tawo nga nagakamang sa baybayon nga may balyena sa dagat sa likod niya

Jonas on the Beach at Ninive [Si Jonas sa Baybayon sang Ninive], ni Daniel A. Lewis

Nobyembre 21–27

Jonas; Miqueas

“Nagakahamuot Sia sa [Kaluoy]”

Samtang imo ginasulat ang imo mga panghunahuna, pamensara kon paano naangot ang mga prinsipyo sa Jonas kag Miqueas sa imo natun-an sa balaan nga mga kasulatan.

Isulat Ang Imo Mga Panghunahuna

Nagasakay si Jonas sa barko padulong sa Tarsis. Wala man sang problema nga magbiyahe pakadto sa Tarsis, magluwas nga malayo ini sa Ninive, kon diin dapat makadto si Jonas para ipahibalo ang mensahe sang Dios. Gani sang nakasugata sang dako nga bagyo ang barko, nakahibalo si Jonas nga tungod ini sa indi niya pagtuman. Sa pagpamilit ni Jonas, gintagbong sia sang pareho niya nga mga pasahero sa tunga sang lawod para mag-untat ang bagyo. Dawsa amo na ato ang katapusan ni Jonas kag sang iya pag-alagad. Pero ang Ginuo wala magpangampo kay Jonas—pareho nga wala Sia magpangampo sa katawhan sang Ninive kag pareho nga wala Sia nagapangampo sa bisan sin-o sa aton. Pareho sa gintudlo ni Miqueas, ang Ginuo wala nagakalipay sa pagkondenar sa aton, kundi nga “nagakahamuot sa [kaluoy].” Kon magbalik kita sa Iya, “[sia magaliso liwat], sia magakaawa pa sa aton; sia magatapak sang aton mga kalautan; kag [Sia] magatagbong sa kadadalman sang dagat sang tanan [naton] nga sala” (Miqueas 7:18–19).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Jonas 1–4; Miqueas 7:18–19

Ang Ginuo maluluy-on sa tanan nga nagabalik sa Iya.

Ang libro nga Jonas nagapakita, upod sa iban nga butang, kon ano kamaluluy-on sang Ginuo kon maghinulsol kita. Samtang imo ginabasa ang Jonas, pangitaa ang mga halimbawa sang Iya kaluoy. Binagbinaga kon paano mo naeksperiyensyahan ina nga kaluoy sa imo kabuhi. Ano ang imo matun-an nga makabulig sa imo nga mangin mas maluluy-on sa iban?

Ang pagsaksi sang kaluoy sang Ginuo masami nagainspirar sang mga balatyagon sang pagpalangga kag kapasalamatan. Ugaling, si Jonas “naalipungot” kag “naakig” (Jonas 4:1) sang naghatag ang Ginuo sang kaluoy sa katawhan sang Ninive, nga mga kaaway sang Israel. Ngaa ayhan nga amo sini ang nabatyagan ni Jonas? Nakaagi ka na bala sang pareho sini nga mga balatyagon? Ano sa banta mo ang gusto ipaintiendi sang Ginuo kay Jonas sa kapitulo 4?

Binagbinaga ang mga pinanudlo sa Miqueas 7:18–19. Paano ayhan nakabulig ining mga kamatuoran kay Jonas nga liwaton ang iya pamatasan sa Ginuo kag sa katawhan sang Ninive?

Tan-awa man sa Lucas 15:11–32.  

duha ka tawo nga nagahambalanay sa kilid sang suba

Sarang naton mapaambit ang ebanghelyo sa mga anak sang Dios.

Jonas1; 3–4

Tanan nga anak sang Dios kinahanglan nga makabati sang ebanghelyo.

Ang Ninive bahin sang imperyo sang Asiria, kontra sang Israel nga kilala sa kasingki kag kapintas sini. Para kay Jonas, siguro daw indi mapatihan nga ang mga tawo sa Ninive handa sa pagbaton sang pulong sang Dios kag maghinulsol. Pero, pareho sa gintudlo ni Pangulong Dallin H. Oaks: “Indi gid kita dapat magpamatbat sa aton mga kaugalingon kon sin-o ang handa kag kon sin-o ang indi. Ang Ginuo nakahibalo sang tagipusuon sang tanan Niya nga mga anak, kag kon mangamuyo kita para sa inspirasyon, buligan Niya kita nga makita ang mga tawo nga Iya nahibal-an nga yara sa ‘isa ka pagpanghanda sa pagpamati sang pulong’ (Alma 32:6)” (“Sharing the Restored Gospel,” Ensign ukon Liahona, Nob. 2016, 58–59). Ano ang imo matun-an sa Jonas 3 nga nagainspirar sa imo nga ipaambit ang ebanghelyo bisan pa sa mga tawo nga daw indi pa handa nga magbag-o?

