Si Kristo nga nakapula og kupo gilibotan sa nangluhod nga katawhan

Every Knee Shall Bow [Ang Tanang Tuhod Mangluhod], ni J. Kirk Richards

Agosto 22–28

Mga Salmo 102–103; 110; 116–119; 127–128; 135–139; 146–150

“Ipapagdayeg sa Tagsatagsa nga Adunay Gininhawa ang Ginoo”

Ang Salmo 119:105 nagtudlo nga ang pulong sa Dios “kahayag sa [imong] alagianan.” Samtang magbasa ka sa Mga Salmo, irekord ang mga hugpong sa mga pulong ug mga ideya nga midasig kanimo ug mitabang sa pagdan-ag sa imong agianan pabalik sa Langitnong Amahan.

Irekord ang Imong mga Impresyon

Ang tradisyonal nga Judeo nga ngalan alang sa basahon sa Mga Salmo mao ang usa ka Hebreohanong pulong nga nagpasabot og “mga pagdayeg.” Kana nga pulong, Tehillim, konektado usab sa singgit nga “hallelujah” (nagpasabot nga “dayegon si Jehova” o “dayegon ang Ginoo”). Kon papilion ka og usa ka pulong nga mosumada sa nag-unang mensahe sa Mga Salmo, ang “pagdayeg” usa ka maayo nga pagpili. Pipila sa Mga Salmo naglangkob og direkta nga pagdapit nga “dayegon ninyo ang Ginoo” (tan-awa ilabi na sa Mga Salmo 146–50), ug ang tanan niini makadasig og pagbati sa pagsimba ug pagdayeg. Ang Mga Salmo nagdapit kanato sa pagpamalandong sa gahom sa Ginoo, sa Iyang kalooy, ug sa mahinungdanong mga butang nga Iyang nabuhat. Dili gayod nato Siya kabayran alang sa bisan asa niini, apan makahimo kita sa pagdayeg Kaniya alang niini. Kana nga pagdayeg mahimong ipahayag sa lain-laing paagi sa lain-laing tawo—mahimong maglakip kini og pagpanganta, pag-ampo, o pagpamatuod. Kasagaran kining mosangpot ngadto sa mas lawom nga pasalig sa Ginoo ug sa pagsunod sa Iyang mga pagtulun-an. Bisan unsa man ang kahulugan sa “dayegon ninyo ang Ginoo” diha sa imong kinabuhi, makakaplag ka og dugang nga inspirasyon sa pagbuhat niini samtang mobasa ka ug mamalandong sa Mga Salmo.

icon sa personal nga pagtuon

Mga Ideya alang sa Personal nga Pagtuon sa Kasulatan

Mga Salmo 102–3; 116

Ang Ginoo makahupay kanako sa akong pag-antos.

Timan-i kon sa unsang paagi ang Salmo 102:1–11 naghulagway og mga pagbati sa kabalaka ug pag-inusara nga kasagarang moabot panahon sa mga kasakit. Tingali nakasinati ka sa ingon nga mga pagbati, ug kini nga mga paghulagway nakatabang kanimo nga mas makasabot sa imong mga kasinatian. O kini nga mga bersikulo tingali makatabang kanimo sa pagsabot sa mga pagbati sa uban nga nag-antos.

Samtang magbasa ka sa Mga Salmo 102:12–28; 103; 116, pangita og mga hugpong sa mga pulong nga naghatag kanimo og pagsalig nga ikaw “[makasangpit sa] ngalan sa Ginoo” sa imong mga pagsulay (Salmo 116:13). Mahimo nimong markahan, sag-ulohon, o ipaambit sa uban ang mga hugpong sa mga pulong nga naghatag kanimo og paglaom diha Kaniya.

Tan-awa usab sa Isaias 25:8; 2 Mga Taga-Corinto 1:3–7; Mga Hebreohanon 2:17–18; Alma 7:11–13; Evan A. Schmutz, “Ang Dios Mopahid sa Tanang mga Luha,” Liahona, Nob. 2016, 116–18.

Si Jesus nga nang-ayo

Healing [Pag-ayo], ni J. Kirk Richards

Mga Salmo 110; 118

Ang Mga Salmo makatudlo kanako ngadto sa Manluluwas.

Ang Mga Salmo naglangkob og mga tudling nga nagtudlo ngadto sa kinabuhi ug pangalagad ni Jesukristo. Kini ang pipila ka mga ehemplo:

• Salmo 110:1–4 (tana-wa sa Mateo 22:41–45; Mga Hebreohanon 5:4–10; 6:20)

• Salmo 118:22 (tan-awa sa Mateo 21:42; Mga Buhat 4:10–11; 1 Pedro 2:7)

• Salmo 118:25–26 (tan-awa sa Mateo 21:9)

Unsa nga mga kamatuoran ang gitudlo niini nga mga bersikulo kanimo mahitungod ni Jesukristo? Sa unsang paagi ang pagkahibalo niini nga mga kamatuoran mopanalangin kanimo?

Samtang magbasa ka sa Mga Salmo niining semanaha, padayon sa paghimo og mugbong sulat sa ubang mga tudling nga nagtudlo kanimo mahitungod sa Manluluwas. Mahimo ka usab nga mobasa o maminaw sa pipila sa imong paborito nga mga himno nga makatabang kanimo sa paghunahuna mahitungod Kaniya.

