propeta nakigsulti ngadto sa mga kalalakin-an

Jeremias, ni Walter Rane

Oktubre 10–16

Jeremias 1–3; 7; 16–18; 20

“Sa Wala Pa Ikaw Buhata Nako diha sa Tiyan Naila Ko na Ikaw”

Si Elder David A. Bednar miingon: Usa sa mga paagi nga ako makadungog [sa Ginoo] mao ang diha sa mga kasulatan. Ang mga kasulatan mao ang girekord nang daan nga tingog sa Ginoo” (“‘Hear Him’ in Your Heart and in Your Mind,” ChurchofJesusChrist.org).

Irekord ang Imong mga Impresyon

Sa una, wala maghunahuna si Jeremias nga mahimo siya nga maayong propeta. “Ah, ako dili mahibalo nga mosulti,” siya misupak sa unang pagtawag sa Ginoo kaniya (Jeremias 1:6). Ang Ginoo mipasalig pag-usab kaniya “Ako nagbutang sa akong mga pulong diha sa imong ba-ba” (bersikulo 9). Gibati ni Jeremias nga siya usa ka walay kasinatian nga “bata” (bersikulo 6), apan mipasabot ang Ginoo nga siya sa pagkatinuod mas andam kay sa iyang naamgohan––siya na-orden ngadto niini nga calling bisan sa wala pa siya matawo (tan-awa sa bersikulo 5). Busa gibale-wala ni Jeremias ang iyang mga kahadlok ug gidawat ang calling. Gipasidan-an niya ang mga hari ug mga pari sa Jerusalem nga ang ilang gipakaaron -ingnon nga pagkabalaan dili moluwas kanila gikan sa pagkalaglag. Ang “bata” kinsa naghunahuna nga siya dili makasulti midangat sa pagbati sa pulong sa Dios “diha sa [iyang] kasingkasing sama sa nagakasiga nga kahoy” og dili mapahilom (Jeremias 20:9).

Ang istorya ni Jeremias ato usab nga istorya. Nakaila usab ang Dios kanato, sa wala pa kita matawo ug giandam kita sa pagbuhat sa Iyang buhat dinhi sa yuta. Uban sa daghang mga butang, kana nga buhat naglakip og usa ka butang nga nakita nang daan ni Jeremias: ang pagpundok sa mga katawhan sa Dios, tagsa-tagsa, sa “pagdala [kanila] ngadto sa Sion” (Jeremias 3:14). Ug bisan kon kita wala mahibalo sa eksakto kon unsa ang buhaton o isulti, kita kinahanglan nga “dili mahadlok…; kay ako magauban kanimo, miingon ang Ginoo” (Jeremias 1:8,19).

Alang sa kinatibuk-ang pagsabot sa basahon sa Jeremias, tan-awa ang “Jeremias” diha sa Giya ngadto sa mga Kasulatan.

icon sa personal nga pagtuon

Mga Ideya alang sa Personal nga Pagtuon sa Kasulatan

Jeremias 1:4–19; 7:1–7; 20:8–10

Ang mga propeta gitawag aron sa pagsulti sa mga pulong sa Ginoo.

Samtang ikaw magbasa sa Jeremias 1:4–19 mahitungod sa tawag ni Jeremias nga mahimong usa ka propeta, pamalandonga ang tahas sa mga propeta sa imong kinabuhi. Unsa ang imong nakat-onan mahitungod sa mga propeta gikan sa mga pulong sa Ginoo ngadto ni Jeremias? (tan-awa usab sa Jeremias 7:1–7). Ang pagsangyaw ni Jeremias sa kasagaran gisalikway (tan-awa sa Jeremias 20:8,10). Unsay imong nakat-onan gikan sa mga pulong ni Jeremias sa Jeremias 20:9? Hinumdomi kini nga mga panghunahuna sa tibuok nimo nga pagtuon sa mga pagtulon-an ni Jeremias. Unsay imong nakit-an niini nga mga pagtulon-an nga nagpadasig kanimo sa pagsunod sa atong mga propeta sa ulahing mga adlaw?

