Si Jesus nga naggunit og lampara

Saving That Which Was Lost [Pagluwas Nianang Nawala], ni Michael T. Malm

Agosto 15–21

Mga Salmo 49–51; 61–66; 69–72; 77–78; 85–86

“Igapahayag Ko Kaninyo ang Gibuhat Niya alang sa Akong Kalag”

Kini nga latid nag-ila sa pipila sa mga hilisgotan sa doktrina nga gihisgotan dinhi niini nga mga salmo. Samtang magtuon ka, adunay piho nga mga pulong, imahe, o ideya nga tingali makakuha sa imong pagtagad. Unsay imong gibati nga gustong itudlo sa Ginoo kanimo?

Irekord ang Imong mga Impresyon

Ang mga tigsulat sa Mga Salmo mipaambit og lawom nga personal nga mga pagbati sa ilang mga balak. Misulat sila mahitungod sa pagbati nga mawad-an og kadasig, mahadlok, ug magbasol. Usahay, daw mibati pa gani sila nga gibiyaan sa Dios, ug ang ubang salmo nagpahayag og pagbati sa kahigawad o kawalay paglaom. Kon nakasulay ka og mga pagbati nga sama niini, ang pagbasa sa Mga Salmo makatabang kanimo nga masayod nga wala ka mag-inusara. Apan makakita ka usab og mga salmo nga makaawhag kanimo kon aduna ka niana nga mga pagbati, tungod kay ang mga tagsulat sa salmo midayeg usab sa Ginoo sa Iyang kaayo, nahingangha sa Iyang gahom, ug naglipay sa Iyang kalooy. Nasayod sila nga ang kalibutan nabug-atan sa daotan ug sala apan ang Ginoo “maayo man, ug andam sa pagpasaylo” (Salmo 86:5). Nakasabot sila nga ang pagbaton og pagtuo diha sa Ginoo wala magpasabot nga dili na ka manlimbasog sa kabalaka, sala, o kahadlok. Nagpasabot kini nga nasayod ka Kinsa ang duolon kon manlimbasog.

icon sa personal nga pagtuon

Mga Ideya alang sa Personal nga Pagtuon sa Kasulatan

Mga Salmo 49; 62:5–12

Ang katubsanan moabot lamang pinaagi ni Jesukristo.

Ang Salmo 49 adunay mensahe alang sa “mga tawong ubos ug mga dungganan, kabus ug adunahan” (bersikulo 2). Unsa man kini nga mensahe? Unsa ang imong gibati nga nadugang sa Salmo 62:5–12 niana nga mensahe?

Ang pagbasa niini nga mga salmo tingali moaghat kanimo sa pagpamalandong sa mga paagi nga ang ubang tawo mobutang sa ilang pagsalig sa usa ka butang kay sa Dios alang sa katubsanan (tan-awa sa Salmo 49:6–7). Sa unsang paagi ang imong kinabuhi naimpluwensyahan sa imong pagpamatuod nga “pagalukaton sa Dios ang [imong] kalag gikan sa gahom sa lubnganan”? (bersikulo 15).

Tan-awa usab sa Mga Proverbio 28:6; Alma 34:8–17.

Mga Salmo 51; 85–86

Tungod sa kalooy sa Manluluwas, mapasaylo ako sa akong mga sala.

Ang mga pangamuyo alang sa kalooy diha sa Salmo 51 giingon nga gihimo ni Hari David, kinsa sad-an sa pagpanapaw ug pagpatay (tan-awa sa 2 Samuel 11). Bisan kon ang atong mga sala dili kaayo bug-at, makasabot kita sa panginahanglan sa kalooy nga gipahayag niini nga salmo. Aduna usab kitay makat-onan kon unsay gipasabot sa paghinulsol. Sama pananglit, unsa nga mga pulong ug hugpong sa mga pulong diha sa Salmo 51 ang nagtudlo kanimo mahitungod sa kinaiya nga atong gikinahanglan aron maghinulsol? Unsa ang imong nakat-onan mahitungod sa mahimong epekto sa Pag-ula sa Manluluwas diha sa imong kinabuhi?

Mahimo usab nga mangutana ka sa samang mga pangutana samtang magbasa ka sa Mga Salmo 85–86. Mahimo usab nga mangita ka og mga hugpong sa mga pulong nga naghulagway sa Ginoo. Sa unsang paagi kini nga mga pulong nakalig-on sa imong pagtuo nga Siya mopasaylo kanimo? (tan-awa, sama pananglit, sa Salmo 86:5, 13, 15).

Tan-awa usab sa Alma 36; Russell M. Nelson, “Kita Makabuhat og Mas Maayo pa ug Mahimong mas Maayo,” Liahona, Mayo 2019, 67–69; Carole M. Stephens, “Ang Gamhanan nga Tig-ayo,” Liahona, Nob. 2016, 9–12.

Mga Salmo 51:13–15; 66:16–17; 71:15–24

Ang akong pagpamatuod kalabot ni Jesukristo makatabang sa uban nga moduol Kaniya.

