Paghulagway sa walay sulod nga lubnganan ni Maryna Kriuchenko

Abril 11–17

Pasko sa Pagkabanhaw

“Gilamoy Niya ang Kamatayon Hangtud sa Walay Katapusan”

Samtang ikaw nagbasa mahitungod ug namalandong sa Pag-ula sa Manluluwas niini nga semana, hunahunaa ang pagrekord diha sa imong journal o sa luna nga gihatag dinhi niini nga latid sa imong mga hunahuna ug mga pagbati mahitungod sa Iyang sakripisyo.

Irekord ang Imong mga Impresyon

Ang kinabuhi ni Jesukristo “mao ang labing importante sa tanang kasaysayan sa tawo” (“Ang Buhi nga Kristo: Ang Pagpamatuod sa mga Apostoles,” ChurchofJesusChrist.org). Unsa ang kahulugan niana? Sa usa ka bahin, kini sa tinuod nagpasabut nga ang kinabuhi sa Manluluwas nag-impluwensya sa mahangturon nga padulngan sa matag tawo kinsa sukad nabuhi o mabuhi. Ikaw mahimo usab nga moingon nga ang kinabuhi ug misyon ni Jesukristo, nagtapos sa Iyang Pagkabanhaw nianang unang Dominggo sa Pasko sa Pagkabanhaw, nagkonektar sa tanang mga tawo sa Dios sa tibuok nga kasaysayan: Kadtong kinsa natawo sa wala pa si Kristo naglantaw Kaniya sa unahan uban sa hugot nga pagtuo (tan-awa sa Jacob 4:4), ug kadtong natawo human molingi diha Kaniya uban sa hugot nga pagtuo. Samtang kita nagbasa sa mga asoy ug mga panagna diha sa Daang Tugon, dili gayud nato makita ang ngalan ni Jesukristo, apan atong makita ang kalig-unan sa hugot nga pagtuo sa karaang mga tumutuo ug ang paghandom alang sa ilang Mesiyas ug Manunubos. Busa kita kinsa gidapit sa paghinumdom Kaniya mobati og koneksyon ngadto niadtong kinsa naglantaw Kaniya sa unahan. Kay sa tinuod gipas-an ni Jesukristo “ang kasal-anan natong tanan” (Isaias 53:6), ug “diha ni Kristo ang tanan mangabuhi” (1 Mga Taga-Corinto 15:22).

Mga Ideya alang sa Personal nga Pagtuon sa Kasulatan

Ang Daang Tugon nagpamatuod sa maulaong sakripisyo sa Manluluwas.

Daghang mga tudling sa Daang Tugon nagpasabut ngadto sa pangalagad ug maulaong sakripisyo sa Manluluwas. Ang lista sa ubos naglista sa pipila niini nga mga tudling. Samtang ikaw nagbasa niini nga mga bersikulo, unsa nga mga impresyon ang moabut kanimo mahitungod sa Manluluwas?

Daang Tugon	Bag-ong Tugon
Daang Tugon Zacarias 9:9	Bag-ong Tugon Mateo 21:1–11
Daang Tugon Zacarias 11:12–13	Bag-ong Tugon Mateo 26:14–16
Daang Tugon Isaias 53:4	Bag-ong Tugon Mateo 8:16–17; 26:36–39
Daang Tugon Isaias 53:7	Bag-ong Tugon Marcos 14:60–61
Daang Tugon Salmo 22:16	Bag-ong Tugon Juan 19:17–18; 20:25–27
Daang Tugon Salmo 22:18	Bag-ong Tugon Mateo 27:35
Daang Tugon Salmo 69:21	Bag-ong Tugon Mateo 27:34, 48
Daang Tugon Salmo 118:22	Bag-ong Tugon Mateo 21:42
Daang Tugon Isaias 53:9, 12	Bag-ong Tugon Mateo 27:57–60; Marcos 15:27–28
Daang Tugon Isaias 25:8	Bag-ong Tugon Marcos 16:1-6; Lucas 24:6
Daang Tugon Daniel 12:2	Bag-ong Tugon Mateo 27:52–53

Ang mga panagna ug mga pagtulun-an mahitungod sa Manluluwas gani mas daghan pa ug tataw diha sa Basahon ni Mormon. Hunahunaa giunsa paglig-on ang imong hugot nga pagtuo pinaagi niini nga mga tudling nga sama niini: 1 Nephi 11:31–33; 2 Nephi 25:13; Mosiah 3:2–11.

Ako makakaplag og kalinaw ug hingpit nga kalipay pinaagi sa Pag-ula sa Manluluwas.

Sa tibuok panahon, si Jesukristo, pinaagi sa Iyang maulaong sakripisyo, nagtanyag og kalinaw ug hingpit nga kalipay ngadto sa tanan kinsa moduol ngadto Kaniya (tan-awa sa Moises 5:9–12). Hunahunaa ang pagtuon sa mosunod nga mga kasulatan nga nagpamatuod sa kalinaw ug hingpit nga kalipay nga Siya nagtanyag, ug samtang ikaw nagbuhat niini, paghunahuna mahitungod kon unsaon nimo nga makadawat sa kalinaw ug sa hingpit nga kalipay nga Iyang gidala: Salmo 16:8–11; 30:2–5; Isaias 12; 25:8–9; 40:28–31; Juan 14:27; 16:33; Alma 26:11–22.

Tan-awa usab sa Dallin H. Oaks, “Nalig-on Pinaagi sa Pag-ula ni Jesukristo,” Liahona, Nob. 2015, 61–64; Sharon Eubank, “Kristo: Ang Kahayag nga Nagdan-ag Taliwala sa Kangitngit,” Liahona, Mayo 2019, 73–76; “Ako Nagpabilin nga Natingala,” Mga Himno, nu.114.

