Healing the Blind Man [Nag-ayo sa Buta nga Lalaki], ni Carl Heinrich Bloch

Septyembre 19–25

Isaias 40–49

“Paglipay Kamo Akong Katawhan”

Kasagaran si Isaias migamit og simbolikanhon nga pinulongan. Hatagi og pagtagad ang mga hunahuna ug mga pagbati nga gidala niini nga mga simbolo nganha sa imong hunahuna ug kasingkasing. Kini mahimo nga motabang kanimo nga mas makasabot kon unsa ang iyang gitudlo.

Irekord ang Imong mga Impresyon

“Paglipay” mao ang unang pulong sa Isaias kapitulo 40. Kini nagtimaan sa sinugdanan sa usa ka lahi nga pagbati, usa ka lahi nga gibug-aton diha sa mensahe sa propeta. Bisan og ang unang mga sinulat ni Isaias mipahimangno sa Israel ug sa Juda mahitungod sa paglaglag ug pagbihag nga umaabot tungod sa ilang mga sala, kining ulahi nga mga panagna gituyo aron sa paglipay sa mga Judeo sa umaabot nga kapin sa 150 ka tuig––human malaglag ang Jerusalem, napasipad-an ang templo, ug ang mga katawhan nabihag sa Babelonia. Apan kini nga mga panagna nakaapekto og mas layo pa gani sa umaabot kay sa ngadto sa nabuntog, nadismaya nga mga Israelita. Kini namulong ngari kanato, kinsa usahay mibati usab nga nabuntog, nadismaya, ug gani nawala.

Ang mensahe ni Isaias ngadto kanila ug ngari kanato yano: “Ayaw kahadlok” (Isaias 43:1). Ang tanan wala mawagtang. Ang Ginoo wala makalimot kanimo, ug Siya adunay gah[o]m ibabaw sa mga sitwasyon nga ingon og dili mapugngan. Dili ba ang Ginoo “siya nga nagbuhat sa langit, ug … siya nga nagkatag sa yuta, ug … siya nga naghatag og ginhawa sa katawhan nga anaa sa ibabaw niini”? (Isaias 42:5). Dili ba Siya mas gamhanan kay sa Babelonia, kay sa sala, kay sa bisan unsa nga naghupot kanimo nga bihag? “Bumalik ka kanako,” Siya nangalyupo, “kay gilukat ko na ikaw” (Isaias 44:22). Siya makaayo, makapahiuli, makalig-on, makapasaylo, ug makalipay––bisan unsa ang gikinahanglan alang kanimo, sa imong sitwasyon, aron nga matubos.

Aron makakat-on kon giunsa ni Nephi ug Jacob sa pagpahisama sa Isaias 48–49 ngadto sa ilang mga katawhan, tan-awa sa 1 Nephi 22 ug 2 Nephi 6.

Mga Ideya alang sa Personal nga Pagtuon sa Kasulatan

Isaias 40–49

Si Jesukristo makalipay kanako ug makahatag kanako og paglaom.

Hilabihan gyud kaha ka makapawala og kadasig, gani makapahugno, alang sa mga Israelita nga makakita sa ilang mga kaugalingon nga bihag sa Babelonia. Mahimong daghan ang matingala kon sila wala na ba tan-awa isip pinili, pakigsaad nga mga katawhan sa Dios. Samtang ikaw nagbasa sa Isaias 40–49, pangita og mga tudling nga tingali makahatag og kalipay ug paglaom. Alang sa matag tudling nga imong makaplagan, pamalandong, ug pagrekord kon unsa kaha ang gisulti sa Ginoo nganha kanimo dinhi niini nga mga bersikulo. Ania ang pipila ka mga bersikulo nga mahimo nimong sugdan:

• 40:11, 29–31:

• 41:10–13, 17–18:

• 42:6–7:

• 43:1-7, 25:

• 44:1–4, 21–24:

• 46:3–4:

• 49:7–16:

Unsaon nimo sa pagpakigbahin niini nga mga mensahe ngadto sa usa ka tawo kinsa nagkinahanglan og pagdasig o paglaom? (tan-awa sa Isaias 40:1–2).

Tan-awa usab sa Jeffrey R. Holland, “Usa ka Hingpit nga Kahayag sa Pagla[o]m,” Liahona, Mayo 2020, 81–84.

Pinaagi sa pagsunod sa Ginoo, kita makabaton og “pakigdait … mahisama sa usa ka suba” (Isaias 48:18).

Isaias 40:3–8, 15–23; 42:15–16; 47:7–11

Ang gahom sa Dios mas labaw kay sa kalibotanong gahom.

Gibalik-balik ni Isaias sa pagpahinumdom ang iyang mga katawhan kabahin sa dili matupngan nga gahom sa Dios, bisan itandi ngadto sa malupigon nga kalibotanong gahom nga naglibot kanila. Pangitaa kini nga mensahe samtang ikaw nagbasa sa Isaias 40:3–8, 15–23; 42:15–16; ug 47:7–11 (timan-i nga ang kapitulo 47 gitumong ngadto sa nagdakop sa Israel, ang Babelonia). Unsa ang gitudlo niini nga mga tudling kanimo mahitungod sa kalibotanon nga mga butang? Unsa ang gitudlo niini kanimo mahitungod sa Dios? Palandonga kon nganong kini nga mensahe bililhon unta ngadto sa mga Judeo diha sa pagkabihag. Nganong bililhon kini nganha kanimo?

Tan-awa usab sa “Ubani Ako!” Mga Himno, nu. 97.

