“Disyembre 19–25. Paskwa: ‘Naghulat Kita sa Iya, kag Sia Magaluwas sa Aton,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)

“Disyembre 19–25. Paskwa,” Dali, Magsunod sa Akon—Para sa Mga Indibidwal kag Mga Pamilya: 2022

Litrato

Ang Lapsag nga Jesus naputos sa puti nga panapton kag nagahigda sa dagami

For unto Us a Child Is Born [Kay sa Aton Natawo ang Isa ka Bata], ni Simon Dewey

Disyembre 19–25

Paskwa

“Naghulat Kita sa Iya, kag Sia Magaluwas sa Aton”

Sa sining tion sang Paskwa, pamensara kon paano ginpabakod sang Daan nga Katipan ang imo testimonya kay Jesucristo sa bilog nga tuig.

Isulat Ang Imo Mga Panghunahuna

Ang Daan nga Katipan nagadala sang balatyagon sang masinadyahon nga pagpaabot. Sa sina nga paagi, daw pareho ini sa panahon sang Paskwa. Sugod kay Adan kag Eva, ang mga patriarka sa Daan nga Katipan, mga propeta, mga mamalaybay, kag katawhan nagpaabot sang mas maayo nga inadlaw, nga puno sang paglaum sa pagpabakod kag pagpanghilway sang Mesias. Kag ang mga Israelnon masami nagakinahanglan sinang paglaum—bisan sang ara sila sa pagkabihag sa Egipto ukon Babilonia kag sang nangin bihag sang ila kaugalingon nga sala ukon pagkarebelde. Sa tunga sining tanan, ang mga propeta nagpadumdom sa ila nga isa ka Mesias, isa ka Manughilway, ang magakari “sa pagbantala sang kahilwayan sa mga bihag” (Isaias 61:1).

Ina nga paglaum nagsugod nga matuman sang matawo si Jesucristo sa Betlehem. Ang gamhanan nga Manughilway sang Israel natawo sa kuwadra kag ginpahamtang sa pasungan (tan-awa sa Lucas 2:7). Pero indi lamang Sia Manughilway sang dumaan nga mga Israelnon. Nagkari Sia para hilwayon ka—agud pas-anon ang imo kalisud, dalhon ang imo mga kasubo, para mahanog tungod sang imo mga kalautan, agud nga sa Iya mga labod mag-ayo ka (tan-awa sa Isaias 53:4–5). Amo ini kon ngaa ang Paskwa puno sang malipayon nga pagpaabot bisan sa karon. Ang Mesias nagkari masobra na 2,000 katuig ang nagligad, kag padayon Sia nga nagakari sa aton mga kabuhi kon pangitaon naton Sia.

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Nagakasadya ako sa akon Manunubos.

Ang Paskwa kilala bilang masadya nga panahon tungod sinang kalipay nga ginadala ni Jesucristo sa kalibutan. Bisan ang mga tawo nga wala nagasimba kay Jesus bilang Anak sang Dios masami makabatyag sang kalipayan sang Paskwa. Binagbinaga ang kalipay nga imo nabatyagan tungod ginpadala sang Amay nga Langitnon ang Iya Anak.

Madamo nga siglo antes matawo ang Manluluwas, ang mga propeta sa Daan nga Katipan nakabatyag man sang kalipay samtang nagahambal sila parte sa pagkari sang Mesias. Basaha ang pila sa masunod nga mga dinalan, kag hunahunaa kon ngaa nangin malahalon kuntani ini sa mga nagapaabot sa misyon sang Manluluwas: Salmo 35:9; Isaias 25:8–9; 44:21–24; 51:11; Sofonias 3:14–20; Moises 5:5–11. Ngaa malahalon ining mga dinalan sa imo?

Ang mga simbolo makabulig sa akon nga dumdumon si Jesucristo.

Madamo sa mga tradisyon nga may kaangtanan sa Paskwa ang mahimo may simboliko nga mga kahulugan nga nagatudlo sa aton kay Cristo. Ang korte-bituon nga mga dekorasyon nagasimbolo sang masanag nga bituon nga nagsilak sang gab-i sang pagkabun-ag ni Jesus (tan-awa sa Mateo 2:2). Ang mga nagadaigon nagapadumdom sa aton sang mga anghel nga nagpakita sa mga manugpahalab (tan-awa sa Lucas 2:13–14). Sang imo ginatun-an ang Daan nga Katipan sini nga tuig, mahimo nga natalupangdan mo ang madamo nga mga simbolo sang Manluluwas. Pila sini ang nalista sa idalom. Pamensara nga tun-an ang mga ini kag isulat kon ano ang ginatudlo sini parte sa Iya.

Cordero (Genesis 22:8; Exodo 12:5; 1 Pedro 1:18–20).

Mana (Exodo 16:4, 12–21,31; Deuteronomio 8:3; Juan 6:30–40).

Tubig (Exodo 17:1–6; Jeremias 2:13; Ezequiel 47:1–12; Juan 4:7–14).

Saway nga man-og (Numeros 21:4–9; Juan 3:14–15).

