“Agosto 8–14. Mga Salmo 1–2; 8; 19–33; 40; 46: ‘Ang Ginoo Mao ang Akong Magbalantay,’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)
“Agosto 8–14. Mga Salmo 1–2; 8; 19–33; 40; 46,” Dali, Sunod Kanako—Alang sa mga Indibidwal ug mga Pamilya: 2022
The Lord Is My Shepherd [Ang Ginoo Mao ang Akong Magbalantay], ni Yongsung Kim, havenlight.com
Agosto 8–14
Mga Salmo 1–2; 8; 19–33; 40; 46
“Ang Ginoo Mao ang Akong Magbalantay”
Ayaw batia nga gilimitahan ka diha sa pinili nga mga Salmo og mga baruganan nga gisugyot niini nga latid. Tugoti ang Espiritu nga mogiya kanimo ngadto sa mga kamatuoran nga makatabang nimo nga mobati nga mas duol sa Ginoo.
Irekord ang Imong mga Impresyon
Wala kita mahibalo sa eksakto kon kinsa ang nagsulat sa Mga Salmo. Ang uban gipasidungog ngadto kang Hari David, apan alang sa kadaghanan kanila, ang mga tigsulat nagpabilin nga wala hiilhi. Apan human mabasa ang Mga Salmo, tingali atong bation nga daw nasayod kita sa mga kasingkasing sa mga tagsulat sa Mga Salmo, bisan og wala kita masayod sa ilang mga ngalan. Ang atong nasayran nga ang Mga Salmo importante nga bahin sa pagsimba tali sa mga Israelihanon, ug nasayod kita nga ang Manluluwas kanunay nga mokutlo niini. Diha sa Mga Salmo, klaro natong masabtan ang kalag sa karaang katawhan sa Dios. Atong makita kon unsa ang ilang gibati mahitungod sa Dios, unsa ang ilang gikabalak-an, ug giunsa nila pagkakaplag og kalinaw. Isip mga tumutuo karon, sa tibuok kalibutan, mogamit gihapon kita niini nga mga pulong sa atong pagsimba sa Dios. Ang mga tigsulat sa Mga Salmo daw klaro usab nga nakasabot sa atong mga kalag ug daw nakakita og paagi sa pagpahayag sa unsay atong gibati mahitungod sa Dios, unsa ang atong gikabalak-an, ug unsaon nato sa pagkakaplag og kalinaw.
Alang sa kinatibuk-ang pagpasabot sa basahon sa Mga Salmo, tan-awa ang “Salmo, Mga diha sa Giya ngadto sa mga Kasulatan.
Mga Ideya alang sa Personal nga Pagtuon sa Kasulatan
Mga Salmo 1; 23; 26–28; 46
Ang Mga Salmo nagtudlo kanato sa pagsalig sa Ginoo.
Tingali imong mabantayan samtang magbasa ka sa Mga Salmo kon unsa kasagad ang mga tigsulat mipahayag og kahadlok, kaguol, o kabalaka. Ang ingon nga mga pagbati normal ra, bisan sa mga tawo nga adunay pagtuo. Apan ang nakapahimo sa Mga Salmo nga makadasig mao ang mga solusyon nga gitanyag niini, lakip ang hingpit nga pagsalig diha sa Ginoo. Ikonsiderar kining makadasig nga mga mensahe samtang magbasa ka sa Mga Salmo 1; 23; 26–28; 46. Bantayi ang mosunod, ug isulat ang imong madiskobrihan:
-
Mga pagdapit nga mosalig sa Ginoo:
-
Mga pulong nga naghulagway sa Ginoo:
-
Mga pulong nga naghulagway sa kalinaw, kalig-on, ug ubang mga panalangin nga Iyang gihatag:
-
Mga pulong nga naghulagway niadtong misalig Kaniya:
Ang Mga Salmo naggiya sa atong mga hunahuna ngadto sa kinabuhi ug pangalagad ni Jesukristo.
Pipila sa Mga Salmo naghisgot sa mortal nga kinabuhi ni Jesukristo. Ang mga Kristiyano sa kapanahonan sa Bag-ong Tugon nakakita usab niini nga mga koneksyon—pananglitan, ilang giila diha sa Salmo 2 ang usa ka paghisgot sa mga pagsulay ni Jesus sa atubangan ni Hari Herodes ug Poncio Pilato (tan-awa sa Mga Buhat 4:24–30). Ikonsiderar ang pagbasa sa Mga Salmo 2 ug 22 lakip sa Mateo 27:35–46; Lucas 23:34–35; ug Juan 19:23–24. Pangita og mga koneksyon tali sa mga pulong niini nga mga salmo ug sa kinabuhi sa Manluluwas, ug padayon sa pagpangita og susama nga mga koneksyon samtang magtuon ka sa basahon sa Mga Salmo sa mosunod nga pipila ka semana.
Ihanduraw nga usa ikaw ka Judeo sa panahon ni Jesus kinsa pamilyar sa Mga Salmo ug nakakita og mga koneksyon ngadto sa kinabuhi sa Manluluwas. Sa unsang paagi nga kini nga kahibalo nahimong usa ka panalangin alang kanimo?
Tan-awa usab sa Mga Salmo 31:5; 34:20; 41:9; Lucas 24:44; Mga Hebreohanon 2:9–12.
Mga Salmo 8; 19; 33
“Ang yuta napuno sa mahigugmaong-kalolot sa Ginoo.”