Jeremias 1:5

Ang Dios nakaila kanako sa wala pa ako matawo.

Sa wala pa matawo si Jeremias, ang Dios nakaila na kaniya ug mipili kaniya, o mi-orden nang daan kaniya, sa pagtuman og usa ka piho nga misyon sa yuta (tan-awa sa Jeremias 1:5). Ngano kaha nga bililhon alang ni Jeremias nga makahibalo niini?

Ang Dios nakaila usab kanimo sa wala pa ikaw matawo ug gi-orden nang daan ngadto sa piho nga mga responsibilidad (tan-awa sa Alma 13:1–4; Doktrina ug mga Pakigsaad 138:53–56; Abraham 3:22–23). Unsa nga kalainan ang mahimo niini nga kahibalo diha sa imong kinabuhi? Kon ikaw nakadawat sa imong patriyarkal nga panalangin, mahimo nimong mainampoong rebyohon kini ug hangyoon ang Dios kon unsaon sa pagtuman sa unsay Iyang gi-orden nang daan nga imong buhaton.

Tan-awa usab ang Giya Ngadto sa mga Kasulatan, “Gi-orden nang Daan,” “Kinabuhi sa Wala pa Dinhi sa Yuta”.

tawo nagbarog sa karaang atabay

Ang mga tawo sa karaang Israel migamit og mga atabay aron sa pagtigom sa bililhong tubig.

Jeremias 2; 7

“Sila mingbiya kanako ang tub[o]ran sa mga tubig nga buhi.”

Sa uga nga rehiyon diin mipuyo ang mga Israelita, gitigom sa mga tawo ang bililhong tubig sa ilawom sa yuta nga mga tigomanan nga gitawag og mga atabay. Ngano nga ang pagdawat og tubig gikan sa tuboran mahimong mas maayo kay sa magsalig sa atabay? Unsa ang gipasabot sa pagbiya sa “tuburan sa buhi nga mga tubig”? Unsa kaha ang “likian nga atabay” nga gihisgotan sa Jeremias 2:13 nagsimbolo? Samtang ikaw nagbasa sa Jeremias 2 ug 7, alinggati giunsa sa mga tawo pagbiya ang buhing tubig sa Ginoo, ug paghunahuna mahitungod kon giunsa nimo pagdawat ang tubig nga buhi diha sa imong kinabuhi.

Ang Jeremias 7 gitumong ngadto niadtong kinsa misulod “niining ganghaana … sa pagsimba sa Ginoo” (Jeremias 7:2). Apan bisan pa niining pagpakita og debosyon, nakasala sila sa hilabihan nga pagkada[o]tan (tan-awa sa mga bersikulo 2–11). Unsa nga mga mensahe sa imong pamati aduna ang Ginoo alang kanimo dinhi sa mga bersikulo 21–23?

Jeremias 3:14–18; 16:14–21

Ang Ginoo mopundok sa Iyang mga katawhan.

Sa dihang nanagna si Jeremias kabahin sa pagpundok sa nagkatibulaag nga Israel, miingon siya nga kini mahimo gani nga mas hilabihan ka dako kay sa Exodo gikan sa Ehipto (tan-awa sa Jeremias 16:14–15). Sa sama nga pagsabot, si Presidente Russell M. Nelson miingon: “Gipadala kamo sa yuta niining tukma nga panahon … aron motabang sa pagpundok sa Israel. Kini walay laing panghitabo dinhi sa kalibutan karon nga mas importante kay sa niana [pagpundok]. … Kini nga pagpundok kinahanglang importante kaayo kaninyo” (Russell M. Nelson ug Wendy W. Nelson, “Pagla[o]m sa Israel” [tibuok kalib[o]tan nga debosyonal sa kabatan-onan, Hunyo 3, 2018], dugang ngadto sa New Era ug Ensign, Ago. 2018,12, ChurchofJesusChrist.org).

