Fatu iāna ’ia rave i te reira.
’Ua fa’aea Naamana i te te’ote’o ’e ’ua fa’aro’o i tōna mau tāvini. ’Ua horoi ’oia iāna iho i roto i te ’ānāvai pape nō Ioridana e hitu taime. I muri iho, ’ua fa’aora Iehova ia Naamana, mai tā Elisaia i parau. ’Ua ’ite Naamana ē, e peropheta o Elisaia ’e tē vai mau ra te Fatu.