lalaki nagtuon sa mga kasulatan

Agosto 29–Septyembre 4

Mga Proverbio 1–4; 15–16; 22; 31; Ecclesiastes 1–3; 11–12

“Ang Pagkahadlok sa Ginoo maoy Sinugdan sa Kaalam”

Hunahunaa kon sa unsang paagi ang imong pagtuon sa Mga Proverbio ug sa Ecclesiastes makatabang kanimo “nga ikiling mo ang imong igdulungog ngadto sa kaalam, ug bansayon mo ang imong kasingkasing sa pagsab[o]t” (Mga Proverbio 2:2).

Irekord ang Imong mga Impresyon

Diha sa unang kapitulo sa basahon sa mga Proverbio, atong makaplagan kini nga mga pulong: “Anak ko, pamatia ang mga pahamangno sa imong amahan, ug ayaw pagbiyai ang pagtul[o]n-an sa imong inahan” (Mga Proverbio 1:8). Ang mga Proverbio atong matan-aw isip usa ka hugpong sa maalamong mga panultihon gikan sa usa ka mahigugmaong ginikanan, kansang labing importanting mensahe mao nga ang mga panalangin sa kalinaw ug kauswagan moabot ngadto niadtong kinsa naninguha og kaalam––ilabi na ang matang sa kaalam nga gitanyag sa Dios. Apan ang mga Proverbio gisundan sa basahon sa Ecclesiastes, nga ingon og nagsulti, “Kini dili ingon niana ka yano.” Ang Tigsangyaw nga gikutlo sa Ecclesiastes nakapaniid nga “gisingkamutan sa [iyang] kasingkasing ang pag-ila sa kaalam” apan sa gihapon nakaplagan ang “paghakop sa hangin ug “nagapadugang sa kasubo” (Ecclesiastes 1:17–18). Sa lain-laing mga paagi, ang basahon nangutana, “Makaangkon ba og tinuod nga kahulogan diha sa usa ka kalibotan diin ang tanan ingon og kawang, temporaryo, ug walay kasiguroan?”

Ug gani, samtang ang duha ka mga basahon nagtan-aw sa kinabuhi sa lain-laing mga panan-aw, kini nagtudlo og sama nga mga kamatuoran. Ang Ecclesiastes nagpadayag: “Atong paminawon ang panapos sa kinatibuk-ang butang: Kahadloki ang Dios, ug bantayi ang iyang mga sugo: kay kini mao ang tibuok nga katungdanan sa tawo” (Ecclesiastes 12:13). Kini mao ang samang baroganan nga makaplagan sa tibuok mga Proverbio: “Sumalig ka sa Ginoo sa bug-os mong kasingkasing. … Ayaw pagpakamaalamon sa imong kaugalingong mga mata: kahadlokan mo ang Ginoo” (Mga Proverbio 3:5, 7). Dili igsapayan kon unsay mahitabo sa imong kinabuhi, bisan kini ingon og makalibog ug sulagma, kini kanunay nga mas maayo kon kita mosalig diha ni Ginoong Jesukristo.

Alang sa kinatibuk-ang pagtan-aw niini nga mga basahon, tan-awa sa “Mga Proverbio, basahon sa” ug “Ecclesiastes” diha sa Giya ngadto sa mga Kasulatan.

icon sa personal nga pagtuon

Mga Ideya alang sa Personal nga Pagtuon sa Kasulatan

Mga Proverbio 1–4; 15–16

“Ikiling mo ang imong igdulungog ngadto sa kaalam.”

Ang basahon sa mga Proverbio napuno sa mga panabot mahitungod sa kaalam. Hunahunaa ang pagmarka sa pulong nga “kaalam” ug sa kalabot nga mga pulong, sama sa “kahibalo” ug “pagsab[o]t,” sa imong pagkaplag niini sa mga kapitulo 1–4 ug sa 15–16. Sa unsa nga paagi kini nga mga kapitulo nag-apekto sa paagi nga ikaw naghunahuna mahitungod sa kaalam? Gibase sa unsay imong nakaplagan, unsaon nimo sa paghulagway ang kaalam nga “ang Ginoo naghatag”? (Mga Proverbio 2:6). Hunahunaa kon giunsa nimo pagtinguha ang panabang sa Ginoo nga mahimong “manggialamon sa kasingkasing” (Mga Proverbio 16:21). Unsa nga mga panalangin ang nagagikan sa kaalam sa Dios?