Isaias 41:8–13; 42:1–7; 43:9–12; 44:21–28; 45:1–4; 48:10; 49:1–9

“Ikaw mao ang akong alagad.”

Sa tibuok Isaias 40–49 ang Ginoo namulong kabahin sa Iyang “alagad” ug sa Iyang “mga saksi.” Diha sa pipila ka mga tudling kini nga mga pulong ingon og nagpasabot ngadto ni Jesukristo (tan-awa sa Isaias 42:1–7), ang uban nagpasabot ngadto sa balay ni Israel (tan-awa sa Isaias 45:4), ug gani ang uban nagpasabot ngadto ni Hari Ciro kinsa mitugot sa mga Judeo sa pagbalik ngadto sa Jerusalem ug sa pagtukod og balik sa templo (tan-awa sa 44:26–45:4). Sa matag sitwasyon, hinoon, mahimo usab nimong hunahunaon kon sa unsa nga paagi ang mga tudling magamit nganha kanimo isip usa ka alagad ug usa ka saksi sa Ginoo. Sama pananglit, pamalandong og mga pangutana sama niini:

Isaias 41:8–13; 42:6; 44:21. Unsa ang gitawag sa Ginoo kanimo nga ipabuhat? Hunahunaa ang may awtoridad nga mga calling sa Simbahan ingon man ang ubang mga responsibilidad sa pakigsaad nga moalagad Kaniya. Sa unsa nga paagi Siya magsuporta kanimo ug “magakupot sa [imong] kamot” (Isaias 42:6) samtang ikaw nag-alagad? Giunsa ka Niya “pag-umol” ngadto sa pagkahimo nga Iyang alagad? (tan-awa usab sa Isaias 48:10).

Isaias 43:9–12. Sa unsa nga paagi ikaw usa ka saksi ni Jesukristo? Unsa nga mga kasinatian sa imong kinabuhi ang nagpakita kanimo nga Siya mao ang Manluluwas?

Isaias 49:1–9. Unsa nga mga mensahe ang imong makaplagan niini nga mga bersikulo nga makatabang kon ang imong mga paninguha ug pag-alagad ingon og nahimong “walay kapuslanan, ug nakawang”? (bersikulo 4).

Tan-awa usab sa Mosiah 18:9; Henry B. Eyring, “Usa ka Anak ug usa ka Tinun-an,” Liahona, Mayo 2003, 29–32.

Mga Ideya alang sa Pamilya nga Pagtuon sa Kasulatan ug Home Evening

Isaias 40:3–4.Sa pagsuhid kon unsa kaha ang kahulugan sa “andama … ang dalan sa Ginoo, ”ang imong pamilya makatul-id og usa ka butang nga hiwi, makahawan og nagkatag nga butang sa salog, o makahimo og dalan diha sa batoon nga yuta. Makapakita ka usab og mga hulagway ni Juan Bautista ug Joseph Smith (tan-awa sa Libro sa mga Hulagway sa Ebanghelyo, mga nu. 35, 87). Giunsa nila pag-andam ang dalan alang sa pag-anhi sa Ginoo? (tan-awa sa Lucas 3:2–18; Doktrina ug mga Pakigsaad 135:3). Unsaon nato pagtabang sa pag-andam sa dalan alang Kaniya? (sama pananglit, tan-awa sa Doktrina ug mga Pakigsaad 33:10).

Isaias 40:28; 43:14–15; 44:6.Unsa nga mga ngalan ug mga tawag ni Jesukristo ang atong makita niini nga mga bersikulo? Unsa ang gitudlo sa matag ngalan kanato mahitungod Kaniya?

Isaias 41:10; 43:2–5; 46:4.Kini nga mga bersikulo gipakita diha sa himno “Unsa Kalig-on ang Tukuranan” (Mga Himno, nu. 44). Ang imong pamilya tingali malingaw sa pagkanta og dungan sa himno ug sa pagkakaplag og mga hugpong sa mga pulong nga mga susama sa mga hugpong sa mga pulong dinhi niini nga mga bersikulo. Unsa ang gitudlo niini nga mga hugpong sa mga pulong mahitungod ni Jesukristo?

Isaias 44:3–4; 45:8.Human mabasa kini nga mga bersikulo, ang imong pamilya makabu-bu og tanom samtang ikaw maghisgot mahitungod sa mga panalangin nga gibu-bu sa Ginoo diha kanila. Unsa ang mahitabo sa tanom kon ato kining bu-buan? Unsa ang gipaabot sa Ginoo gikan kanato samtang Siya nagpanalangin kanato?

Isaias 48:17–18.Hunahunaa ang pagpakita sa mga hulagway o mga video sa mga suba ug mga bawod sa lawod. Sa unsa nga paagi nga ang kalinaw sama sa usa ka suba? Sa unsa nga paagi nga ang pagkamatarong sama sa mga bawod?

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Unsa Kalig-on ang Tukuranan,” Mga Himno, nu. 44.

Pagpalambo sa Personal nga Pagtuon

Pagpatin-aw sa mga pulong. Sulayi ang pagpangita sa mga pagpatin-aw sa mga pulong diha sa mga kasulatan nga wala nimo masabti––ug bisan sa mga pulong nga imong gihunahuna nga imong nasabtan. Usahay ang mga pagpatin-aw makatabang kanimo sa pagbasa og bersikulo sa lahi nga paagi ug sa pag-angkon og bag-ong espiritwal nga mga panabot.

“Kay nagalipay ang Ginoo sa iyang katawhan, ug adunay kalooy sa iyang ginasakit” (Isaias 49:13).Haplas sa Galaad, ni Ann Adele Henrie