Sagradong Kakahoyan, ni Brent Borup

Septyembre 12–18

Isaias 13–14; 24–30;35

“Usa ka Katingalahang Buhat ug usa ka Kahibulongan ”

Si Presidente Bonnie H. Cordon mitudlo, “Ang mga kasulatan molamdag sa atong hunahuna, moalima sa atong espiritu, modugang sa atong pagsalig sa Ginoo, ug motabang nga masentro ang atong kinabuhi ngadto Kaniya.”(“Salig sa Ginoo ug Ayaw Pagsalig sa Kaugalingong Salabutan,” Liahona, Mayo 2017, 7).

Irekord ang Imong mga Impresyon

Usa sa mga butang nga ang Ginoo naghangyo nga buhaton sa mga propeta mao ang pagpasidaan mahitungod sa mga sangpotanan sa sala. Sa sitwasyon sa mga propeta sa Daang Tugon, kini kasagaran nga nangahulogan og pagsulti sa makagagahom nga mga magmamando sa gamhanang mga gingharian nga sila kinahanglan gayod nga maghinulsol o pagalaglagon. Makuyaw kini nga buhat, apan si Isaias walay kahadlok, ug ang iyang mga pasidaan ngadto sa mga gingharian sa iyang panahon––lakip sa Israel, Juda, ug sa naglibot nga mga nasod––mga inisog (tan-awa sa Isaias 13–23).

Hinoon, si Isaias usab adunay mensahe sa paglaom. Bisan tuod og ang gipanagna nga mga kalaglagan miabot sa kataposan diha niini nga mga gingharian, napanan-aw na daan ni Isaias ang usa ka higayon sa pagpahiuli ug pagbag-o. Ang Ginoo modapit sa Iyang mga katawhan sa pagbalik ngadto Kaniya. Himoon Niya “ang nagakapagba nga balas … nga usa ka lim-aw, ug ang giuhaw nga yuta magatubod sa tubig” (Isaias 35:7). Siya mobuhat og “usa ka katingalahan nga buhat ug usa ka kahibulongan” (Isaias 29:14), nagpahiuli ngadto sa Israel sa mga panalangin nga Siya misaad kanila. Ni si Isaias ni si bisan kinsa pa nga buhi niana nga panahon nagpabilin nga buhi sa pagtan-aw niini nga katingalahan nga buhat. Apan kita nagtan-aw sa kataposang katumanan niini karon. Sa tinuod, kita kabahin niini!

Mga Ideya alang sa Personal nga Pagtuon sa Kasulatan

Isaias 13:1–11, 19–22; 14:1–20

Ang dautan nga mga gingharian sa kalibotan ug ang ilang mga magmamando malaglag.

Isaias 13–14 gitawag og “ang palas-anon sa” (usa ka propetikanhong mensahe mahitungod) sa Babelonia (Isaias 13:1). Kanhiay usa ka gamhanang gingharian nga may makagagahom nga magmamando, ang Babelonia sa pagka-karon gitan-aw isip karaang kasaysayan. Busa ngano nga ang mensahe ngadto sa Babelonia importante ngari kanato karon? Diha sa mga kasulatan, ang Babelonia nagsimbolo sa garbo, pagka-kalibotanon, ug sala, ug karon kita gilibutan sa tanan niini. Paghunahuna mahitungod niini nga simbolismo samtang ikaw nagbasa sa Isaias 13:1–11, 19–22; 14:1–20. Mahimo usab nimo nga hunahunaon ang mga pangutana nga sama niini:

• Sa unsang paagi nga ang mga pasidaan ni Isaias ngadto sa Babelonia susama ngadto sa mga panagna mahitungod sa kalibutan nga wala pa ang Ikaduhang Pag-anhi sa Manluluwas? (tan-awa sa Isaias 13:1–11; Doktrina ug mga Pakigsaad 45:26–42).

