The Cry of Jeremiah the Prophet [Ang Singgit ni Jeremias ang Propeta], gikan sa kinulit sa Eskwelahan sa Nazareno

Oktubre 17–23

Jeremias 30–33; 36; Lamentaciones 1; 3

“Kay Himoon Kong Kalipay ang Ilang Pagbalata”

Samtang nagrekord ka sa imong mga impresyon, paghunahuna mahitungod kon giunsa sa mga baroganan diha sa Jeremias ug Lamentaciones sa pakiglabot ngadto sa ubang mga butang nga imong nakat-onan diha sa Daang Tugon.

Irekord ang Imong mga Impresyon

Sa dihang ang Ginoo unang mitawag ni Jeremias nga mahimong usa ka propeta, Siya misulti kaniya sa iyang misyon “sa pagluka, ug sa paggun-ob” (Jeremias 1:10)––ug didto sa Jerusalem, dihay daghang mga pagkadaotan nga pagalukahon ug pagagun-ubon. Apan kini kabahin lamang sa misyon ni Jeremias––gitawag usab siya “sa pagtukod ug sa pagtanom”(Jeremias 1:10). Unsa ang matukod o matanom diha sa kamingawan sa mga guba nga gibiyaan sa pagsukol sa Israel? Pagkasusama, kon ang sala o kalisdanan nagbiya sa atong mga kinabuhi nga naguba, unsaon nato sa pagtukod og pagtanom pag-usab? Ang tubag makita diha sa “Sanga sa pagkamatarung” (Jeremias 33:15), ang gisaad nga Mesiyas. Ang Mesiyas nagdala og “usa ka bag-ong pakigsaad [tugon]” (Jeremias 31:31)––usa nga nagkinahanglan og labaw kay sa usa ka taphaw nga pasalig o pagpakita og debosyon. Ang Iyang balaod kinahanglan gayod nga “anaa sa [atong] sulod nga mga bahin,” nakasulat “sa [atong] mga kasingkasing.” Kana mao ang unsay tinuod nga gipasabot alang sa Ginoo nga “mahimong [atong] Dios” ug alang kanato nga “mahimong [Iyang] mga katawhan” (Jeremias 31:33). Kini usa ka tibuok kinabuhi nga proseso, ug kita sa gihapon naghimo og mga kasaypanan ug nakahimo sa pagbangutan matag karon og unya. Apan kon atong buhaton, aduna kita niini nga saad gikan sa Ginoo: “Kay himoon kong kalipay ang ilang pagbalata” (Jeremias 31:13).

Alang sa kinatibuk-ang pagsabut sa Lamentaciones, tan-awa sa “” Giya ngadto sa mga Kasulatan (scriptures.ChurchofJesusChrist.org).

Mga Ideya alang sa Personal nga Pagtuon sa Kasulatan

Jeremias 30–31; 33

Dad-on sa Ginoo ang Israel paggawas sa pagkabihag ug sila pagapundukon.

Sa Jeremias 30–31; 33 ang Ginoo miila sa “pagminatay, ug ang mapait nga paghilak” (Jeremias 31:15) nga sination sa mga Israelita samtang sila padulong sa pagkabihag. Bisan pa niana, mitanyag Siya og mga pulong sa paghupay ug paglaum. Unsa nga mga hugpong sa mga pulong niini nga mga kapitulo sa imong hunahuna mohatag unta sa mga Israelita og paghupay ug paglaom? Unsa nga mga saad ang imong makaplagan gikan sa Ginoo ngadto sa Iyang mga katawhan? Sa unsang paagi kaha kini nga mga saad magamit kanimo karon?

Jeremias 31:31–34; 32:37–42

“Sila mahimong akong katawhan, ug ako mahimong ilang Dios.”

Bisan og ang mga Israelita wala motuman sa ilang pakigsaad ngadto sa Ginoo, gipanagna ni Jeremias nga ang Ginoo magbuhat pag-usab og usa ka “bag-o ug walay katap[o]san nga pakigsaad [tugon]” uban sa Iyang mga katawhan (Jeremias 31:31; 32:40). Ang bag-o ug walay kataposan nga pakigsaad mao “ang kahingpitan sa ebanghelyo ni Jesukristo [tan-awa sa Doktrina ug mga Pakigsaad 66:2]. Kini bag-o sa matag panahon nga kini ipadayag pag-usab human sa panahon sa pagbiya sa kamatuoran. Kini walay kataposan diha sa pagsabot nga kini mao ang pakigsaad sa Dios ug gipahimuslan sa matag dispensasyon [kapaigoan] sa ebanghelyo diin ang mga katawhan andam sa pagdawat niini” (Giya ngadto sa mga Kasulatan, “Bag-o ug Walay Katap[o]san nga Pakigsaad,” ).

Samtang ikaw magbasa sa Jeremias 31:31–34; 32:37–42, pamalandonga kon unsa ang gipasabot niini nganha kanimo nga mahimong kabahin sa mga tawo sa pakigsaad sa Dios. Sa unsa nga paagi kini nga mga bersikulo nag-apekto sa paagi nga ikaw nagtan-aw sa imong pakigsaad nga relasyon uban sa Dios? Unsa ang gipasabut sa pagbutang sa Iyang balaod nga nakasulat diha sa imong kasingkasing? (tan-awa sa Jeremias 31:33).

Tan-awa usab sa Jeremias 24:7; Mga Hebreohanon 8:6–12.

Ang mga kasulatan makadasig kanato sa paghinulsol ug pagbalik ngadto sa Ginoo.

Jeremias 36

Ang mga kasulatan adunay gahom sa pagpalayo kanako gikan sa daotan.

