Kristo nagpurong-purong og mga korona nga mga tunok ug gibiaybiay sa usa ka sundalo

The Mocking of Christ [Ang Pagbiay-biay ni Kristo], ni Carl Heinrich Bloch

Septyembre 26–Oktubre 2

Isaias 50–57

“Gipas-an Niya ang Atong Kasakit, ug Gipas-an ang Atong mga Kasub-anan”

Palandonga ang mga panabot gikan sa Isaias 50–57 nga nagtabang kanimo nga mas magpaduol ngadto sa Manluluwas. Irekord ang mga impresyon nga imong madawat.

Irekord ang Imong mga Impresyon

Sa tibuok niya nga pangalagad, namulong si Isaias kabahin sa usa ka gamhanan nga tigluwas (tan-awa, sama pananglit, sa Isaias 9:3–7). Kini nga mga panagna mahimo unta nga labi ka bililhon ngadto sa mga Israelita sa kaulahian nga mga siglo nga sila diha sa pagkabihag sa Babelonia. Ang usa ka tawo kinsa makalumpag sa mga paril sa Babelonia usa gayod ka gamhanang magbubuntog. Apan dili kana ang matang sa Mesiyas nga gihulagway ni Isaias sa mga kapitulo 52–53: “Gitamay siya ug gisalikway sa mga tawo; usa ka tawo sa mga kasub-anan, ug nakasinati sa pag-ant[o]s: ug gitago sa mga tawo ang ilang nawong.… Siya giila nato nga binunalan, hinampak sa Dios, ug sinakit” (Isaias 53:3–4). Pinaagi sa pagpadala sa ingon nga wala damha nga tigluwas, gitudlo sa Dios kanato ang mahitungod sa tinuod nga pagluwas. Sa pagluwas kanato gikan sa pagdaog-daog ug kasakit, gipadala sa Dios ang Usa kinsa sa Iyang Kaugalingon “gida[o]gda[o]g, ug … sinakit.” Bisan og ang uban nagpaabot og usa ka leon, Siya mipadala og usa ka karnero (tan-awa sa Isaias 53:7). Sa tinuod, ang mga paagi sa Dios dili atong mga paagi (tan-awa sa Isaias 55:8–9). Nagluwas kanato si Jesukristo dili pinaagi sa pag-abli lamang sa bilanggoan apan pinaagi sa pagpuli sa atong dapit didto. Nagpuli Siya kanato gikan sa atong mga kadena sa kasakit ug kaguol pinaagi sa pagdala niini diha sa Iyang Kaugalingon (tan-awa sa Isaias 53:4–5,12). Wala Siya magluwas kanato gikan sa layo. Nag-antos Siya uban kanato, sa usa ka buhat sa “walay kataposan nga mahigugmaong-kalolot” nga “dili mobulag kanimo” (Isaias 54:8,10).

icon sa personal nga pagtuon

Mga Ideya alang sa Personal nga Pagtuon sa Kasulatan

Isaias 50–52

Ang kaugmaon mahayag alang sa mga katawhan sa Ginoo.

Bisan tuod og ang mga Israelita migahin og daghang mga katuigan sa pagkabihag––ug bisan tuod kana nga pagkabihag usa ka resulta sa ilang kaugalingong dili maayo nga mga pagpili––ang Ginoo gusto kanila nga motan-aw sa kaugmaon uban ang paglaom. Unsa nga malaumong mga mensahe ang imong makaplagan sa Isaias 50–52? Unsa ang gitudlo sa Ginoo kanato mahitungod sa Iyang Kaugalingon niini nga mga kapitulo, ug nganong kini naghatag kanimo og paglaom? (tan-awa, sama pananglit, sa Isaias 50:2, 5–9; 51:3–8, 15–16; 52:3, 9–10).

Mahimo usab nga imong ilista ang tanan diha sa mga kapitulo 51–52 nga gidapit sa Ginoo nga ipabuhat sa Israel aron sa paghimo niining malaomon nga kaugmaon nga matinuod. Unsa sa imong pamati ang gidapit sa Ginoo nga ipabuhat kanimo pinaagi niini nga mga pulong? Sama pananglit, unsa sa imong hunahuna ang gipasabot sa “pagmata” ug “pagsul-ob sa kusog”? (Isaias 51:9; tan-awa usab sa Isaias 52:1; Doktrina ug mga Pakigsaad 113:7–10). Ngano sa imong hunahuna ang pagdapit nga “mopatalinghug” (o “maminaw uban sa katuyoan sa pagsunod”) kasagarang gibalik-balik? (Russell M. Nelson, “Paminaw Kaniya,” Liahona, Mayo 2020, 89).

Tan-awa usab sa Mosiah 12:20–24; 15:13–18; 3 Nephi 20:29–46.

kinulit nga Kristo nga nagpas-an sa krus

Because of Love [Tungod sa Gugma], sa magkukulit nga si Angela Johnson

Isaias 53

Gidala ni Jesukristo diha sa Iyang Kaugalingon ang akong mga sala ug mga kasubo.

Pipila ka mga kapitulo sa kasulatan naghulagway sa matubsanong misyon ni Jesukristo sa mas nindot nga paagi kay sa Isaias 53. Paggahin og panahon sa pagpamalandong niini nga mga pulong. Uban sa matag bersikulo, hunong og makadiyot sa pagpamalandong kon unsa ang giantos sa Manluluwas––ang “mga kasakit,” “mga kasubo,” ug “mga kalapasan” nga Iyang gipas-an––alang sa tanang mga katawhan ug sa piho alang kanimo. Mahimo nimong ilisan ang mga pulong sama sa “kita” ug “ato” ngadto sa “ako” ug “akong” samtang ikaw nagbasa. Unsa nga mga pagbati o mga hunahuna kini nga mga bersikulo nagdasig kanimo? Hunahunaa ang pagsulat niini.