Tan-awa usab sa Mga Proverbio 8–9; Mateo 7:24–27; 25:1–13.

Mga Proverbio 1:7; 2:5; 16:6; 31:30; Ecclesiastes 12:13

Unsa ang “pagkahadlok diha sa Ginoo”?

Si Elder David A. Bednar mipasabot: “Dili sama sa kalib[o]tanong kahadlok nga naghimo og alarma ug kakulba, ang diosnong kahadlok usa ka tinubdan sa kalinaw, kasiguroan, ug pasalig. … [Kini] naglukop sa lawom nga pagbati sa diosnong pagtah[o]d, pagrespeto, ug kataha alang ni Ginoong Jesukristo; pagkamasulundon sa Iyang mga sugo; ug ang pagpaab[o]t sa Katap[o]sang Paghukom ug hustisya diha sa Iyang kamot. … Ang diosnong kahadlok mao ang paghigugma ug pagsalig diha Kaniya” (“Busa sila Mihupay sa Ilang mga Kahadlok,” Liahona, Mayo 2015, 48–49).

Tan-awa usab sa Mga Proverbio 8:13.

Mga Proverbio 4

“Pataga ang alagianan sa imong mga tiil.”

Mga Proverbio 4 naghulagway sa kaalam ug pagkamatarong isip usa ka “alagianan” o usa ka “dalan” (tan-awa usab sa Mga Proverbio 3:5–6). Samtang nagbasa ka niini nga kapitulo, tingali makakaplag ka og mga tudling nga motabang kanimo sa pagpamalandong sa “alagianan sa imong mga tiil” (bersikulo 26) ug sa unsang paagi ang imong mga lihok nagdala kanimo nga mas duol ngadto sa Ginoo. Sama pananglit, unsa ang gitudlo sa mga bersikulo 11–12 ug 18–19 mahitungod sa mga panalangin sa pagsunod sa hustong alagianan? Unsa ang gipasabot sa mga bersikulo 26 ug 27 nganha kanimo?

Tan-awa usab sa 2 Nephi 31:18–21.

Mga Proverbio 15:1–2, 4, 18, 28; 16:24–32

“Ang tubag nga malumo makapahupay sa kapungot.”

Ang pipila sa mga proverbio sa mga kapitulo 15 ug 16 mahimong modasig kanimo sa pagpalambo sa paagi nga ikaw makigsulti sa uban, ilabi na sa mga minahal. Sama pananglit, paghunahuna og piho nga mga panahon nga ikaw makagamit unta og “tubag nga malumo” kay sa “pulong nga mahait” (Mga Proverbio 15:1). Giunsa sa tambag diha sa Mga Proverbio 16:24–32 pagtabang kanimo sa paghunahuna mahitungod sa mga pulong nga imong gamiton?

Hunahunaa kini nga panabot gikan ni Elder W. Craig Zwick: “Ang ‘tubag nga malumo’ tubag nga may katar[o]ngan––mabinantayong mga pulong gikan sa mapainubsanong kasingkasing. Wala ni magpasab[o]t nga dili ta makapamulong og direkta o ikompromiso ang doktrinal nga kamatuoran. Ang mga pulong nga may direktang impormasyon mamahimo nga usa ka malumo sa espiritu” (“Unsa May Imong Gihunahuna?” Liahona, Mayo 2014, 42).

babaye nagpakaon sa mga kanaway

Kinsay Makakaplag sa usa ka Babaye nga Takos?ll, ni Louise Parker

Mga Proverbio 31:10–31

“Ang usa ka babaye nga mahadlok sa Ginoo, siya pagadayegon.”