Bato (1 Samuel 2:2; 2 Samuel 22:2–3; Salmo 118:22–23; Isaias 28:16; Mga Taga-Efeso 2:20).

Sanga (Isaias 11:1–2; Jeremias 23:5; 33:15).

Kapawa (Salmo 27:1; Isaias 9:2; 60:19; Miqueas 7:8; Juan 8:12).

Ano pa ang iban nga mga simbolo, mga dinalan, kag panaysayon nga imo nakita sa balaan nga mga kasulatan nga nagapamatuod kay Jesucristo?

Tan-awa man sa 2 Nefi 11:4; Mosias 3:14–15; Moises 6:63.

“Ang Iya ngalan pagatawgon nga Makatilingala.”

Si Jesucristo ginatawag sa madamo nga lainlain nga mga ngalan kag titulo. Ano nga mga titulo ang imo makita sa masunod nga mga bersikulo? Mga Salmo 23:1; 83:18; Isaias 7:14; 9:6; 12:2; 63:16; Amos 4:13; Zacarias 14:16; Moises 7:53. Ano nga iban pa nga mga titulo ang imo mahunahuna? Basi masadyahan ka sa paglista sang mga titulo ni Jesucristo nga imo makita sa pang-Paskwa nga mga himno. Paano ginaimpluwensyahan sang tagsa ka titulo ang imo pagkabig sa Iya?

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Ang mga tradisyon sa Paskwa sarang magtudlo kay Jesucristo.Ang Israelnon nga mga panimalay may mga tradisyon, pareho sang Pascua (Passover) kag iban pa nga mga piyesta, nga nagatuyo nga itudlo ang ila mga tagipusuon kag kaisipan sa Ginuo (tan-awa sa Exodo 12). Ano ang mga tradisyon sang inyo pamilya sa tion sang Paskwa nga nagabulig sa inyo nga magtutok kay Jesucristo? Ano nga mga tradisyon ang imo nahibal-an halin sa kasaysayan sang inyo pamilya? Pwede man ninyo hambalan bilang pamilya ang pila sa mga tradisyon nga gusto ninyo sugdan. Pila sa mga ideya mahimo nga maglakip sang pagserbisyo sa tawo nga nagakinahanglan, paghagad sang isa ka abyan nga magtan-aw upod sa inyo sang Debosyonal sa Paskwa sang Unang Pangulohan, pagsulat sang inyo kaugalingon nga kanta sa Paskwa, ukon pagpangita sang bag-o nga paagi nga ipaambit ang mensahe sang pagkabun-ag ni Cristo.

“Ang Bata nga Cristo: Isa ka Sugilanon sang Pagkabun-ag.”Paano mo mabuligan ang mga miyembro sang pamilya nga mabatyagan ang pagtahod kag kalipay sa pagkatawo ni Cristo? Basaha sing ululupod ang Mateo 1:18–25; 2:1–12; Lucas 1:26–38; 2:1–20. Pwede magpili ang tagsa ka miyembro sang pamilya sang panaysayon sa balaan nga kasulatan kag iistorya kon ano ang nabatyagan sinang persona sa Manluluwas. Ang mga miyembro sang pamilya pwede man mag-istorya sang ila kaugalingon nga mga balatyagon parte sa Iya.

Pagpangita sang Manluluwas sa Daan nga Katipan.Sa imo paghanda nga tun-an ang kabuhi ni Jesucristo sa Bag-ong Katipan sa dason nga tuig, pamensara nga rebyuhon upod sa imo pamilya kon ano ang ila natun-an parte sa Iya sini nga tuig sa Daan nga Katipan. Mahimo mo man rebyuhon ang mga leksyon sa sining manwal kag ang bisan ano nga sinulat sa personal nga pagtuon para mabuligan ka sa pagdumdom sang imo natun-an. Mahimo nga makabenepisyo sa magagmay nga kabataan ang pagtan-aw sang Mga Sugilanon sa Daan nga Katipan ukon sa mga litrato sa sining manwal. Ano nga mga propesiya ukon istorya ang nagtatak gid sa aton? Ano ang aton natun-an parte sa Manluluwas?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Silent Night, Holy Night [Ang Gab-i nga Malinong],” Mga Himno kag mga Ambahanon sang Kabataan, no. 53.

Pagpauswag sang Aton Pagpanudlo

Pamatii ang mga miyembro sang imo pamilya. “Ang pagpamati isa ka akto sang pagpalangga. Nagapangayo ini nga mas ulikdan naton kon ano ang ara sa tagipusuon sang isa ka tawo sangsa kon ano ang madason nga agenda ukon leksyon. … Kon imo hatagan sang atensyon ang ginahambal kag wala ginahambal nga mga mensahe sang [mga miyembro sang pamilya], mas maintiendihan mo ang ila mga panginahanglan, ang ila mga ginakabalak-an, kag ang ila mga handum. Ang Espiritu magabulig sa inyo nga makahibalo kon paano sila tudloan” (Teaching in the Savior’s Way, 34).