• Unsa nga mga pagkasusama ang imong makita tali sa garbo sa hari sa Babelonia ug sa garbo ni Satanas? (tan-awa sa Isaias 14:4–20; Moises 4:1–4). Unsa nga mga pasidaan ang imong nakita alang sa imong kaugalingon niini nga mga bersikulo?

• Giunsa sa Manluluwas sa paghatag og “pahulay gikan sa imong kasubo, ug gikan sa imong kaguol”? (Isaias 14:3).

He Comes Again to Rule and Reign [Moanhi Siya Pag-usab aron sa Pagmando ug Paghari] ni Mary R. Sauer

Isaias 24:21–23; 25:6–8; 26:19; 28:16

Ang mga panulat ni Isaias nagtudlo kanako ngadto ni Jesukristo.

Ang mga pagtulun-an ni Isaias kasagaran nagpasabot ngadto sa misyon sa Manluluwas, lakip sa Iyang maulaong sakripisyo, Pagkabanhaw, ug Ikaduhang Pag-anhi. Unsa nga mga bahin sa Iyang misyon ang mahunahunaan samtang ikaw nagbasa sa mosunod nga mga bersikulo: Isaias 24:21–23; 25:6–8; 26:19; 28:16? Unsa ang ubang mga tudling ang imong makaplagan nga nagpahinumdom kanimo sa Manluluwas?

Tan-awa usab sa Isaias 22:22–25.

Isaias 24:1–12; 28:7–8; 29:7–10; 30:8–14

Ang pagbiya sa kamatuoran nagpasabot sa pagbiya gikan sa Ginoo ug sa Iyang mga propeta.

Aron sa pagpasidaan mahitungod sa mga sangpotanan sa pagbiya gikan sa Ginoo ug sa pagsalikway sa Iyang mga propeta, migamit si Isaias og lain-laing mga pasumbingay. Kini naglakip sa yuta nga walay sulod (Isaias 24:1–12), nagasamparay (Isaiah 28:7–8), gigutom ug giuhaw (Isaias 29:7–10), ug usa ka guba nga kuta o ikakuha og tubig (Isaias 30:8–14). Gibase sa unsay imong nabasa dinhi niini nga mga bersikulo, ngano nga kini importante sa paghupot sa atong mga pakigsaad? Hunahunaa kon unsa ang imong gibuhat sa pagpabilin nga tinuod ngadto sa Ginoo ug sa Iyang mga sulugoon.

Tan-awa usab sa M. Russell Ballard, “Pabilin sa Sakayan ug Manggunit!” Liahona, Nob. 2014, 89–92.

Isaias 29; 30:18-26;35

Ang Ginoo makapahiuli og mga butang nga nawala o nabuak.

Kon ang mga katawhan o mga katilingban mobiya gikan sa Ginoo, gusto ni Satanas kanato nga mohunahuna nga ang mga sangpotanan dili mausab. Bisan pa niana, gihulagway ni Isaias ang pipila sa katingalahang mga butang nga buhaton sa Ginoo kon ang mga katawhan mohinulsol ug mobalik ngadto Kaniya. Unsa ang imong nakat-onan gikan sa Isaias 29:13–24; 30:18–26;35 mahitungod sa Ginoo, sa Iyang gugma, ug sa Iyang gahom?

Usa ka paagi nga ang Ginoo mipaila sa Iyang gahom sa atong panahon mao ang pinaagi sa Pagpahiuli sa Iyang ebanghelyo. Ang Isaias 29 naglangkob og daghang mga tudling nga adunay mga pagkasusama ngadto sa mga hitabo niana nga Pagpahiuli. Sama pananglit:

• Itandi ang Isaias 29:11–12 ngadto sa 2 Nephi 27:6–26 ug sa Joseph Smith—Kasaysayan 1:63–65.

• Itandi ang Isaias 29:13–14 ngadto sa Doktrina ug mga Pakigsaad 4 ug sa Joseph Smith—Kasaysayan 1:17–19.