Ang pagbasa sa Mga Salmo 8; 19; ug 33 mahimong modasig kanimo sa paghunahuna sa daghang talagsaong mga nilalang sa Ginoo. Hatagi og pagtagad ang imong mga hunahuna ug mga pagbati samtang imong buhaton. Sa unsang paagi ang mga nilalang sa Ginoo “nagapahayag sa himaya sa Dios” nganha kanimo? (Salmo 19:1).
Ang pulong sa Ginoo gamhanan, “nga nagalipay sa kasingkasing.”
Sa Mga Salmo, ang mga pulong sama sa pagpamatuod, mga balaod, sugo, ug mga paghukom mahimong nagpasabot sa pulong sa Ginoo. Timan-i kana samtang magbasa ka sa Salmo 19:7–11. Unsa ang gisugyot niini nga mga bersikulo kanimo mahitungod sa pulong sa Dios? Unsa ang gitudlo sa Salmo 29 kanimo mahitungod sa Iyang tingog? Sa imong kasinatian, sa unsang paagi ang pulong o tingog sa Ginoo mitakdo niini nga mga paghulagway?
Kinahanglang limpyo ug putli kita sa espirituhanong paagi aron makasulod sa presensya sa Ginoo.
Ang pagsulod diha sa presensya sa Ginoo nagkinahanglan og kaputli.
Tungod kay ang templo sa Jerusalem gitukod sa usa ka bungtod, ang mga pulong nga “bungtod sa Ginoo” (Salmo 24:3) mahimong nagpasabot sa templo o sa presensya sa Dios. Unsa ang nadugang niini sa imong pagsabut sa Salmo 24? Unsa ang gipasabut diha kanimo sa pagbaton og “malinis og mga kamot ug may usa ka putli nga kasingkasing”? (Salmo 24:4).
Unsa ang gitudlo sa Mga Salmo 26 ug 27 kanimo mahitungod sa balay sa Ginoo?
Tan-awa usab sa Salmo 15; David A. Bednar, “Limpyo nga mga Kamot ug Putli nga Kasingkasing,” Liahona, Nob. 2007, 80–83.
Mga Ideya alang sa Pamilya nga Pagtuon sa Kasulatan ug Family Home Evening
-
Salmo 22.Samtang ang usa ka sakop sa pamilya mobasa niini nga salmo, ang uban mangita og mga pagkasusama diha sa Mateo 27:35–46. Dayon mahimo silang mopaambit sa ilang mga pagbati mahitungod ni Jesukristo ug sa Iyang sakripisyo alang kanato.
-
Salmo 23.Ang Salmo 23 mao ang inspirasyon alang sa pipila ka himno, sama sa “Ang Dios ang Akong Magbalantay” ug “Ginoo Nako Moandam” (Mga Himno, nu. 61, 62). Tingali ang inyong pamilya ganahan nga mokanta sa usa niini nga mga himno ug moila og mga pulong diha sa salmo nga tingali nakadasig sa mga pulong sa awit. O tingali malingaw sila nga magdrowing og mga hulagway sa usa ka butang nga ilang nakita diha sa salmo o himno ug ipatag-an sa mga sakop sa pamilya ang mga bersikulo o mga pulong sa awit nga motukma sa mga hulagway. Sa unsang paagi nga ang Ginoo sama sa usa ka magbalantay ngari kanato?
-
Salmo 24:3–5.Aron mahatagan og gibug-aton ang kaimportante sa pagbaton og limpyo nga mga kamot ug usa ka putli nga kasingkasing, mahimo nimong basahon ang Salmo 24:3–5 samtang ang mga sakop sa pamilya manghunaw sa ilang mga kamot. Unsa kaha ang girepresentar sa mga kamot niini nga salmo? Unsa kaha ang gisimbolohan sa kasingkasing? Unsa ang atong mabuhat aron espirituhanong malimpyohan ang atong mga kamot ug maputli ang atong kasingkasing?
-
Salmo 30:5, 11.Ang Salmo 30:5 naglangkob sa saad nga “ang paghilak mopabilin sa kagabhion, apan ang kalipay moabot sa kabuntagon.” Sa unsang paagi nga gihimo sa Ginoo nga kalipay ang atong kagul-anan? Ang ubang mga sakop sa pamilya tingali malingaw sa pagdrama-drama sa unsay gihulagway sa bersikulo 11.
-
Salmo 33.Timan-i kon pila ka higayon nga gigamit ang pulong nga tanan dinhi niini nga salmo. Unsa ang atong makat-unan mahitungod sa Ginoo gikan sa pabalik-balik nga paggamit niini nga pulong, ilabi na diha sa mga bersikulo 13–15?
-
Salmo 46:10.Mahimong magdungan kamo sa pagbuhat og usa ka butang nga magkinahanglan sa mga sakop sa pamilya nga “humilom.” Sa unsang paagi ang paghilom makatabang kanato nga makaila sa Dios? Unsa nga mga oportunidad ang aduna kita aron maghilom ug makaila sa Dios?
Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.
Gisugyot nga awit: “Ang Dios ang Akong Magbalantay,” Mga Himno, nu. 61.
Pagpalambo sa Personal nga Pagtuon
Pagmamugnaon. Ang mga kasulatan sama sa Mga Salmo sa kasagaran makadasig sa mga tawo sa pagdayeg sa Ginoo sa mamugnaong mga paagi. Kon natandog ka sa pagpahayag sa imong debosyon pinaagi sa musika, balak, biswal nga arte, o ubang mga paagi, sunda kana nga mga pagbati. Ikonsiderar ang pagpaambit sa unsay imong namugna aron sa pagtabang sa uban nga makapalig-on sa pagtuo diha sa Langitnong Amahan ug ni Jesukristo.
The Good Shepherd [Ang Maayong Magbalantay], ni Ken Spencer