Gimandoan sa Ginoo si Jeremias sa pagrekord sa iyang mga panagna diha sa “usa ka linukot sa usa ka basahon,” o sa usa ka linukot nga papel, nagpasabot nga kon ang mga katawhan mamati niini nga mga panagna, kini mahimo nga … sila mobalik tagsatagsa kanila gikan sa da[o]tan niyang dalan, aron ako makapasaylo sa ilang pagkada[o]tan” (Jeremias 36:2–3). Samtang ikaw magbasa sa Jeremias 36, hunahunaa ang pagsulat kon giunsa sa mosunod nga mga tawo pagbati mahitungod niini nga mga panagna:

Ang Ginoo:

Jeremias:

Baruch:

Jehudi ug Hari Joacim:

Elnathan, Delaias, ug Gemarias:

Palandonga kon giunsa nimo pagbati mahitungod sa mga kasulatan ug ang ilang tahas diha sa imong kinabuhi. Giunsa niini pagtabang kanimo sa pagpalayo gikan sa daotan?

Tan-awa usab sa Julie B. Beck, “Ang Akong Kalag Nalipay sa mga Kasulatan,” Liahona, Mayo 2004, 107–9.

Lamentaciones 1; 3

Ang Ginoo makahupay sa kasubo nga kita nagsinati tungod sa sala.

Ang basahon sa Lamentaciones maoy usa ka katigoman sa mga balak nga gisulat human sa pagkalaglag sa Jerusalem ug sa templo niini. Ngano kaha kini importante nga kining mga pagminatay gipatunhay ug gilakip diha sa Daang Tugon? Hunahunaa unsa ang mga pasumbingay diha sa Lamentaciones 1 ug 3 pagtabang kanimo sa pagsabot mahitungod sa dakong kasubo nga gibati sa Israel. Unsa nga mga mensahe sa paglaom diha ni Kristo ang imong nakaplagan? (tan-awa ilabi na sa Lamentaciones 3:20–33; tan-awa usab sa Mateo 5:4; Santiago 4:8–10; Alma 36:17–20).

Mga Ideya alang sa Pamilya nga Pagtuon sa Kasulatan ug Home Evening

Jeremias 31:3.Giunsa sa Langitnong Amahan ug ni Jesukristo pagpakita sa Ilang “walay kataposang paghigugma” alang kanato? Ang pagpakita og mga hulagway sa mga butang nga gilalang ni Kristo alang kanato o gibuhat sa panahon sa Iyang mortal nga pangalagad makatabang sa imong pamilya sa pagbati sa Iyang “mahigugmaong kalooy.”

Jeremias 31:31–34; 32:38–41.Hunahunaa ang pagbuhat og usa ka lista sa mga butang dinhi niini nga mga bersikulo nga ang Ginoo nagsaad sa dihang kita naghimo og mga pakigsaad uban Kaniya. Unsa ang gitudlo niini nga mga bersikulo kanato mahitungod sa importansya sa atong mga pakigsaad?

Ang mga sakop sa pamilya makahimo usab sa pagsulat (o pagdrowing) diha sa papel nga mga kasingkasing og usa ka butang nga nagpakita kon unsa ang ilang gibati mahitungod sa Manluluwas. Unsa ang gipasabot sa pagbaton sa Iyang balaod nga nakasulat sa atong mga kasingkasing? (tan-awa sa Jeremias 31:33). Unsaon nato pagpakita sa Ginoo nga kita gustong mahimo nga Iyang mga katawhan?

Jeremias 36.Unsaon kaha nimo paggamit sa Jeremias 36 sa pagtabang sa imong pamilya sa pagkat-on mahitungod sa importansya sa mga kasulatan? (tan-awa, sama pananglit, sa mga bersikulo 1–6, 10, 23–24, 27–28, 32). Mahimo nimong hangyoon ang usa ka sakop sa pamilya sa pagbasa og usa ka bersikulo gikan niini nga kapitulo samtang laing sakop sa pamilya nagsulat niini, sama sa gibuhat ni Baruch alang ni Jeremias. Nganong mapasalamaton kita alang sa mga paningkamot sa mga katawhan sama ni Baruch, kinsa mipatunhay sa mga pulong sa mga propeta? Unsa ang atong mabuhat sa pagpakita sa Ginoo nga atong gimahal ang Iyang mga pulong diha sa mga kasulatan?

Lamentaciones 3:1–17, 21–25, 31–32.Isip usa ka pamilya, mahimong kamo maghisgot mahitungod kon giunsa sa mga pagbati nga gipahayag sa Lamentaciones 3:1–17 may kalabotan ngadto sa mga pagbati nga kita aduna kon kita makasala. Giunsa sa mga mensahe sa mga bersikulo 21–25, 31–32 pag-impluwensya sa atong mga kinabuhi?

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Gibati Ko ang Gugma sa Akong Manluluwas,” Songbook sa mga Bata, 42–43.

Pagpalambo sa Personal nga Pagtuon

Pagtinguha og pagpadayag. Samtang ikaw mamalandong sa tibuok adlaw, mahimong imong madawat ang dugang nga mga ideya ug mga panghunahuna mahitungod sa mga kasulatan nga imong gitun-an. Ayaw hunahunaa ang pagtuon sa ebanghelyo isip usa ka butang nga imong hatagan og panahon apan isip usa ka butang nga imong kanunay nga gihimo. (Tan-awa sa Pagtudlo sumala sa Pamaagi sa Manluluwas, 12.)

Jeremias Lamenting the Destruction of Jerusalem [Jeremias Nagbangutan sa Pagkalaglag sa Jerusalem], ni Rembrandt van Rijn