• Itandi ang Isaias 29:18–24 ngadto sa ulohan nga pahina sa Basahon ni Mormon.

Unsa nga mga hunahuna o mga pagbati ikaw aduna mahitungod sa Pagpahiuli sa ebanghelyo samtang ikaw magbasa niini nga mga tudling?

Tan-awa usab “Ang Pagpahiuli sa Kahingpitan sa Ebanghelyo ni Jesukristo: Duha ka Gat[o]s ka Tuig nga Pamahayag ngadto sa Kalib[o]tan” (ChurchofJesusChrist.org).

Mga Ideya alang sa Pamilya nga Pagtuon sa Kasulatan ug Home Evening

Isaias 25:4–9.Nakasinati ba sukad ang imong pamilya og panalangin sa usa ka luwas nga kapasilongan atol sa usa ka unos o landong diha sa mainit nga adlaw sa ting-init? (tan-awa sa bersikulo 4). Paghisgot mahitungod niini samtang ikaw nagbasa niini nga mga bersikulo ug ubang mga paghulagway sa Ginoo nga makaplagan diha sa Isias 25:4–9. Sa unsang paagi nga ang Ginoo sama niini nga mga butanga?

Isaias 25:8–9; 26:19.Ang pagpakita og mga hulagway sa Manluluwas sa Getsemani, diha sa krus, ug human sa Iyang Pagkabanhaw makatabang sa imong pamilya sa pagkakita sa mga koneksyon tali niini nga mga bersikulo ug ni Jesukristo (tan-awa sa Libro sa mga Hulagway sa Ebanghelyo, mga nu. 56, 57, 58, 59). Dapita ang imong pamilya sa pagpakigbahin kon nganong sila “managmaya diha sa iyang kaluwasan” (Isaias 25:9).

Isaias 29:11–18.Kini nga mga bersikulo makatabang sa inyong pamilya sa paghisgot sa “katingalahan nga buhat ug usa ka kahibulongan” (bersikulo 14) sa Pagpahiuli sa ebanghelyo ug sa pagtungha sa Basahon ni Mormon. Ngano nga kining mga butanga katingalahan ug kahibulongan ngari kanato? Pagdapit og mga sakop sa pamilya sa pagpangita og mga butang diha sa inyong panimalay nga nagrepresentar sa katingalahang mga panalangin sa Pagpahiuli.

Isaias 35.Mahimo nga ang imong pamilya malingaw sa pagdrowing og mga hulagway sa mga imahe dinhi niini nga kapitulo nga nagtabang kanato sa pagsabot kon giunsa ni Jesukristo pagtukod ang Zion sa atong panahon. Unsa ang atong makat-onan gikan niini nga mga imahe? Unsa ang atong mabuhat aron makatabang sa pagtukod sa Zion?

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Matah[o]m nga Panahon sa Tingpamulak,” Songbook sa mga Bata, 57.

Pagpalambo sa Atong Pagtudlo

Tugoti ang mga bata nga mopadayag sa ilang pagkamamugnaon. Kon ang mga bata magmugna og usa ka butang nga kalabot ngadto sa usa ka baroganan sa ebanghelyo, kini nagtabang kanila nga mas makasabot sa baroganan. Tugoti sila sa paghimo, pagdrowing, pagkolor, pagsulat, ug pagmugna. (Tan-awa sa Pagtudlo Sumala sa Pamaagi sa Manluluwas,25.)

“Ania karon, kini mao ang atong Dios; kita nanaghulat kaniya, ug siya magaluwas kanato” (Isaias 25:9). James Tissot (French, 1836–1902). Babaye,Tan-awa ang Imong Anak (Stabat Mater), 1886–1894. Lagumon nga watercolor ibabaw sa abuhon nga papel, Imahe: 11.11/16 x 6 in. (29.7 x 15.2 cm). Brooklyn Museum, Purchased by public subscription, 00.159.300