Mahimo kang morebyo sa Mosiah 14; 15:1–13 aron sa pagsuta kon giunsa ni propeta Abinadi paggamit ang mga pulong ni Isaias sa pagtudlo mahitungod sa Manluluwas.

Isaias 54; 57:15–19

Si Jesukristo gusto kanako nga mobalik ngadto Kaniya.

Tanan kita adunay mga panahon nga mobati nga layo gikan sa Ginoo tungod sa atong mga sala o mga kahuyang. Gani ang uban nawad-an og paglaom nga Siya mopasaylo gayod kanila. Ang Isaias 54 ug 57 importanting mga kapitulo nga basahon alang sa pasalig pag-usab ug pagdasig atol sa ingon nga panahon. Ilabi na sa Isaias 54:4–10; 57:15–19, unsay imong makat-onan mahitungod sa kalooy sa Manluluwas ug sa Iyang mga pagbati mahitungod kanimo? Unsa nga kalainan ang mahimo sa imong kinabuhi nga mahibalo niini nga mga butanga mahitungod Kaniya?

Sa unsa nga paagi ang mga panalangin nga gihulagway sa Isaias 54:11–17 magamit nganha kanimo?

Isaias 55–56

Ang Ginoo nagdapit sa tanan nga “magapadayon sa iyang pakigsaad [tugon].”

Sulod sa mga henerasyon, ang Israel nailhan isip ang mga katawhan sa pakigsaad sa Dios. Hinoon, ang plano sa Dios sa kanunay miapil og labaw pa kay sa usa lamang ka nasod, tungod kay “ang tagsatagsa nga giuhaw” gidapit nga “umari kamo… sa mga tubig” (Isaias 55:1). Hinumdomi kini samtang nagbasa ka sa Isaias 55 ug 56, ug pamalandonga kon unsa ang gipasabot niini nga mahimong mga katawhan sa Dios. Unsa ang mensahe sa Dios ngadto niadtong kinsa mibati nga “gibulag” gikan Kaniya? (Isaias 56:3). Paghunahuna og marka sa mga bersikulo nga naghulagway sa mga kinaiya ug mga lihok niadtong kinsa “magapadayon sa akong pakigsaad” [tugon] (tan-awa sa Isaias 56:4–7).

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Isaias 51–52.Samtang ikaw naghisgot sa mga pagdapit sa Ginoo niini nga mga kapitulo, makadapit ka og mga sakop sa pamilya sa pag-aksyon niini. Sama pananglit, unsa ang hitsura sa “iyahat ang inyong mga mata sa kalangitan,” “pagmata, tumindog ka,” o “yabyabi ang imong kaugalingon gikan sa abug”? (Isaias 51:6,17; 52:2). Unsa ang gitudlo niini nga mga pundok sa mga pulong ngari kanato mahitungod sa pagsunod ni Jesukristo?

Isaias 52:9.Human mabasa kini nga bersikulo, ang imong pamilya “makakanta og dungan” sa usa ka himno o awit sa mga kabataan nga nagdala og hingpit nga kalipay kanila. Unsa nga mga saad sa Isaias 52 ang hinungdan sa “paghunat kanato sa paglipay”?

Isaias 52:11; 55:7.Kini nga mga bersikulo makagiya ngadto sa panaghisgot mahitungod sa unsa kaha ang gipasabot sa hugpong sa mga pulong “Panaghinlo kamo. Isip kabahin niini nga panaghisgot, makarebyo ka sa mga hilisgotan sa Alang sa Kalig-on sa mga Kabatan-onan (booklet, 2011) o basa sa mga kasulatan mahitungod sa mga panalangin sa kalimpyo sa espiritwal nga paagi (tan-awa sa 3 Nephi 12:8; Doktrina ug mga Pakigsaad 121:45–46).

Isaias 53.Sa pagpaila sa paghulagway ni Isaias sa Manluluwas, ang imong pamilya makahisgot mahitungod sa mga istorya, mga salida, ug ubang media nga kasagaran naghulagway og mga bayani kinsa nagluwas og mga tawo. Makahimo ka og kalainan niadto nga mga paghulagway ngadto sa mga paghulagway sa Manluluwas nga inyong nabasa sa Isaias 53. Kamo makahisgot mahitungod kon giunsa sa mga panagna sa Isaias 53 pagkatuman. Unsa ang pipila ka mga kaguol ug mga kasubo nga gipas-an sa Manluluwas alang kanato?

Isaias 55:8–9.Sa unsang paagi ang mga butang lahi nga tan-awon kon ikaw anaa sa taas ibabaw sa yuta? Unsa ang pagsabot nimo nga ang mga paagi ug mga hunahuna sa Dios taas kay sa ato?

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Ako Nagpabilin nga Natingala,” Mga Himno, nu.114.

Pagpalambo sa Personal nga Pagtuon

Paggamit og musika. Ang mga himno gamhanang nagtudlo og mga baroganan sa ebanghelyo. Hunahunaa ang pagpaminaw o pagbasa og mga himno sa sakramento sa pagtabang kanimo nga makasabot sa mga kamatuoran mahitungod sa Pag-ula ni Jesukristo nga gitudlo sa Isaias 53. (Tan-awa sa Pagtudlo sumala sa Pamaagi sa Manluluwas, 22.)

hulagway ni Kristo

Iyang Kahayag, ni Michael T. Malm