Salmo 119

Ang pulong sa Dios magpabilin kanako diha sa Iyang dalan.

Kini nga salmo naglangkob og daghang hugpong sa mga pulong nga nagtandi sa atong kinabuhi ngadto sa usa ka panaw pabalik sa Langitnong Amahan. Samtang magbasa ka, pangita og mga pulong sama sa lakaw, agianan, dalan, tiil, ug mahisalaag. Pamalandongi ang imong kaugalingong panaw sa kinabuhi—asa ka gikan, asa na ka karon, ug unsa nga direksyon ang imong padulngan. Unsa ang imong nakat-unan gikan niini nga salmo mahitungod sa imong panaw sa pagpauli? Sumala niini nga salmo, unsa ang gihatag sa Dios aron sa pagtabang kanimo nga magpabilin sa saktong dalan?

Tingali mainteresado ka nga masayod nga sa orihinal nga Hebreo, ang unang walo ka bersikulo sa Salmo 119 nagsugod sa unang letra sa Hebreohanon nga alpabeto. Ang nagsunod nga walo ka bersikulo nagsugod sa sunod nga letra, ug mipadayon kini hangtod sa kataposan sa alpabeto.

Tan-awa usab sa Isaias 42:16; 2 Nephi 31:17–21; Alma 7:19–20.

Mga Salmo 134–36

Ang Ginoo mas gamhanan kay sa bisan unsang dios-dios.

Timan-i ang mga rason nga gihatag diha sa Salmo 135:15–18 kon nganong binuang ang mosalig sa mini nga mga dios-dios. Unsa kaha ang tintalon ka sa pagsalig nga susama sa mga dios-dios nga gihulagway niini nga mga bersikulo?

Mahimo ka nga mohimo og lista sa gamhanang mga butang nga mahimo sa Ginoo, sama sa gihulagway diha sa Mga Salmo 134–36. Unsa nga gamhanang mga butang ang Iyang nahimo alang kanimo?

Mga Salmo 146–50

“Dayegon ninyo ang Ginoo.”

Samtang magbasa ka niining kataposang mga salmo sa pagdayeg, paghunahuna og imong mga rason sa pagdayeg sa Ginoo. Nganong importante man nga modayeg Kaniya? Unsa ang mga paagi nga makadayeg ka Kaniya?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Salmo 119:105.Tingali ang inyong pamilya makahimo og agianan ug molakaw subay niini sa ngitngit, mogamit og suga sa pagdan-ag sa dalan sa unahan. Samtang manglakaw mo, mahimo ka nga mangutana og sama sa “Unsa ang naa sa atong kinabuhi nga susama niining kangitngit?” o “Sa unsang paagi ang pulong sa Dios sama sa kahayag?” Ang pagkanta og usa ka awit mahitungod sa kahayag sa Dios, sama sa “Tudloi Ko Paglakaw sa Kahayag” (Songbook sa mga Bata, 70–71), makatabang kanimo sa paglig-on sa baruganan nga gitudlo diha sa Salmo 119:105.

Mga Salmo 127–28.Unsa ang gipasabut nga ang Ginoo motabang kanato sa “[pag]tukod sa [atong] balay”? (Salmo 127:1). Sa unsang paagi nga mas malakip nato Siya sa atong mga paningkamot sa paghimo og matarong nga panimalay? Aron sa pagtabang sa imong pamilya sa pagtubag niini nga pangutana, mahimo ka nga modrowing og usa ka balay diha sa usa ka piraso nga papel ug gunting-guntingon kini aron mahimong mga piraso sa puzzle. Sa luyo sa matag piraso, ang mga sakop sa pamilya mahimong mosulat o modrowing og mga paagi sa paghimo sa Ginoo nga parte sa inyong panimalay. Dayon inyong sulbaron ang puzzle. Unsa pa ang atong makita dinhi niini nga mga salmo nga nagdasig kanato sa paglakaw sumala sa mga pamaagi sa Ginoo?

Salmo 139.Human mobasa sa mga bersikulo 1–4, ang mga sakop sa pamilya mahimong maghisgot kon giunsa nila pagkasayod nga ang Dios nakaila kanila sa personal (tan-awa usab sa mga bersikulo 14–15, 23–24).

Mga Salmo 146–50.Mahimo nimong dapiton ang imong pamilya sa pagbasa og kusog sa pipila ka bersikulo sa Mga Salmo 146–50, maningkamot nga mapadayag ang mga pagbati sa tigsulat. Unsaon nato sa pagpahayag sa atong pagdayeg sa Ginoo? Ang mga sakop sa pamilya tingali malingaw sa pagsulat og ilang kaugalingong mga salmo sa pagdayeg ug sa pagpaambit niini sa usag usa.

Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.

Gisugyot nga awit: “Tudloi Ko Paglakaw sa Kahayag,” Songbook sa mga Bata, 70–71.

agianan sa lasang

“Mandoi ako sa dalan sa imong mga sugo; kay niini anaa ang akong kalipay” (Salmo 119:35).