Mga Proverbio 31:10–31 naghulagway sa “usa ka takos nga babaye,” o sa usa ka babaye nga naghingapin ang espiritwal nga kalig-on, kasarang, ug gahom. Mahimong sulayan nimo ang pag-summarize sa imong kaugalingong mga pulong kon unsa ang gisulti sa matag usa niini nga mga bersikulo mahitungod kaniya. Unsa ang pipila sa iyang mga kinaiya nga ikaw makasunod?

Ecclesiastes 1–3;12

Ang mortal nga kinabuhi temporaryo.

Nganong bililhon alang kanimo ang paghinumdom nga daghan dinhi niini nga kalibotan, ingon nga gibarogan sa Ecclesiastes 1–2 “pasigarbo” (o temporaryo og kasagaran dili importante)? Unsa ang imong nakaplagan sa kapitulo 12 nga naghatag sa kinabuhi og mahangtorong bili?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mga Proverbio.Ang imong pamilya tingali malingaw sa paghimo sa inyong kaugalingong “basahon sa mga Proverbio”––usa ka hugpong sa maalamong tambag gikan sa mga kasulatan ug mga propeta sa ulahing mga adlaw.

Mga Proverbio 1:7; 2:5; 16:6; Ecclesiastes 12:13–14.Aron sa pagtabang sa mga sakop sa pamilya sa pagsabot sa Mga Proverbio 1:7; 2:5; 16:6; Ecclesiastes 12:13, tingali makatabang kini ang pagpuli sa pulong pagkahadlok sa mga pulong sama sa ligdong nga pagtahod, gugma, o pagkamasulundon (tan-awa usab sa Mga Hebreohanon 12:28). Sa unsang paagi kini nag-apekto sa paagi sa atong paghunahuna mahitungod niini nga mga bersikulo? Unsaon nato pagpakita ang atong balaang pagtahod sa Ginoo?

Mga Proverbio 3:5–7.Aron sa pagtabang sa mga miyembro sa pamilya sa paghanduraw kon unsa ang gitudlo niini nga mga bersikulo, mahimo nimo silang dapiton sa pagsandig sa usa ka butang nga lig-on ug dili matarog, sama sa usa ka bungbong. Dayon mahimo silang mosulay sa pagsandig sa usa ka butang nga dili lig-on, sama sa silhig. Nganong kinahanglan kitang “dili mosalig sa [atong] kaugalingong salabotan”? Unsaon nato pagpakita nga kita mosalig ni Jesukristo uban sa atong tibuok nga mga kasingkasing?

Mga Proverbio 15:1–2,18; 16:24, 32.Sa unsa nga paagi nga ang atong mga pulong nag-apekto sa panag-uyon sa atong panimalay? Tingali ang mga sakop sa pamilya mag-anad sa paghatag og “tubag nga malumo” ngadto sa “pulong nga mahait” ug mosulay sa paggamit kon unsay ilang nakat-onan sa ilang pagbinayloay og pulong o aksyon. Usa ka awit sama sa “Pagkamabination Magagikan Kanako” (Songbook sa mga Bata,83) makatabang sa paglig-on niini nga baroganan.

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Kon Asa ang Gugma,” Songbook sa mga Bata, 76–77.

Pagpalambo sa Personal nga Pagtuon

Ang mga pulong sa mga kasulatan magamit ngadto sa tanan. Ang pipila ka mga tudling sa kasulatan nagpasabot lamang ngadto sa mga lalaki o sa mga babaye lamang (sama sa Mga Proverbio 3:13; 31:10). Sa kadaghanang mga sitwasyon, hinoon, ang mga baroganan dinhi niini nga mga tudling sa kasulatan magamit ngadto sa tanan.

Jesus naggiya sa duha ka karnero sa kakahoyan

“Sa tanan nimong mga dalan ilha siya, ug siya magamando sa imong mga alagianan” (Mga Proverbio 3:6). Siya Naggiya Kanako, ni Yongsung Kim, havenlight.com