Grey Day in Golgotha [Masulub-ong Adlaw sa Golgota], ni J. Kirk Richards

Pinaagi sa Iyang Pag-ula, si Jesukristo adunay gahum sa pagtabang kanako sa pagbuntog sa sala, kamatayon, mga pagsulay, ug mga kahuyang.

Sa tibuok nga mga kasulatan, ang mga propeta nagpamatuod sa gahum ni Jesukristo sa pagluwas kanato gikan sa sala ug sa kamatayon ug sa pagtabang kanato sa pagbuntog sa atong mga pagsulay ug mga kahuyang. Giunsa ni Kristo paghimo og kalainan sa imong kinabuhi? Nganong importante Siya nganha kanimo? Pamalandonga kini nga mga pangutana samtang ikaw nagbasa niini nga mga bersikulo, ug irekord ang imong mga hunahuna ug mga pagbati mahitungod sa Manululuwas:

• Isaias 61:1-3

• Ezequiel 36:26–28

• Mateo 11:28–30

• Lucas 1:46–55

• Mga Taga-Roma 8:35–39

• Alma 7:10–13

• Alma 11:42–45

• Alma 58:11

• Moroni 10:32–33

• Doktrina ug mga Pakigsaad 19:15–19

• Moises 5:9–12

Tan-awa usab sa Walter F. González, “Ang Hikap sa Manluluwas,” Liahona, Nob. 2019, 90–92.

Mga Ideya alang sa Pamilya nga Pagtuon sa Kasulatan ug Family Home Evening

Exodo 12:1–28.Samtang kamo nagsaulog sa Pasko sa Pagkabanhaw, ang imong pamilya makaribyu unsa ang inyong nakat-unan mahitungod sa Pagpalabay sayo pa niini nga buwan. Nganong kini makahuluganon nga ang sakripisyo sa Manluluwas nahitabo sa samang panahon sa Pagpalabay?

Alang sa summary sa unsay nahitabo sulod sa katapusang semana sa kinabuhi sa Manluluwas, tan-awa sa “Holy Week” sa ComeuntoChrist.org/2016/easter/easter-week.

Isaias 53.Ang pagbasa sa mga panagna mahitungod ni Jesukristo sa Isaias 53 makatabang sa mga sakop sa pamilya sa pagsabut sa maulaong sakripisyo sa Manluluwas. Hain nga mga bersikulo o mga hugpong sa mga pulong ang nakaplagan sa imong pamilya nga ilabi ka gamhanan? Hunahunaa ang pagpahigayon og pagpamatuod nga miting sa pamilya diin kamo makigbahin sa inyong personal nga mga pagpamatuod sa Pag-ula sa Manluluwas.

“Linain nga mga Saksi ni Kristo.”Ang Gospel Library app ug ang ChurchofJesusChrist.org adunay koleksyon sa mga video nga gitawag og “Linain nga mga Saksi ni Kristo,” diin ang matag miyembro sa Unang Kapangulohan ug ang Korum sa Napulog Duha ka mga Apostoles nakigbahin sa iyang pagsaksi ni Jesukristo. Tingali ang imong pamilya makatan-aw sa pipila niini nga mga video ug makasulti mahitungod sa unsay inyong nakat-unan mahitungod ni Jesukristo gikan sa Iyang pinili nga mga sulugoon. Isip usa ka pamilya, pagsulti mahitungod sa mga paagi nga kamo makigbahin sa inyong pagsaksi kabahin ni Kristo. Sama pananglit, mahimo kamong modapit og usa ka tawo sa pagsimba uban kaninyo sa simbahan niining Dominggo sa Pasko sa Pagkabanhaw.

Mga himno ug mga awit.Ang musika usa ka gamhanang paagi sa paghinumdom sa Manluluwas ug sa pagdapit sa Espiritu ngadto sa atong mga panimalay. Ang mga sakop sa pamilya makigbahin ug dungan nga manganta og mga himno o mga awit mahitungod sa Pasko sa Pagkabanhaw o mahitungod ni Jesukristo, sama sa “Kristo Nabanhaw Karon” (Mga Himno, nu. 119) o “Nabuhi ba Gayud Pag-usab si Jesus?” (Songbook sa mga Bata, 45). Sa pagpangita sa ubang mga himno o mga awit sa mga bata, pangitaa diha sa indeks sa mga hilisgutan sa Mga Himno ug Songbook sa mga Bata.

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga Awit: “Nabuhi ba Gayud Pag-Usab si Jesus?” Songbook sa mga Bata, 45.

Pagpalambo sa Atong Pagtudlo

Sunda ang ebanghelyo ni Jesukristo. “Aron mahimong Kristohanong magtutudlo [sa inyong panimalay], tingali ang labing importanting butang nga imong mabuhat mao ang … pagsunod sa ebanghelyo sa tibuok nimong kasingkasing. … Kini ang labing mahinungdanong paagi aron mahimong takus sa pagpakig-uban sa Espiritu Santo. Dili kinahanglan nga maghingpit ka, makugihon lang nga naningkamot—ug magtinguha sa kapasayloan pinaagi sa Pag-ula sa Manluluwas matag higayon nga ikaw nasayop” (Pagtudlo sumala sa Pamaagi sa Manluluwas, 13).

For This Purpose I Have Come [Tungod Niini nga Katuyoan Ako Mianhi], ni Yongsung Kim