Basi makabulig nga ikumparar ang pamatasan ni Jonas (tan-awa sa Jonas 1; 3–4) sa mga balatyagon ni Alma kag sang mga anak ni Mosias (tan-awa sa Mosias 28:1–5; Alma 17:23–25).

Tan-awa man sa 3 Nefi 18:32.

Miqueas 4:11–13; 5:8–15; 7:5–7

Ginsambit ni Jesucristo ang mga sinulatan ni Miqueas.

Kilala nga ang Manluluwas nagsambit kay Isaias kag sang Mga Salmo. Nahibal-an mo bala nga ginsambit man Niya si Miqueas pila ka beses? Pamensara ang masunod nga mga halimbawa, kag binagbinaga kon ngaa nangin importante ining mga dinalan sa Manluluwas. Ngaa importante ang mga ini sa imo?

Miqueas 4:11–13 (tan-awa sa 3 Nefi 20:18–20). Ginkumparar sang Ginuo ang pagtipon sa ulihing-adlaw sa pag-ani sang trigo (tan-awa man sa Alma 26:5–7; Doktrina kag mga Kasugtanan 11:3–4). Ano ang ginapanugyan sa imo sining pagpaanggid parte sa pagtipon sang Israel?

Miqueas 5:8–15 (tan-awa sa 3 Nefi 21:12–21). Anong ginapahangop sining mga bersikulo sa imo parte sa katawhan sang Dios (“ang nabilin ni Jacob”) sa ulihing mga adlaw?

Miqueas 7:5–7 (tan-awa sa Mateo 10:35–36). Suno sa sining mga bersikulo, ngaa importante nga “magtulok sa Ginuo” una? Ngaa importante ining laygay sa karon?

Miqueas 6:1–8

“Ano bala ang ginakinahanglan sa imo sang Ginuo?”

Ginaagda kita ni Miqueas nga hunahunaon kon daw ano ang “[mag-atubang] sa Ginuo, kag magyaub … sa atubangan sang Dios nga mataas” (Miqueas 6:6). Ano ang ginapahangop sa imo sang mga bersikulo 6–8 kon ano ang importante sa Ginuo samtang Iya ginatimbang ang imo kabuhi?

Tan-awa man sa Mateo 7:21–23; 25:31–40.  

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Jonas 1–4.Basi masadyahan ang imo kabataan sa paghimo sang mga aksyon nga nagasugid sang istorya ni Jonas, pareho sang kuno abi nagapalagyo, nagahimo sang mga huni nga pareho sang mabalod nga dagat, ukon kuno abi gintulon sang dako nga isda (tan-awa sa “Si Jonas nga Propeta” sa Mga Sugilanon sa Daan nga Katipan). Pamangkuta ang mga miyembro sang pamilya kon ano ang ila natun-an sa eksperiyensya ni Jonas.  

Jonas 3.Ano ang natun-an ni Jonas parte sa pagpaambit sang ebanghelyo? Sin-o ang kilala naton nga mabugayan sang pagpamati sa mensahe sang ginpanumbalik nga ebanghelyo ni Jesucristo?

Miqueas 4:1–5.Suno sa sining mga bersikulo, ano ang makadala sang paghidaet kag pagtin-ad sa katawhan sang Ginuo? Ano ang pwede naton himuon para tumanon ining propesiya sa aton puluy-an?

Miqueas 5:2.Pwede kamo mag-display sang litrato ni Jesus sang bata pa upod ang Iya iloy (tan-awa sa Libro sang mga Larawan nga Pang-ebanghelyo, no. 33) sa isa ka kilid sang kuwarto kag ang litrato sang Mga Mago sa pihak. Basaha sing ululupod ang Miqueas 5:2 kag Mateo 2:1–6. Paano nakabulig ang propesiya ni Miqueas sa Mga Mago nga makita si Jesus? Pwede nga sayluhon sang mga miyembro sang pamilya ang litrato sang Mga Mago sa tupad sang litrato ni Jesus.  

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Indi sa Kataas sang Bukid [I’ll Go Where You Want Me to Go],” Mga Himno kag mga Ambahanon sang Kabataan, no. 46.

Pagpauswag sang Personal nga Pagtuon

Pangitaa ang gugma sang Dios. Samtang imo ginabasa ang balaan nga mga kasulatan, pamensara ang pagtanda sang mga ebidensya sang pagpalangga sang Dios nga nanamian mo. Halimbawa, pangitaa kon paano ginpakita sang Dios ang Iya pagpalangga sa Iya mga anak sa istorya ni Jonas.

tawo nga ginatagbong halin sa barko pa-lawod

Drowing ni Kevin Carden