The Judgments of Job [Ang mga Paghukom mahitungod ni Job], ni Joseph Brickey

Agosto 1–7

Job 1–3; 12–14; 19; 21–24; 38–40; 42

Mosalig Gihapon Ako Kaniya

Samtang magbasa ka mahitungod ni Job, ang Espiritu mogiya kanimo sa pagdiskobre og importante nga mga kamatuoran nga mahinungdanon kanimo. Isulat ang imong madiskobre, ug pamalandongi kon sa unsang paagi kini nga mga kamatuoran magamit kanimo.

Irekord ang Imong mga Impresyon

Natural lang nga maghunahuna nganong ang daotang mga butang mahitabo sa maayong mga tawo—o sa laing punto, nganong ang maayong mga butang mahitabo sa daotan nga mga tawo. Ngano man nga ang Dios, kinsa makiangayon, motugot niana? Ang mga pangutana nga sama niini masuhid pinaagi sa kasinatian ni Job, usa niadtong maayong mga tawo nga adunay nahitabong daotan nga mga butang. Tungod sa mga pagsulay ni Job, ang iyang mga higala naghunahuna kon tinuod ba gayod siya nga maayo. Gibarogan ni Job ang iyang kaugalingong pagkamatarong ug nangutana kon tinuod ba gayod nga makiangayon ang Dios. Apan bisan sa iyang pag-antos ug pangutana, gipadayon ni Job ang iyang kaligdong ug pagtuo diha ni Jesukristo. Sa basahon ni Job, ang pagtuo gipangutana ug gisulayan apan wala sa hingpit gibiyaan. Wala kini magpasabot nga ang tanang pangutana gitubag. Apan ang basahon ni Job nagtudlo nga hangtod nga matubag kini, ang mga pangutana ug pagtuo mahimong magdungan sa samang higayon, ug bisan unsa pa ang nahitabo sa kasamtangan, makasulti kita mahitungod sa Ginoo, “Mosalig gihapon ako Kaniya” (Job 13:15).

Alang sa kinatibuk-ang pagpasabut sa basahon sa Job, tan-awa sa “Job” sa Giya ngadto sa mga Kasulatan (scriptures.ChurchofJesusChrist.org).

Mga Ideya alang sa Personal nga Pagtuon sa Kasulatan

Job 1–3; 12–13

Ang akong pagsalig sa Langitnong Amahan ug ni Jesukristo makatabang kanako nga magpabiling matinud-anon sa tanang kahimtang.

Ang pangbukas nga mga kapitulo sa Job gituyo aron sa paghatag og gibug-aton sa tahas ni Satanas isip atong kaaway o tig-akusar, dili aron sa paghulagway kon sa unsang paagi ang Dios ug si Satanas tinuod nga magsultihanay. Samtang magbasa ka sa mga pangangkon ni Satanas mahitungod ni Job (tan-awa sa Job 1:9–11; 2:4–5), mahimong mamalandong ka kon masulti ba usab kini mahitungod kanimo. Mahimong mangutana ka sa imong kaugalingon, Unsa man ang akong mga rason sa pagpabiling matinud-anon sa Dios? Pamalandongi ang mga pagsulay nga gihatag kang Job ug ang iyang mga tubag (tan-awa sa Job 1:20–22; 2:9–10). Unsa ang imong nakat-onan gikan kaniya nga makatabang kanimo sa pagtubag sa imong mga hagit?

Bisan og si Job naningkamot nga magpabiling matinud-anon, ang iyang mga pagsulay ug iyang pag-antos mipadayon (tan-awa ang iyang mga pagbangotan diha sa kapitulo 3). Gani, daw misamot ang iyang pag-antos, ug ang iyang mga higala misugyot nga ang Dios nagsilot kaniya (tan-awa sa Job 4–5; 8; 11). Samtang magbasa ka sa usa ka bahin sa tubag ni Job diha sa mga kapitulo 12–13, hunahunaa kon unsa ang nahibaloan ni Job mahitungod sa Dios nga nakapahimo kaniya nga mopadayon sa pagsalig, bisan sa iyang pag-antos ug wala matubag nga mga pangutana. Unsa ang imong nahibaloan mahitungod sa Dios nga nakatabang kanimo sa pagsagubang og mga hagit? Sa unsang paagi nimo nasayran kini nga mga kamatuoran, ug sa unsang paagi kini milig-on sa imong pagtuo?

Job 19

Si Jesukristo mao ang akong Manunubos.

Usahay ang labing importante nga mga kamatuoran ipadayag kanato taliwala sa atong grabe nga mga kasakit. Pamalandongi ang mga pagsulay nga gihulagway ni Job diha sa Job 19:1–22 ug ang mga kamatuoran nga iyang giproklamar diha sa Job 19:23–27. Dayon pamalandongi kon giunsa nimo sa pagkasayod nga ang imong Manunubos buhi. Unsa nga kalainan ang mahimo niini nga kahibalo kon makasinati ka og lisod nga mga pagsulay?

Tan-awa usab sa Doktrina ug mga Pakigsaad 121:1–12; 122.

Job, ni Gary L. Kapp

Job 21–24

“Sa diha nga ako masulayan na niya, mogula ako ingon sa bulawan.”

