Nobyembre 7–13

Oseas 1–6; 10–14; Joel

“Higugmaon Ko Sila sing Bugana”

Agdaha ang Espiritu nga mangin kabahin sang imo pagtuon sang Oseas kag Joel. Tandai ang mga mensahe nga ginabutang sang Espiritu sa imo tagipusuon kag hunahuna.

Isulat Ang Imo Mga Panghunahuna

Ang kasugtanan sang Israel sa Ginuo gintuyo nga mangin madalom kag makahulugan nga ginkumparar ini sang Ginuo sa pag-asawahay. Ang kasugtanan, pareho sang pag-asawahay, nagalakip sang wala katapusan nga pangako, pag-agi sa mga eksperiyensya nga inupdanay, pagtukod sang kabuhi nga magkaupod, eksklusibo nga katampad, kag labi sa tanan, bug-os tagipusuon nga paghigugma. Ining klase sang debosyon may mataas nga lalab-uton—kag masubo nga mga konsikwensya para sa pagkaindi-tampad. Paagi kay propetang Oseas, ginlaragway sang Dios ang pila sa mga konsikwensya nga mahimo pangatubangon sang mga Israelnon bangud sa paglapas sang ila kasugtanan. Pero ang Iya mensahe indi agud “Sikwayon ka sa katubtuban bangud sang pagkaindi-tampad.” Kundi nga “Agdahon ko ikaw pabalik” (tan-awa sa Oseas 2:14–15). “Itiayon ko ikaw sa akon sa pagkamatarong,” siling sang Ginuo sa (Oseas 2:19). “Ayuhon ko ang ila pagtalikod, higugmaon ko sila sing bugana” (Oseas 14:4). Amo ini ang pareho nga mensahe nga Iya ginahatag sa aton karon samtang ginatinguhaan naton nga ipangabuhi ang aton mga kasugtanan nga may pagpalangga kag debosyon.

Nagpaambit man si Joel sang pareho nga mensahe: “Magbalik sa Ginuo, nga inyo Dios: kay mainayuhon sia kag maluluy-on, makuli sa pagpangakig, kag bugana sa malig-on nga paghigugma” (Joel 2:13). “Ang Ginuo mangin dalangpan sang iya katawhan, pamakud sa katawhan sang Israel” (Joel 3:16). Samtang imo ginabasa ang Oseas kag Joel, binagbinaga ang imo kaugalingon nga relasyon sa Ginuo. Hunahunaa kon paano ka ginainspirar sang Iya katutom nga mangin tampad sa Iya.

 

Mga Ideya para sa Personal nga Pagtuon sang Balaan nga mga Kasulatan

Oseas 1–3; 14

Ang Ginuo pirme nagaagda sa akon nga magbalik sa Iya.

Ang asawa ni Oseas nga si Gomer, indi tampad sa iya, kag gintumod sang Dios ining masubo nga hitabo para tudloan ang mga Israelnon kon ano ang Iya nabatyagan para sa ila kag sa ila mga kasugtanan upod sa Iya. Samtang imo ginabasa ang Oseas 1–3, binagbinaga kon paano ginakabig sang Ginuo ang Iya kaangtanan sa Iya katawhan sa kasugtanan. Mahimo mo man binagbinagon ang mga paagi nga, pareho sa mga Israelnon, mahimo nga nangin indi ka tampad sa Ginuo kag kon paano Sia naglab-ot sa imo. Halimbawa, ano ang ginatudlo sang Oseas 2:14–23 kag Oseas 14 sa imo parte sa paghigugma kag kaluoy sang Ginuo? Paano mo ipakita sa Iya ang imo pagpalangga kag katampad?

 .  

Ang makasasala nga si Gomer, nga nagarepresentar sang Israel, gintanyagan sang pagtubos sang Ginuo. Laragway ni Deb Minnard, lisensyado sa goodsalt.com

Oseas 6:4–7; Joel 2:12–13

Ang debosyon sa Dios kinahanglan nga batyagon sa sulod, indi lang nga ipakita sa panggwa.

Ginsugo sang Ginuo ang Iya katawhan nga maghalad sang kasapatan. Pero bisan pa nga ginatuman sang katawhan sang tiyempo ni Oseas ang ina nga layi, ginalapas nila ang mga kasuguan nga may mas dako nga importansya (tan-awa sa Oseas 6:4–7). Ano sa banta mo ang buot silingon sang ang Ginuo “nagahandum sang malig-on nga paghigugma, kag indi ang halad; kag ang pagkilala sang Dios labi pa sa mga halad-nga-sinunog”? (Oseas 6:6). Ano sa banta mo ang kahulugan sang pagkamatarong nga mangin pareho sang panganod ukon pareho sang tun-og? Daw pareho dapat sa ano ang aton pagkamatarong? (tan-awa sa Isaias 48:18; 1 Nefi 2:9–10).

Pwede mo man basahon ang Mateo 9:10–13; 12:1–8 para makita kon paano gingamit sang Manluluwas ang Oseas 6:6 sa tion sang Iya pag-alagad. Paano ka ginabuligan sining mga dinalan nga maintiendihan ang mga pulong ni Oseas?

