“Oktubre 3–9. Isaias 58–66: “Ang Manunubos Moab[o]t sa Sion,’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)

“Oktubre 3–9. Isaias 58–66,” Dali, Sunod Kanako—Alang sa mga Indibidwal ug mga Pamilya: 2022

Imahe

Nagtudlo si Jesus sa sinagoga

Si Jesus sa Sinagoga sa Nazaret, ni Greg K. Olsen

Oktubre 3–9

Isaias 58–66

“Ang Manunubos Moab[o]t sa Sion”

Samtang ikaw magtuon sa Isaias 58–66, hunahunaa kon giunsa sa mga pulong ni Isaias pagdala og hingpit nga kalipay ug paglaom, alang sa umaabot.

Irekord ang Imong mga Impresyon

Sayo sa Iyang yutan-ong pangalagad, giduaw ni Jesukristo ang sinagoga sa Nazaret, ang balangay diin Siya nagtubo. Didto mitindog Siya sa pagbasa gikan sa mga kasulatan, giabli ang basahon ni Isaias, ug gibasa ang unsay atong nahibaloan karon isip ang Isaias 61:1–2. Dayon Siya mianunsyo, “Niining adlawa karon, kining bahina sa kasulatan matuman diha sa inyong pagapatalinghug niini.” Kini mao ang usa sa labing walay lipud-lipod nga mga pamahayag nga Siya mao ang Gidihogan nga Usa, kinsa “moayo sa nagsubo nga kasingkasing” ug sa pagpahibalo sa kagawasan ngadto sa mga binilanggo” (tan-awa sa Lucas 4:16–21). Kini nga kasulatan natuman gayod nianang adlawa. Ug, sama sa daghang mga panagna ni Isaias, kini nagpadayon nga pagatumanon sa atong panahon. Ang Manluluwas nagpadayon sa pagpang-ayo sa nagsubo nga kasingkasing kinsa moduol ngadto Kaniya. Aduna pay daghang mga binilanggo kansang kagawasan kinahanglan gayod nga isangyaw. Ug adunay usa ka mahimayaon nga umaabot nga andamon––usa ka panahon nga ang Ginoo “magahimo og bag-ong mga langit ug usa ka bag-ong yuta” (Isaias 65:17) ug “magapaturok sa pagkamatar[o]ng ug pagdayeg sa atubangan sa tanan nga mga nas[o]d” (Isaias 61:11). Ang pagbasa sa Isaias nag-abli sa atong mga mata ngadto sa unsay nahimo na sa Ginoo, unsa ang Iyang gihimo karon, ug unsa pa ang Iyang himoon alang sa Iyang mga katawhan.

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Isaias 58:3–12

Ang pagpuasa nagdala og mga panalangin.

Kini nga mga bersikulo nagsugyot nga ngadto sa daghan nga karaang mga Israelita, ang pagpuasa mas usa ka palas-anon kay sa usa ka panalangin. Daghan kanato ang makapangilabot usahay ngadto niana nga pagbati. Kon ikaw gusto nga makakita pa og dugang nga kahulogan ug katuyoan sa imong pagpuasa, basaha sa Isaias 58:3–12 aron sa pagpangita sa mga tubag sa Ginoo ngadto sa pangutana “Nganong magpuasa kita?” Sa imong kasinatian, sa unsang paagi ang pagpuasa makahimo sa “paghubad sa mga higot sa kadaotan” ug bunggoon ang tanang mga yugo”? (Isaias 58:6). Giunsa sa puasa pagdala kanimo sa mga panalangin nga gihulagway sa Isaias 58:8–12? Sa unsa nga paagi ang Isaias 58:3–12 nag-apekto sa paagi nga ikaw naghunahuna mahitungod sa pagpuasa?

Sa iyang mensahe “Dili Ba Mao Kini ang Pagpuasa nga Akong Napili?” (Liahona, Mayo 2015, 22–25), Si Presidente Henry B. Eyring mipakigbahin og daghan nga mga ehemplo kon giunsa pagpanalangin ang mga katawhan pinaagi sa pagpuasa ug sa mga halad sa puasa. Sa unsang paagi ikaw nakasaksi og susama nga mga panalangin diha sa imong kinabuhi?

Isaias 59:9–21; 61:1–3; 63:1–9

Si Jesukristo ang akong Manluluwas ug Manunubos.

Sa Isaias 58–66 makaplagan nimo ang lain-laing mga pakisayran ngadto sa maulaong misyon ni Jesukristo. Ania ang pipila ka mga ehemplo, uban sa pipila ka mga pangutana sa pagtabang kanimo sa pagpamalandong niini.

Isaias 59:9–21. Unsaon nimo sa pag-summarize ang espiritwal nga kahimtang sa mga katawhan nga gihulagway sa mga bersikulo 9–15? Unsa ang nakapadani kanimo mahitungod sa paghulagway sa “nagpataliwala” diha sa mga bersikulo 16–21 ug ang pakigsaad nga Siya naghimo uban niadto kinsa moduol ngadto Kaniya?
Isaias 61:1–3. Giunsa ka sa pagpanalangin ni Jesukristo diha sa mga paagi nga gihulagway dinhi niini nga mga bersikulo? Unsa nga “maayong mga balita” ang gidala Niya kanimo? Giunsa Niya paghatag kanimo og purongpurong nga bulak puli sa mga abo?
Isaias 63:7–9. Unsa nga “mahigugmaong-kalolot sa Ginoo” ikaw makahingalan? Unsa nga mga pagbati alang sa Manluluwas kini nga mga bersikulo nagdasig sa imong kasingkasing?

