“Mga Hunahuna nga Hinumdoman: Mga Propeta ug Panagna,” Dali, Sunod Kanako––Alang sa mga Indibidwal ug mga Pamilya: Daang Tugon 2022 (2021)

“Mga Hunahuna nga Hinumdoman: Mga Propeta ug Panagna,” Dali, Sunod Kanako––Alang sa mga Indibidwal ug mga Pamilya: 2022

Mga Hunahuna nga Hinumdoman

Mga Propeta ug Panagna

Sa karaang Kristiyano nga pagkabahin sa Daang Tugon, ang kataposan nga seksyon (Isaias ngadto sa Malaquias) gitawag og “ang mga Propeta.”¹ Kini nga seksyon, mga ikaupat nga bahin sa Daang Tugon, naglangkob sa mga pulong sa may awtoridad nga mga sulugoon sa Dios, kinsa nakigsulti uban sa Ginoo ug dayon namulong alang Kaniya, nakigbahin sa Iyang mensahe uban sa mga katawhan sa mga 900 ug 500 BC.²

Ang mga propeta ug panagna adunay dako nga tahas sa tibuok Daang Tugon. Ang mga patriyarka nga si Abraham, Isaac, ug Jacob nakakita og mga panan-awon ug nakigsulti sa langitnong mga mensahero. Si Moises nakigsulti sa Dios nga nag-atubangay ug gisulti ang Iyang kabubut-on ngadto sa mga anak sa Israel. Ang mga basahon sa Unang ug Ikaduhang mga Hari nag-asoy sa halandomong mga buhat ug mga mensahe sa mga propeta nga si Elijah ug Eliseo. Ang Daang Tugon nagsulti usab sa mga babaye nga propeta sama ni Miriam (tan-awa sa Exodo 15:20) ug Debora (tan-awa sa Mga Maghuhukom 4), kauban sa ubang mga babaye nga gipanalanginan og espiritu sa panagna, sama ni Rebeka (tan-awa sa Genesis 25:21–23) ug Ana (tan-awa sa 1 Samuel 1:20–2:10). Ug bisan tuod ang mga Salmo wala isulat og mga propeta nga tinawag sa Dios, sila usab napuno sa espiritu sa panagna, ilabi na nga sila nagpaabot sa pag-anhi sa Mesiyas.

Wala niini ang miabot nga usa ka sorpresa sa mga Santos sa Ulahing mga Adlaw. Sa pagkatinuod, ang gipahiuli nga ebanghelyo ni Jesukristo nagtudlo kanato nga ang mga propeta dili lamang usa ka makapaikag nga bahin sa kasaysayan apan importante nga bahin sa plano sa Dios. Samtang ang pipila tingali nagtan-aw sa mga propeta isip talagsaon sa mga panahon sa Daang Tugon, kita nagtan-aw kanila isip usa ka butang nga kita adunay kaparehas sa mga panahon sa Daang Tugon.

Gihapon, ang pagbasa og usa ka kapitulo gikan sa Isaias o Ezequiel tingali bation ang kalahi gikan sa pagbasa og mensahe sa kinatibuk-ang komperensiya gikan sa Presidente sa Simbahan karon. Usahay kini malisod ang pagtan-aw nga ang karaang mga propeta adunay usa ka butang nga isulti ngari kanato. Bisan pa niana, ang kalibotan nga atong gipuy-an karon lahi kaayo gikan sa usa diin sila misangyaw ug nanagna. Ug ang pagkatinuod nga kita adunay usa ka buhing propeta mahimong makamugna og pangutana: nganong takos kini sa pagpaningkamot––ug kini nagkinahanglan sa paningkamot––ang pagbasa sa mga pulong sa karaang mga propeta?

Sila adunay usa ka butang nga isulti ngari kanato

Alang sa kadaghanang bahin, ang mga tawo karon dili mao ang nag-una nga tigpaminaw sa mga propeta sa Daang Tugon. Kadto nga mga propeta adunay diha-diha nga mga kabalaka nga ilang gipatumong sa ilang panahon ug dapit––sama lamang sa atong mga propeta sa ulahing mga adlaw nga nagpatumong sa atong diha-diha nga mga kabalaka karon.

