Genese 1–2 ; Mose 1–3 ; Aberahama 3–5

Te poietera’ahia te fenua nei

Hō’ē ’utuāfare nehenehe mau nō te mau tamari’i a te Metua i te Ao ra

’Ua vauvau mai te Atua tō tātou Metua i te Ao ra i te fa’anahora’a nō te fa’aorara’a i te ra’i. ’Ua tuō pā’āto’a tātou nō te ’oa’oa ! E ti’a ia tātou e haere mai i te fenua nei nō te fāri’i i te hō’ē tino tāhuti. I ni’a i te fenua nei, e ha’api’i mai tātou i te pe’e i te Tamaiti a te Atua, te Fatu ra ’o Iesu Mesia. ’Ua hāmani te Fatu i te fenua nei ma te pe’e i te mau arata’ira’a a te Atua.

Genese 1:1 ; Ioba 38:4–7 ; Mose 1:32–33 ; 2:1 ; Aberahama 3:22–27

I te mahana mātāmua, ’ua fa’ata’a mai te Fatu i te māramarama nā roto mai i te pōiri. ’Ua pi’i ’oia i te māramarama e ao ’e te pōiri e ru’i.

Genese 1:3–5 ; Mose 2:3–5 ; Aberahama 4:1–5

I te piti o te mahana, ’ua fa’ata’a ’oia i te pape i rotopū i te mau ata i ni’a i te ra’i ’e te mau moana i ni’a i te fenua.

Genese 1:6–8 ; Mose 2:6–8 ; Aberahama 4:6–8

I te toru o te mahana, ’ua ha’apu’e te Fatu i te mau moana rahi ’e te repo marō. ’Ua pi’i ’oia i te mau pape e tai ’e te repo marō e fenua. ’Ua fa’anehenehe ’oia i te fenua i te mau tiare, te mau hotu, te mau rā’au tanu ’e te mau tumu rā’au.

Genese 1:9–13 ; Mose 2:9–13 ; Aberahama 4:9–13

I te maha o te mahana, ’ua poiete ’oia i te mahana ’ia ’ana’ana i te roara’a o te ao. I muri iho, ’ua poiete ’oia i te marama ’e te mau feti’a ’ia ’ana’ana i te pō.

Genese 1:14–19 ; Mose 2:14–19 ; Aberahama 4:14–19

I te pae o te mahana, ’ua hāmani te Fatu i te mau i’a i roto i te moana ’e te mau manu i roto i te ra’i. ’Ua ha’amaita’i ’oia i te mau mea ora ato’a ’ia fa’arahihia ’e ’ua ha’amaita’i i te mau i’a ’ia fa’a’īhia te mau pape.

Genese 1:20–23 ; Mose 2:20–23 ; Aberahama 4:20–23

I te ono o te mahana, ’ua poiete ’oia i te mau ’ānimara i ni’a i te fenua, te tahi e haere ’avae ’e te tahi mea ne’e.

Genese 1:24–25 ; Mose 2:24–25 ; Aberahama 4:24–25

’Ua pou mai te Metua i te Ao ra ’e te Fatu i te fenua nei i te ono o te mahana. ’Ua poietehia te tāne ’e te vahine i te hōho’a o te Atua. ’Ua parau te Metua i te Ao ra ia rāua ’ia ’atu’atu te tahi i te tahi ’e ’ia fānau i te mau tamari’i. ’Ua ti’aturi-ato’a-hia i te tāne ’e te vahine nō te aupura’a i te fenua ’e i te mau ’ānimara.

Genese 1:26–27 ; Mose 2:26–27 ; Aberahama 4:26–31 ; 5:7–8

’Ua ’oa’oa te Metua i te Ao ra i te mau mea ato’a tā rāua i poiete. I te hitu o te mahana, ’ua fa’afa’aea rāua i tā rāua mau ’ohipa ato’a. E mea nehenehe te fenua ’e ’ua ’ī i te mea ora.

Genese 2:1–3 ; Mose 3 :1–3 ; Aberahama 5:1–3