“Septyembre 5–11. Isaias 1–12: ‘Ang Dios Mao ang Akong Kaluwasan,’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)
“Septyembre 5–11. Isaias 1–12,” Dali, Sunod Kanako—Alang sa mga Indibidwal ug mga Pamilya: 2022
Si Propeta Isaias Nagtagna sa Pagkatawo ni Kristo, ni Harry Anderson
Septyembre 5–11
Isaias 1–12
“Ang Dios Mao ang Akong Kaluwasan”
Paninguha og espiritwal nga giya samtang ikaw nagtuon. Ang mga pulong ni Isaias labing masabot kon kita “napuno sa espiritu sa panagna,” ingon sa gitudlo ni Nephi (2 Nephi 25:4).
Irekord ang Imong mga Impresyon
Bisan kon kini mao pa ang una nimong higayon sa pagbasa sa basahon ni Isaias, mahimong makakaplag ka og mga tudling sa kasulatan nga ingon og pamilyar. Kana tungod kay, sa tanang mga propeta sa Daang Tugon, si Isaias mao ang usa sa labing kanunay nga gikutlo sa ubang mga basahon sa kasulatan, lakip sa Manluluwas Mismo. Ang mga pulong usab ni Isaias makita kasagaran sa mga himno ug sa ubang sagrado nga musika. Nganong si Isaias gikutlo kanunay?
Sa tinuod bahin sa katarungan mao nga si Isaias adunay gasa sa pagpahayag sa pulong sa Dios sa tataw, halandomon nga pinulongan. Apan kini mas labaw pa niana. Nadasig ni Isaias ang mga propeta sulod sa mga henerasyon tungod kay ang mga kamatuoran nga iyang gitudlo milapas sa iyang kaugalingong henerasyon––ang mga Israelita nga nagpuyo tali sa 740 ug sa 701 BC. Ang iyang tahas mao ang pagtabang kanato sa pagsabot sa mahinungdanong buhat sa Dios sa kaluwasan, nga mas dako sa usa ka nasod o sa usa ka yugto sa panahon. Gikan ni Isaias, nakat-onan ni Nephi nga siya ug ang iyang mga katawhan, bisan og nabulag gikan sa nahibilin sa Israel, mga bahin gihapon sa mga katawhan sa pakigsaad sa Dios. Diha sa Isaias, ang mga tagsulat sa Bag-ong Tugon nakakaplag og mga panagna mahitungod sa Mesiyas nga nangatuman gayod. Ug diha sa Isaias, si Joseph Smith nakakaplag og inspirasyon alang sa ulahing adlaw nga buhat sa pagpundok sa Israel ug sa pagtukod sa Zion. Kon ikaw magbasa sa Isaias, unsa ang imong makaplagan?
Alang sa dugang pa mahitungod ni Isaias, tan-awa ang “Isaias” diha sa Giya ngadto sa mga Kasulatan. Alang sa impormasyon mahitungod sa panahon nga si Isaias nabuhi, tan-awa sa 2 Mga Hari 15–20 ug 2 Mga Cronicas 26–32.
Mga Ideya alang sa Personal Pagtuon sa Kasulatan
Unsaon nako nga mas makasabot sa mga pagtulon-an ni Isaias?
Maghisgot kabahin sa mga panulat ni Isaias, ang Manunubos miingon, “Mosiksik niini nga mga butang nga makugihon; kay mahinungdanon ang mga pulong ni Isaias” (tan-awa sa 3 Nephi 23:1–3). Apan ngadto sa kadaghanan, malisod nga masabtan ang Isaias. Ania ang pipila ka mga giya nga motabang kanimo sa pagpangita og mas maayong kahulogan sa mga pulong ni Isaias:
-
Pamalandonga ang mga simbolo ug mga pasumbingay nga gigamit ni Isaias. Sama pananglit, pamalandonga kon unsa sa imong hunahuna ang gusto nga isulti ni Isaias sa dihang iyang gisulat ang mahitungod sa ubasan (tan-awa sa Isaias 5:1–7), ang mga tubig sa Siloe (tan-awa sa Isaias 8:5–10), bandila (tan-awa sa Isaias 5:26), ug bandila (tan-awa sa Isaias 11:10,12).
-
Alang sa matag kapitulo nga imong basahon, pangutan-a ang imong kaugalingon, “Unsa ang akong nakat-onan mahitungod ni Jesukristo?” (tan-awa sa 1 Nephi 19:23).
-
Pangita alang sa mga hilisgotan nga maingon og may kalabotan sa atong panahon, sama sa kinabuhi ug misyon ni Jesukristo, ang pagkatibulaag ug pagpundok sa Israel, ang kataposang mga adlaw, ug ang Milenyum. Makahimo usab ikaw sa pagbaton og mga lista sa mga pakisayran gikan sa Isaias nga nagtudlo mahitungod niini nga mga hilisgotan.
-
Gamit og mga tabang sa pagtuon kon aduna, sama sa diksyonaryo, mga footnote sa Biblia, mga ulohan sa kapitulo, ug ang Giya ngadto sa mga Kasulatan.
Tan-awa usab sa 2 Nephi 25:1–8.
“Hunong na sa pagbuhat sa da[o]tan.”
Nagpadayon si Isaias sa pagpahimangno sa Gingharian sa Juda mahitungod sa ilang espiritwal nga kahimtang. Human mabasa ang Isaias 1, 3, ug 5, unsaon nimo sa paghulagway ang espiritwal nga kahimtang sa mga tawo? Unsa nga mga pasidaan ang imong makaplagan nga maingon og may kalabotan sa atong panahon?
