“Ang iya mga paglakat subong sang dumaan” (Habacuc 3:6). In the Beginning Was the Word [Sa Ginsuguran Amo ang Pulong], ni Eva Timothy

Nobyembre 28–Disyembre 4

Nahum; Habacuc; Sofonias

“Ang Iya Mga Paglakat Subong sang Dumaan”

Mahimo mo nga tun-an ang balaan nga mga kasulatan sa bilog mo nga kabuhi kag sa gihapon makakita sang bag-o nga mga ihibalo. Indi ka magbatyag nga kinahanglan mo intiendihon ang tanan karon gid dayon. Magpangamuyo sang bulig nga makilala ang mga mensahe nga kinahanglan mo sini nga adlaw.

Isulat Ang Imo Mga Panghunahuna

Ang pagbasa sang Daan nga Katipan masami nagakahulugan sang pagbasa sang mga propesiya parte sa kalaglagan. Ang Ginuo masami nagatawag sang mga propeta para paandaman ang mga malaut nga ang Iya mga paghukom magaabot sa ila. Ang mga pag-alagad nanday Nahum, Habacuc, kag Sofonias maayo nga mga halimbawa. Sa makahaladlok nga detalye, ginpanagna sining mga propeta ang kalaglagan sang mga siyudad nga, sang amo nga tiyempo, daw mabakod kag gamhanan—Ninive, Babilonia, kag bisan ang Jerusalem. Pero linibo na ato ka tuig ang nagligad. Ngaa malahalon ang pagbasa sining mga propesiya karon?

Bisan pa nga nawasak atong mga bugalon, malaut nga mga siyudad, nagpadayon ang bugal kag kalainan. Sa kalibutan karon, kon kaisa mabatyagan naton nga ginapalibutan sang kalainan nga ginapakalain sang dumaan nga mga propeta. Mahimo nga matalupangdan man naton ang mga ini sa aton mismo nga tagipusuon. Ining mga propesiya sa Daan nga Katipan nagapahayag sang nabatyagan sang Ginuo parte sa bugal kag kalainan, kag nagatudlo ang mga ini nga sarang naton talikdan ining mga kalainan. Ayhan isa ina sa mga rason nga ginabasa naton gihapon ining dumaan nga mga propesiya sa karon. Sanday Nahum, Habacuc, Sofonias, kag ang iban pa indi lamang mga propeta nga nagapakot sang kalaglagan—mga propeta man sila sang kaluwasan. Ang mga paglaragway sang kalaglagan ginabawi sang mga imbitasyon nga magpalapit kay Cristo kag magbaton sang Iya kaluoy: “Pangitaa ninyo ang Ginuo …; pangitaa ang pagkamatarong, pangitaa ang pagkamapinaubuson” (Sofonias 2:3). Amo ini ang paagi sang Ginuo sang dumaan, kag amo ini ang Iya paagi sa sini nga panahon. “Ang iya mga paglakat subong sang dumaan” (Habacuc 3:6).

 

Mga Ideya para sa Personal nga Pagtuon sang Balaan nga mga Kasulatan

Nahum 1

Ang Ginuo pareho nga gamhanan kag maluluy-on.

Ang misyon ni Nahum amo ang ihambal na ngadaan ang kalaglagan sang Ninive—ang kapitolyo sang masingki nga imperyo sang Asiria, nga nagpalapta sang Israel kag nag-abuso sang Juda. Ginsugdan ni Nahum sa paglaragway ang kaakig kag indi matupungan nga gahum sang Dios, pero naghambal man sia parte sa kaluoy kag kaayo sang Dios. Pwede mo pamensaron ang pagpangita sang mga bersikulo sa kapitulo 1 nga nagabulig sa imo nga maintiendihan ang tagsa sining mga kinaiya—kag ang iban pa nga mga kinaiya sang Dios nga imo natalupangdan. Ngaa sa banta mo importante nga mahibal-an ang tagsa sining mga butang parte sa Ginuo?

Ang iban mahimo nga nabudlayan sa pagpasanto sang ginatudlo sa kasulatan nga “ang Ginuo maayo” (Nahum 1:7) sa panudlo nga Sia “nagatimalos sa iya mga kasumpong” (Nahum 1:2). Sa Libro ni Mormon, ang anak ni Alma nga si Corianton may pareho nga mga pamangkot “nahanungod sa hustisya sang Dios sa pagsilot sang makasasala” (Alma 42:1). Para mas matun-an ang parte sa kaluoy sang Dios kag kon paano ini maangot sa Iya hustisya, basaha ang sabat ni Alma kay Corianton sa Alma 42.

“Ang Ginuo maayo, pamakod sa adlaw sang kalisud” (Nahum 1:7).

Habacuc

Makasalig ako sa pagbuot sang Ginuo kag sa Iya tiyempo.

Bisan ang mga propeta may mga pamangkot man kon kaisa parte sa mga pamaagi sang Ginuo. Si Habacuc, nga nagkabuhi sa tiyempo sang lapnagon nga kalautan sa Juda, nagsugod sang iya sinulatan nga may mga pamangkot sa Ginuo (tan-awa sa Habacuc 1:1–4). Paano mo palip-uton ang mga kabalaka ni Habacuc? Nakabatyag ka na bala sang pareho sini?