Samtang ikaw nagtuon sa Jeremias 3:14–18; 16:14–21, unsa ang nagdasig kanimo mahitungod sa ulahing mga adlaw nga pagpundok sa Israel? Unsa ang gisugyot niini nga mga bersikulo mahitungod kon unsaon kana nga pagpundok mahitabo? Unsang dugang nga mga panabot ang imong nakita sa nahabilin pa sa mensahe ni Presidente Nelson nga gihisgotan sa ibabaw?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Jeremias 1:5.Makagamit ka niini nga bersikulo sa paghisgot mahitungod sa atong kinabuhi kaniadto uban sa Langitnong Amahan sa wala pa kita matawo. Mga kapanguhaan sama sa “Langit Gipuy-an Ko” (Songbook sa mga Bata,140) ug “Pasiuna: Ang Plano sa Atong Langitnong Amahan” (sa Mga Istorya sa Bag-ong Tugon, 1–5) makatabang. Sa unsang paagi nga ang pagkasayod mahitungod sa atong kinabuhi sa wala pa dinhi sa yuta nag-apekto sa paagi nga kita nagpuyo sa atong mortal nga kinabuhi?

Jeremias 2:13; 17:13–14.Sa pagtabang sa mga sakop sa pamilya sa paghanduraw niini nga mga bersikulo, makapakita ka og unsa ang mahitabo kon magbutang ka og tubig sa usa ka liki o buak nga sudlanan. Unsa kaha ang girepresentar sa “tub[o]ran sa mga tubig nga buhi” ug sa “mga atabay nga likian”? (Jeremias 2:13). Unsaon nato pag-inom gikan sa tubig nga buhi sa Ginoo?

Jeremias 16:16.Si Presidente Russell M. Nelson nagtandi sa mga mangingisda ug mga mangangayam dinhi niini nga bersikulo ngadto sa mga misyonaryo sa ulahing mga adlaw (tan-awa sa “Ang Pagpundok sa Nagkatibulaag nga Israel,” Liahona, Nob. 2006, 81). Ang mga sakop sa pamilya “makapangayam” alang sa mga butang libot sa imong panimalay ug maghisgot mahitungod kon unsaon nimo nga makatabang sa “pagpangisda” ug “pagpangayam” alang sa nagkatibulaag nga Israel.

Jeremias 18:1–6.Sa pag-usisa niini nga mga bersikulo, mahimo tingali nga ikaw maghisgot o magpakita kon giunsa paghimo ang mga kolon. Unsa nga mensahe ang Ginoo aduna alang sa Israel diha sa Jeremias 18:1–6? Unsa ang gipasabot nga mahimong kolonon diha sa mga kamot sa Ginoo? (tan-awa usab sa Isaias 64:8). Alang sa laing istorya nga nagtandi kanato ngadto sa kolonon sa magkokolon, tan-awa ang mensahe ni Richard J. Maynes, “Ang Kalipay sa Pagpakabuhi nga Nakasentro kang Kristo” (Liahona, Nob. 2015, 27–30).

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Israel, Israel, Dios Nagtawag,” Mga Himno, nu.7.

Pagpalambo sa Atong Pagtudlo

Paggamit og mga istorya. Sa kasagaran ang Manluluwas mitudlo nga naggamit og mga istorya. Paghunahuna og mga istorya gikan sa imong kaugalingong kinabuhi nga makahimo sa baroganan sa ebanghelyo nga tinuod. (Tan-awa sa Pagtudlo sumala sa Pamaagi sa Manluluwas, 22.)

kolonon diha sa hulmahan sa magkokolon

“Ania karon, ingon nga ang inyong kolonon anaa sa kamot sa magkokolon, maingon niana kamo ania man sa akong kamot , O balay sa Israel” (Jeremias 18:6).