Kon imo basahon ang Joel 2:12–13, basi makabulig ang paghibalo nga ang tradisyon sang paggisi sang bayo sang isa ka tawo isa ka pang-gwa nga tanda sang pagpangasubo ukon paghinulsol (halimbawa, tan-awa sa 2 Mga Cronica 34:14–21, 27). Ano ang kinalain sang paggisi sang aton mga tagipusuon sa paggisi sang aton mga bayo?

Tan-awa man sa Isaias 1:11–17; Mateo 23:23; 1 Juan 3:17–18.

Joel 2

“Ipasagahay ko ang akon Espiritu sa tanan nga unod.”

Sang ginpropesiya ni Joel ang “adlaw sang Ginuo,” ginlaragway niya ini bilang “adlaw sang kadudulman kag kasubo,” “dako kag tama ka makakulugmat” (Joel 2:1–2, 11). Nangatubang ang Israel sang madamo nga dalagko kag makahaladlok nga inadlaw sa iya kasaysayan, kag ang katawhan sang Dios sa kasugtanan magapangatubang sang mas madamo pa sa palaabuton. Ano ang nanamian mo sa laygay nga ginhatag sang Ginuo sa Joel 2:12–17? Pat-ini man ang mga bugay nga Iya ginpromisa sa Joel 2:18–32. Ngaa ayhan ang mga bugay nga ginpromisa sa mga bersikulo 27–32 mangin labing malahalon sa panahon nga pareho sa ginlaragway sa Joel 2, lakip na sa aton panahon?

Ano sa banta mo ang buot silingon sang ang Ginuo “[magapasagahay] sang [Iya] Espiritu sa tanan nga unod”? (Joel 2:28). Paano ang mga propesiya sa Joel 2:28–29 nagakatuman? (Tan-awa sa Mga Binuhatan 2:1–21; Joseph Smith—Kasaysayan 1:41.)

Pwede mo man binagbinagon ining mga pulong ni Pangulong Russell M. Nelson: “Sa maabot nga inadlaw, indi na posible ang mabuhi sa espirituhanon nga wala ang nagagiya, nagapanguna, nagapaumpaw, kag dalayon nga impluwensya sang Balaan nga Espiritu” (“Revelation for the Church, Revelation for Our Lives,” Liahona, Mayo 2018, 96). Ngaa ang rebelasyon importante sa aton pagkabuhi sa espirituhanon? Paano mo padakuon ang imo ikasarang nga magbaton sang personal nga rebelasyon?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Oseas 2:19–20.Gingamit sang Ginuo ang paanggid sang pag-asawahay para ilaragway ang Iya kaangtanan sa kasugtanan upod sa Israel. Pwede nga hambalan sang inyo pamilya kon ngaa ang pag-asawahay isa ka maayo nga paanggid para sa aton kasugtanan upod sa Dios. Paano kita ginabuligan sang Oseas 2:19–20 nga maintiendihan kon ano ang balatyagon sang Dios para sa aton? Paano bala kita mangin tampad sa aton mga kasugtanan upod sa Iya?

Oseas 10:12.Mahimo nga masadyahan ang mga kabataan sa pagdrowing sang orasan kag pagplano sang mga paagi nga pwede nila pangitaon ang Ginuo sa lainlain nga oras sa bilog nga adlaw.

Joel 2:12–13.Para buligan ang inyo pamilya nga hambalan ang Joel 2:12–13, pwede ka magbutang sang litrato sang Manluluwas sa isa ka dingding sang kuwarto kag sang tinaga nga sala sa pihak nga kilid. Hagara ang mga miyembro sang pamilya nga magbulos-bulos sa pag-atubang sa tinaga kag dayon magtulok sa Manluluwas samtang ila ginapaambit ang mga butang nga makabulig sa aton nga magbalik sa Iya “sa bug-os [naton] nga tagipusuon.” Paisoga ang mga miyembro sang pamilya nga hunahunaon ang tanan nga aspeto sang ila mga kabuhi, lakip na ang mga aktibidades, trabaho, pag-eskwela, kag mga relasyon.

Joel 2:28–29.Ano ayhan ang buot silingon sang Espiritu nga “ipasagahay” sa aton? Pwede ninyo ini ipakita paagi sa pagbubo sang likido dayon balusan ini sang tulo ukon wisik.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Come, Ye Children of the Lord [Inanak sang Ginuo],” Mga Himno kag mga Ambahanon, no. 4.

Pagpauswag sang Aton Pagpanudlo

Itudlo ang doktrina. “Indi gid magkalipat sa pagtipon sang kabataan sing ululupod para magtuon sang doktrina ni Jesucristo. Inang mga higayon tuman ka talagsa ikomparar sa mga pagpaninguha sang kaaway” (Henry B. Eyring, “The Power of Teaching Doctrine,” Ensign, Mayo 1999, 74).

Come unto Me [Kari sa Akon], ni Kelly Pugh