Samtang magbasa ka pa og dugang mahitungod sa lantugi tali ni Job ug sa iyang mga higala kalabot sa mga rason luyo sa pag-antos ni Job, tingali maghunahuna ka unsaon nimo pagtubag ang pangutana nga maoy sentro sa ilang paglantugi: Nganong ang matarong usahay mag-antos man ug ang daotan usahay dili masilotan? Hunahunaa kini samtang magbasa ka sa Job 21–24. Unsa ang imong nahibaloan mahitungod sa Langitnong Amahan ug sa Iyang plano nga makatabang sa paghatag og mga tubag? Tan-awa, sama pananglit, sa 2 Nephi 2:11–13; Mosiah 23:21–23; 24:10–16; Abraham 3:22–26; Dallin H. Oaks, “Oposisyon sa Tanang mga Butang,” Liahona, Mayo 2016, 114–17.

Tan-awa usab sa L. Todd Budge, “Makanunayon ug Lig-on nga Pagsalig,” Liahona, Nob. 2019, 47–49.

Job 38; 40; 42

Ang panglantaw sa Dios mas dako kay sa akong panglantaw.

Nahigawad sa mga pag-akusar sa iyang mga higala (tan-awa sa Job 16:1–5; 19:1–3), si Job pabalik-balik nga nag-ampo sa Dios nga nagtinguha og pagpasabot sa iyang pag-antos (tan-awa sa Job 19:6–7; 23:1–9; 31). Si Elder Neal A. Maxwell nakaobserbar nga “kon wala gayod kitay pailob sa panahon sa usa ka Dios nga nahibalo sa tanan,” nga daw ingon niini si Job, “niana nagsugyot gayod kita nga nahibalo kita sa unsay labing maayo. Makatingala, dili ba—kita nga nagsul-ob og mga relo de pulso nagtinguha sa pagtambag Niya nga maoy nagdumala sa mga orasan ug mga kalendaryo sa uniberso” (“Hope through the Atonement of Jesus Christ,” Ensign, Nob. 1998, 63). Pamalandongi kini nga mga pulong samtang magbasa ka sa tubag sa Dios ngadto ni Job diha sa mga kapitulo 38 ug 40. Unsa nga mga kamatuoran ang Iyang gitudlo kang Job? Nganong importante man nga atong mahibaloan kini nga mga kamatuoran samtang manlimbasog kita sa kalisdanan ug mga pangutana dinhi sa mortalidad? Unsa ang nagustohan nimo mahitungod sa tubag ni Job diha sa Job 42:1–6?

Mga Ideya alang sa Pamilya nga Pagtuon sa Kasulatan ug Family Home Evening

Job 1:20–22.Aron masabtan kon unsa ang gibati ni Job, sumala sa gihulagway dinhi niini nga mga bersikulo, ang inyong pamilya mahimong mobasa sa “Job” diha sa Mga Istorya sa Daang Tugon o modrama-drama sa Job 1:13–22. Unsa ang atong makat-onan gikan sa ehemplo ni Job?

Job 14:14.Unsaon nato pagtubag ang pangutana ni Job dinhi niini nga bersikulo? Sa unsang paagi ang Alma 11:42–44 makatabang kanato?

Job 16:1–5.Susama ba kita sa mga higala ni Job, kinsa mihukom ug misaway ni Job sa dihang nanginahanglan siya og paghupay? (tan-awa sa Job 16:1–4; tan-awa usab sa John 7:24). Sa unsang paagi ang atong mga pulong makapalig-on sa uban panahon sa ilang kagul-anan? (tan-awa sa Job 16:5).

Job 19:23–27.Human mobasa niini nga mga bersikulo, ang mga sakop sa pamilya mahimong mopaambit kon giunsa nila sa pagkasayod nga ang atong Manunubos buhi. Mahimong magtambayayong kamo sa pagbutang sa inyong mga pulong sa pagpamatuod (o drowing sa mga bata sa Manluluwas) diha sa usa ka basahon, sama sa journal sa pamilya (tan-awa sa bersikulo 23). Mahimo usab kamong manganta og usa ka awit nga nagpamatuod sa Manluluwas, sama sa “Buhi ang Manunubos Ko, Niini Nasayud Ako” (Mga Himno, nu. 80), ug mopaambit og mga hugpong sa mga pulong nga nakapalig-on sa inyong pagtuo Kaniya.

Job 23:8–11.Unsa ang gipasabot nga “mogula” gikan sa atong mga pagsulay “ingon sa bulawan”? Kinsa ang atong nailhan nga nakabuhat niini? Ang mga bata tingali malingaw sa paghimo og butang nga sulatan sa mga pulong gikan sa bersikulo 10. Mahimo usab ninyong hisgotan kon sa unsang paagi nabuntog ni Jesukristo ang Iyang mga pagsulay (tan-awa sa Lucas 22:41–44; Doktrina ug mga Pakigsaad 19:16–19).

Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.

Gisugyot nga awit: “Buhi ang Akong Manunubos,” Mga Himno, nu. 79.

Pagpalambo sa Personal nga Pagtuon

Paghanduraw. Ang makahuluganon nga mga ideya mahimong moabot samtang atong ihanduraw ang atong kaugalingon nga anaa sa mga sitwasyon nga susama diha sa mga kasulatan. Sama pananglit, ang pagbutang sa imong kaugalingon diha sa sitwasyon ni Job makatabang kanimo sa pagpamalandong sa imong relasyon sa Langitnong Amahan ug ni Jesukristo.

Job and His Friends [Si Job ug ang Iyang mga Higala], ni Ilya Repin