Pamalandongi kon giunsa nimo sa pagkaangkon og pagpamatuod kalabot ni Jesukristo ug sa Iyang makatubos nga gahom. Dayon, samtang magtuon ka sa Mga Salmo 51:13–15; 66:16–17; 71:15–24, hunahunaa kon unsaon nimo sa pagdapit sa uban nga “umari ug tuman-aw kamo sa mga buhat sa Dios” (Salmo 66:5). Unsa ang kahulugan alang kanimo sa “magasulti sa [Iyang] pagkamatarong sa tibuok nga adlaw”? (Salmo 71:24). Unsaon nimo sa pagsulti sa uban sa “gibuhat niya alang sa [imong] kalag”? (Salmo 66:16).

Tan-awa usab sa Mosiah 28:1–4; Alma 26.

duha ka batan-ong lalaki nga nagsultihanay

Atong mapaambit sa uban ang atong mga pagpamatuod sa unsay nabuhat sa Ginoo alang kanato.

Mga Salmo 63; 69; 77–78

Ang Ginoo motabang kanako sa akong panahon sa dinalian nga panginahanglan.

Pipila ka mga salmo naghulagway, sa klaro kaayo nga pinulongan, kon sama sa unsa nga mobati nga layo sa Dios ug hilabihang nanginahanglan sa Iyang tabang. Mahimo nimong ikonsiderar ang pagpangita sa ingon nga mga paghulagway diha sa Mga Salmo 63:1, 8; 69:1–8, 18–21; 77:1–9. Unsa ang imong nakita diha sa Mga Salmo 63; 69; 77–78 nga naghatag niining mga tagsulat sa salmo og kasiguroan?

Kon nabalaka ka, sa unsang paagi nga makatabang kanimo ang “[paghinumdom sa] mga buhat sa Ginoo” ug sa Iyang “mga kahibulongan sa kakaraanan”? (Salmo 77:11). Ang pipila niadto nga mga kahibulongan gihulagway diha sa Salmo 78. Samtang magbasa ka mahitungod niini, pamalandongi unsa ang makatabang kanimo nga “ibutang ang [imong] paglaom sa Dios” (bersikulo 7). Unsa nga mga kasinatian gikan sa kasaysayan sa imong pamilya ang nakadasig kanimo?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Salmo 51:17.Hunahunaa kon unsaon nimo sa pagtudlo sa imong pamilya kon unsay gipasabot sa nadugmok nga kasingkasing. Sama pananglit, ang mga sakop sa pamilya mahimong magpuli-puli sa pagbuak og butang nga adunay gahi nga bayanan, sama sa itlog o mani. Sa unsang paagi ang atong mga kasingkasing usahay susama niana nga bayanan? Unsaon nato sa pag-abli sa atong mga kasingkasing ngadto sa Ginoo? Ang pagbasa og dungan sa Salmo 51 mahimong makahatag og pipila ka ideya.

Salmo 61:2–3.Ang mga sakop sa pamilya tingali malingaw sa pagdrowing og mga hulagway sa mga simbolo dinhi niini nga mga bersikulo ug sa paghisgot kon sa unsang paagi si Jesukristo susama sa usa ka taas nga “bato,” “usa ka dalangpanan alang [kanato],” ug “usa ka malig-ong tore.”

Mga Salmo 71:17; 78:5–7.Unsa ang gusto sa Ginoo nga imong “igapahibalo … sa [imong] mga anak”? (Salmo 78:5). Tingali ang matag sakop sa pamilya mahimong mopaambit og usa ka ehemplo sa “mga katingalahang buhat,” sa Ginoo, sama sa usa ka istorya sa kasulatan, usa ka kasinatian, o personal nga pagpamatuod, nga nakatabang kanila nga “ibutang … ang ilang paglaom sa Dios” (Mga Salmo 71:17; 78:7).

Salmo 72.Ang Salmo 72 gisulat ni David mahitungod sa iyang anak nga si Salomon, apan ang kadaghanan niini may kalabutan usab kang Jesukristo. Samtang ang imong pamilya magbasa niini nga salmo, mahimo silang moisa og hulagway sa Manluluwas kon makakita sila og mga bersikulo nga nagpahinumdom kanila ni Jesukristo. Unsaon nato sa pagtabang nga matuman ang tinguha nga “pagapun-on ang tibuok nga yuta sa iyang himaya”? (Salmo 72:19; tan-awa usab sa Doktrina ug mga Pakigsaad 65:2).

Salmo 85:11.Kini nga bersikulo mahimong makadasig og diskusyon mahitungod sa mga panghitabo sa Pagpahiuli sa ebanghelyo—sa unsang paagi nga ang Basahon ni Mormon mao ang kamatuoran nga “mogitib gikan sa yuta” ug sa unsang paagi ang langitnong mga mensahero miabot “gikan sa langit” (tan-awa usab sa Moises 7:62).

Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.

Gisugyot nga awit: “Nagkinahanglan Ko Nimo sa Matag Takna,” Mga Himno, nu. 54.

Pagpalambo sa Atong Pagtudlo

Gamita ang nagkadaiyang klase. “Pangita og mga paagi nga makadugang ka og kalainan sa imong mga paningkamot sa pagtudlo sa ebanghelyo. Ang pagbuhat sa ingon makadugang og kabuhong ug katahum sa kasinatian. … Ikonsiderar kon sa unsang paagi ang musika, mga istorya, mga litrato, ug uban pang mga matang sa arte makadapit sa Espiritu” (Pagtudlo sumala sa Pamaagi sa Manluluwas, 22).

tawo nga nagluhod sa atubangan ni Jesus

Doubt Not, Thomas [Ayaw Pagduhaduha, Tomas], ni J. Kirk Richards