Unsa ang ubang mga pakisayran kabahin sa Manluluwas ang imong makaplagan sa Isaias 58-66?

Tan-awa usab sa Mosiah 3:7; Doktrina ug mga Pakigsaad 133:46–53.

Isaias 60; 62

“Ang Ginoo mao ang kahayag nga walay katap[o]san kanimo.”

Isaias 60 ug 62 naghisgot og kahayag ug kangitngit, mga mata ug igtalan-aw, aron sa pagtudlo mahitungod kon unsaon sa ebanghelyo ni Jesukristo pagpanalangin sa kalibotan sa kataposang mga adlaw. Pangitaa kini nga mga konsepto ilabi na sa Isaias 60:1–5, 19–20; 62:1–2. Samtang ikaw magbasa niini nga mga kapitulo, pamalandonga kon giunsa sa Ginoo pagpundok ang Iyang mga anak paggawas sa kangitngit ngadto sa Iyang kahayag. Unsa ang imong tahas niini nga buhat?

Tan-awa usab sa 1 Nephi 22:3–12; 3 Nephi 18:24; Doktrina ug mga Pakigsaad 14:9; Bonnie H. Cordon, “Aron Sila Makakita,” Liahona, Mayo 2020, 78–80.

Isaias 64:1–5; 65:17–25; 66

Si Kristo maghari sa yuta sa panahon sa Milenyum.

Mihisgot si Isaias kabahin sa usa ka adlaw nga “ang kanhi nga mga kagubot makalimtan” (Isaias 65:16). Samtang kini nga panagna diha nay daghang mga katumanan, sa tinuod nga pagkasulti, kana nga adlaw moabot pa––sa panahon nga mobalik si Jesukristo nganhi sa yuta ug motukod og panahon sa kalinaw ug pagkamatarong nga gitawag og Milenyum. Gihulagway ni Isaias kining umaabot nga adlaw sa Isaias 64:1–5; 65:17–25; 66. Timan-i kapila siya migamit sa mga pulong sama sa “nagmaya” ug “pagmaya.” Pamalandonga kon ngano nga ang pagbalik sa Manluluwas mahimo nga panahon sa pagmaya alang kanimo. Unsa ang imong mabuhat sa pagpangandam alang sa Iyang pag-anhi?

Tan-awa usab sa Mga Artikulo sa Hugot nga Pagtuo 1:10; Russell M. Nelson, “Ang Umaab[o]t sa Simbahan: Pag-andam sa Kalib[o]tan alang sa Ikaduhang Pag-anhi sa Manluluwas,” Liahona, Abr. 2020, 13–17.

Imahe

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Isaias 58:3–11.Mga sakop sa pamilya mahimong mas makasabot og maayo sa mensahe mahitungod sa pagpuasa kon sila moaksyon sa matang sa puasa nga gihulagway sa Isaias 58:3–5 ug ang matang sa puasa nga gihulagway sa Isaias 58:6–8. Unsaon nato paghimo sa atong mga puasa nga mas mahisama “sa puasa nga napili sa [Dios]”? Unsa nga mga panalangin ang atong nakita gikan sa pagpuasa?

Isaias 58:13–14.Unsa ang kalainan tali sa “mangita sa [atong] kaugalingon nga kalipayan” ug mangita og “kalipayan … diha sa Ginoo” sa adlaw nga Igpapahulay? Unsaon nato paghimo sa Igpapahulay nga “kahimut-an”?

Isaias 60:1–5.Samtang ikaw magbasa sa Isaias 60:1–3, ang mga sakop sa pamilya makapasiga og suga kon ang mga bersikulo naghisgot og kahayag ug pagngon kini kon ang mga bersikulo naghisgot og kangitngit. Sa unsang paagi ang ebanghelyo ni Jesukristo sama sa usa ka kahayag ngari kanato? Unsa ang nakita nang daan ni Isaias nga panan-awon nga mahitabo samtang ang mga katawhan sa Dios makigbahin sa kahayag sa ebanghelyo (tan-awa sa Isaias 60:3–5).

Isaias 61:1–3.Giunsa pagtuman sa Manluluwas ang mga panagna ni Isaias niini nga mga bersikulo? Makadapit ka og mga sakop sa pamilya sa pagpangita og mga hulagway sa Manluluwas nga ilang gibati nga naghulagway niini nga mga bahin sa Iyang misyon (mga hulagway makita sa mga magasin sa Simbahan o sa Libro sa mga Hulagway sa Ebanghelyo). Mahimo usab kamo nga mokanta og awit mahitungod kon giunsa sa Manluluwas sa pagpanalangin kanato, sama sa “Gibati Ko ang Gugma sa Akong Manluluwas” (Songbook sa mga Bata, 42–43).

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Kon Siya Moanhi Pag-usab,” Songbook sa mga Bata, 46–47.

Pagpalambo sa Personal nga Pagtuon

Andama ang imong palibot. Ang atong palibot makaapekto sa atong abilidad sa pagkat-on. Pangita og dapit sa pagtuon sa mga kasulatan diin imong bation ang impluwensya sa Espiritu. (Tan-awa sa Pagtudlo sumala sa Pamaagi sa Manluluwas, 15.)