Sa samang higayon, ang mga propeta makatan-aw lapas pa sa diha-diha nga mga kabalaka. Usa ka butang nga siguro, sila nagtudlo og mahangturong mga kamatuoran, kalabot sa bisan unsa nga edad. Ug, gipanalanginan og pagpadayag, ilang makita ang mas dako nga hulagway, ang mas lapad nga panan-aw sa buhat sa Dios. Sama pananglit, si Isaias dili lamang makapahimangno sa mga katawhan sa iyang panahon mahitungod sa ilang mga sala––makasulat usab siya mahitungod sa pagkaluwas sa mga Israelita nga nagpuyo 200 ka tuig sa umaabot ug dungan nga nagtudlo sa pagkaluwas nga gitinguha sa tanang mga katawhan sa Dios. Agi og dugang, makasulat siya og mga panagna nga, bisan karon, nagpaabot pa sa hingpit nga katumanan niini––sama sa mga saad og “bag-ong yuta” (Isaias 65:17) nga “mapuno sa kahibalo sa Ginoo” (Isaias 11:9), diin ang nawala nga mga tribo sa Israel pagapundukon ug diin “ang mga nas[o]d” dili na “makakat-on mahitungod sa gubat” (Isaias 2:4). Bahin sa hingpit nga kalipay ug inspirasyon nga moabot gikan sa pagbasa sa Daang Tugon ang mga propeta sama ni Isaias nag-amgo nga kita adunay tahas diha sa mahimayaong adlaw nga ilang gilantaw.³

Busa kon ikaw magbasa og karaang mga panagna, kini makatabang ang pagkat-on mahitungod sa kinatibuk-ang kahulogan nga diin kini gisulat. Apan kinahanglan usab nga makita nimo ang imong kaugalingon diha niini, o “mipahisama kanila ngadto sa [imong kaugalingon],” sumala sa gisulti ni Nephi (tan-awa sa 1 Nephi 19:23–24). Usahay kana nagpasabot sa pag-ila sa Babelonia nga mahimong simbolo sa pagkakalibotanon ug garbo, dili lamang usa ka karaan nga siyudad. Kini mahimong nagpasabot sa pagsabot sa Israel isip mga katawhan sa Dios sa bisan unsa nga panahon ug sa pagsabot sa Zion isip ang ulahing adlaw nga kawsa nga gidawat sa mga katawhan sa Dios, imbis nga lain lamang nga pulong alang sa Jerusalem.

Kita makapahisama sa mga kasulatan tungod kay atong nasabtan nga ang panagna mahimong matuman sa daghang mga paagi.⁴ Ang usa ka maayong ehemplo niini mao ang panagna diha sa Isaias 40:3: “Ang tingog sa usa nga nagasinggit, Andama ninyo sa kamingawan ang dalan sa Ginoo.” Ngadto sa nabihag nga mga Judeo sa Babelonia, kini nga pahayag tingali nagpasabot ngadto sa Ginoo nga naghatag og dalan paggawas sa pagkabihag ug pagbalik ngadto sa Jerusalem. Ngadto ni Mateo, Marcos, ug Lucas, kini nga panagna natuman diha ni Juan Bautista, kinsa miandam sa dalan alang sa mortal nga pangalagad sa Manluluwas.⁵ Ug nadawat ni Joseph Smith ang pagpadayag nga kini nga panagna gituman gihapon sa ulahing mga adlaw agi og pagpangandam alang sa milenyum nga pagpangalagad ni Kristo.⁶ Sa mga paagi nga kita nagsugod pa sa pagsabot, ang karaang mga propeta nakigsulti ngari kanato. Ug mitudlo sila og daghang bililhon, mahangtorong mga kamatuoran nga sama lamang ka may kalabotan kanato sama kaniadto sa karaang Israel.

karaang propeta nagsulat — Sa Tukma nga Panahon, ni Greg K. Olsen

Mipamatuod sila kabahin ni Jesukristo

Tingali ang mas importante pa kay sa pagkakita sa imong kaugalingon diha sa mga panagna sa Daang Tugon mao ang pagkakita kang Jesukristo diha niini nga mga panagna. Kon ikaw mangita Kaniya, makakaplag ka Kaniya, bisan pa kon wala Siya mahisgoti pinaagi sa ngalan. Tingali kini makatabang sa paghinumdom nga ang Dios sa Daang Tugon, ang Ginoo, mao si Jesukristo. Bisan kanus-a ang mga propeta naghulagway unsa ang gibuhat sa Ginoo o unsa ang Iyang pagabuhaton, sila nagsulti kabahin sa Manluluwas.

Makit-an usab nimo ang mga pakisayran sa Gidihogan (tan-awa sa Isaias 61:1), usa ka Manunubos (tan-awa sa Oseas 13:14), ug usa ka umaabot nga Hari gikan sa kaliwat ni David (tan-awa sa Isaias 9:6–7; Zacarias 9:9). Kining tanan mga panagna mahitungod ni Jesukristo. Mas nagkadaghan, mabasa nimo ang mahitungod sa pagkaluwas, pagpasaylo, katubsanan, ug pagpahiuli. Uban sa Manluluwas diha sa imong hunahuna ug kasingkasing, kini nga mga panagna sa kasagaran motudlo kanimo ngadto sa Anak sa Dios. Bisan pa niana, ang labing maayo nga paagi sa pagsabot sa panagna mao ang pagbaton “sa espiritu sa panagna” nga gisulti ni Juan kanato nga mao ang “pagpamatuod ni Jesus” (Pinadayag 19:10).