Ginsabat sang Ginuo ang mga pamangkot ni Habacuc paagi sa pagsiling nga Iya ipadala ang mga Caldeanhon (mga taga-Babilonia) para silutan ang Juda (tan-awa sa Habacuc 1:5–11). Pero nagapalibog gihapon si Habacuc, kay daw indi matarong para sa Ginuo nga magtan-aw lang “kon ang malauton [Babilonia] maghalunhon sang tawo nga matarong pa sa iya [Juda]” (tan-awa sa mga bersikulo 12–17). Ano ang imo makita sa Habacuc 2:1–4 nga nagainspirar sa imo nga magsalig sa Ginuo kon may mga pamangkot ka nga wala masabat?

Ang kapitulo 3 sang Habacuc isa ka pangamuyo sang pagdayaw sa Dios kag pagpahayag sang pagtuo sa Iya. Ano ang nanamian mo sa mga pulong ni Habacuc sa mga bersikulo 17–19? Ano ang kinalain sang tono sining mga bersikulo sa Habacuc 1:1–4? Binagbinaga kon paano ka makaangkon sang mas dako nga pagtuo sa Dios, bisan pa nga ang kabuhi daw indi patas.

Tan-awa man sa Mga Hebreo 10:32–39; 11; Doktrina kag mga Kasugtanan 121:1–6.  

Sofonias

“Pangitaa ninyo ang Ginuo, kamo tanan nga mapainubuson sang duta.”

Nagpropesiya si Sofonias nga ang katawhan sang Juda pagaubuson sang mga taga-Babilonia tungod sang ila kalainan. “Papason ko sing bug-os ang tanan nga butang sa kadaygan sang duta, siling sang Ginuo” (Sofonias 1:2). Pero nagsiling man si Sofonias nga ang “nabilin” pagaamligan (Sofonias 3:13). Samtang imo ginabasa ining mga propesiya, tandai ang mga klase sang batasan kag pangginawi nga nagdala sang Juda kag sang iban nga mga grupo sa kalaglagan—tan-awa labi na sa Sofonias 1:4–6, 12; 2:8, 10, 15; 3:1–4. Dayon pangitaa ang mga kinaiya sang katawhan nga pagaamligan sang Dios—tan-awa sa Sofonias 2:1–3; 3:12–13, 18–19. Ano nga mensahe ang nabatyagan mo nga gintigana sang Ginuo para sa imo sa sining mga bersikulo?

Ang Sofonias 3:14–20 nagalaragway sang kalipay sang mga matarong matapos nga “ginsubol [sang Ginuo] ang imo mga kaaway ” (bersikulo 15). Ano nga mga bugay ang ginpromisa sa sining mga bersikulo nga nagtatak gid sa imo? Ngaa importante sa imo nga mahibal-an ang parte sa sining mga bugay? Paano mo ikumparar ining mga bersikulo sa mga eksperiyensya nga ginlaragway sa 3 Nefi 17 kag binagbinaga kon ano ang nabatyagan ni Jesucristo sa Iya katawhan—lakip na sa imo.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Nahum 1:7.Paano ang Ginuo daw pareho sang “pamakod”? Basi pwede ang inyo pamilya maghimo sang simple nga pamakod ukon palanaguan sa inyo balay kag hambali ang Nahum 1:7 samtang ara sa sulod sini. Ano ang nagahimo sang aton panahon nga “adlaw sang kalisud”? Paano kita ginapabakod ni Jesucristo kag sang Iya ebanghelyo? Paano naton ipakita nga kita “[nagasalig] sa iya”?

Habacuc 2:14.Paano kita makabulig nga matuman ang propesiya sa sining bersikulo?

Habacuc 3:17–19.Ano ang aton matun-an sa ehemplo ni Habacuc sa sining mga bersikulo?

Sofonias 2:3.Pwede kamo maghampang kon diin dapat pangitaon sang mga miyembro sang pamilya ang mga tinaga nga “pagkamatarong” kag “pagkamapinaubuson” sa pahina nga may madamo nga iban pa nga mga pulong nga upod. Dayon pwede nila hambalan ang mga halimbawa sang pagkamatarong kag pagkamapinaubuson nga nakita nila sa kada isa. Ano ang buot silingon sang pangitaa ang pagkamatarong kag pagkamapinaubuson?

Sofonias 3:14–20.Ano ang aton makita sa Sofonias 3:14–20 nga nagatulod sa aton nga “[maghugyaw], … magkasadya kag magkalipay sa bug-os mong tagipusuon”? Basi pwede magkanta ang inyo pamilya sang mga himno ukon mga kalantahon nga ila madumduman samtang ila ginabasa ining mga bersikulo.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

 

Pagpauswag sang Personal nga Pagtuon

Mangin pasensyoso. Kon kaisa gusto naton gilayon sang mga sabat sa aton mga pamangkot, pero ang espirituhanon nga mga paghangop nagakinahanglan sang tiyempo kag indi pwede nga piliton. Sa ginsiling sang Ginuo kay Habacuc, “Hulata ini; kay sa pagkamatuod, magaabot ini” (Habacuc 2:3).

“Ang Ginuo, ang imo Dios, yara sa tunga nimo, gamhanan” (Sofonias 3:17). He Comes Again to Rule and Reign [Nagabalik Sia Liwat para Maggahum kag Maghari], ni Mary R. Sauer