Agi og dugang ngadto sa mga pahimangno, makahimo ka usab og mubo nga sulat sa mga mensahe sa paglaom alang sa makasasala nga Israel (tan-awa, sama pananglit, sa Isaias 1:16–20, 25–27; 3:10). Unsay inyong nakat-onan mahitungod sa Ginoo gikan niini nga mga mensahe?
Ang Dios mohimo og usa ka mahinungdanong buhat sa ulahing mga adlaw.
Daghan sa mga sinulat ni Isaias mga panagna nga adunay piho nga kahulogan sa atong panahon. Hain sa mga paghulagway ni Isaias sa ulahing mga adlaw diha sa mga kapitulo 2; 4; 11–12 ilabi ka makapadasig kanimo? (Ang Doktrina ug mga Pakigsaad 113:1–6 naghatag og makatabang nga mga panabot mahitungod sa Isaias11.) Unsa ang imong nakat-onan mahitungod sa pagpundok sa Israel ug sa kaluwasan sa Zion? Unsa ang imong gibati nga nadasig nga buhaton human mabasa kini nga mga kapitulo?
Tan-awa usab sa Isaias 5:26; 10:20.
Ang mga propeta tinawag sa Dios.
Sa kapitulo 6, giasoy ni Isaias ang iyang tawag nga mahimong propeta. Samtang ikaw nagbasa niini nga kapitulo, unsa ang nakapadani kanimo mahitungod sa unsay nasinati ni Isaias? Sa unsa nga paagi kini nga kapitulo nag-impluwensya sa paagi sa imong paghunahuna mahitungod sa Ginoo, sa Iyang mga propeta, ug sa buhat nga sila gitawag sa pagpabuhat?
“Kay alang kanato ang usa ka bata natawo, alang kanato ang usa ka anak nga lalaki gihatag (Isaias 9:6).
Si Isaias nanagna kabahin ni Jesukristo.
Sayo sa pangalagad ni Isaias, ang Gingharian sa Israel (usab gitawag og Ephraim) nakig-alyansa sa Syria aron sa pagpanalipod niini batok sa Asiria. Gusto sa Israel ug Syria nga pugson si Ahaz, ang hari sa Juda, nga moapil sa ilang alyansa. Apan gipanagna ni Isaias nga ang alyansa mapakyas ug gitambagan si Ahaz sa pagsalig diha sa Ginoo (tan-awa sa Isaias 7–9, ilabi na sa Isaias 7:7–9; 8:12–13).
Samtang gitambagan ni Isaias si Ahaz, mihimo siya og daghang nailhan nga mga panagna, sama niadtong makaplagan sa Isaias 7:14; 8:13–14; 9:2, 6–7. Samtang kini dili hingpit nga tataw kon unsa ang kahulogan niini nga mga panagna sa panahon ni Ahaz, kini tataw nga nagpasabot ngadto ni Jesukristo (tan-awa usab sa Mateo 1:21–23; 4:16; 21:44; Lucas 1:31–33). Unsa ang imong nakat-onan mahitungod sa Manluluwas gikan niini nga mga bersikulo?
Mga Ideya alang sa Pamilya nga Pagtuon sa Kasulatan ug Home Evening
-
Isaias 1:16–18.Aron sa pagtabang sa mga sakop sa pamilya nga masabtan kini nga mga bersikulo, makabasa ka sa seksyon “Ang Uban Kanato Mobati nga Dili Gay[o]d Igo ang Atong Kaayo” gikan sa mensahe ni Sister Sharon Eubank nga “Kristo: Ang Kahayag nga Nagdan-ag sa Kangitngit” (Liahona, Mayo 2019, 75). O makapakita ka ba kon unsaon pagkuha sa mga mansa gikan sa mga sapot. Sa unsang paagi nga ang mensahe sa Ginoo dinhi niini nga mga bersikulo lahi gikan sa unsay gusto ni Satanas kanato nga tuohan?
-
Isaias 2:1–5.Ang mga sakop sa pamilya makapili og usa niini nga mga bersikulo ug i-drowing kon unsay gihulagway niini. Unsa ang gitudlo sa templo kanato mahitungod sa pamaagi sa Ginoo? Giunsa kita sa pagpanalangin samtang kita “manlakaw sa kahayag sa Ginoo”? (Isaias 2:5).
-
Isaias 4:5–6.Unsa ang gisaad sa Ginoo kanato dinhi niini nga mga bersikulo? Unsa kaha ang gipasabot niini nga mga saad? Sa unsang paagi Siya nagtuman niini? (Tan-awa usab sa Exodo 13:21–22.)
-
Isaias 7:14; 9:1–7.Gamit ang mga drowing o mga hulagway gikan sa mga magasin sa Simbahan, makahimo ka og poster nga nagpakita sa pipila ka mga butang nga atong nakat-onan mahitungod ni Jesukristo gikan niini nga mga bersikulo.
Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.
Gisugyot nga awit: “Ibabaw sa Bukid,” Mga Himno, nu. 5.
Pagpalambo sa Personal nga Pagtuon
Pangayo og tabang sa Ginoo. Aron sa pagsabot sa mga kasulatan, nagkinahanglan kita og personal nga pagpadayag. Ang Ginoo nagsaad, “Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan” (Mateo 7:7).
Gitudlo ni Isaias nga ang tabernakulo mahimo nga “usa ka dalangpan” ug usa ka salipdanan gikan sa bagyo ug gikan sa ulan” (Isaias 4:6).Templo sa Idaho Falls Idaho