Disyembre 12–18

Malaquias

“Ginhigugma Ko Ikaw, Nagasiling ang Ginuo”

Ang ngalan nga Malaquias nagakahulugan nga “akon mensahero” (Bible Dictionary, “Malachi”). Samtang imo ginatun-an ang mensahe ni Malaquias sa Israel, ano nga mga mensahe ang imo nakita para sa imo kabuhi? Paano magamit ang mga pulong ni Malaquias sa aton panahon?

Isulat Ang Imo Mga Panghunahuna

“Ginhigugma ko ikaw,” siling sang Ginuo sa Iya katawhan paagi sa propeta nga si Malaquias. Pero ang mga Israelnon, nga nag-antos sang kasakit kag pagkabihag sa mga henerasyon, nagpamangkot sa Ginuo, “Sa diin bala ginhigugma mo kami?” (Malaquias 1:2). Pagkatapos sang tanan nga inagyan sang Israel, siguro nagapamensar sila kon bala ang kasaysayan sang dumaan nga Israel matuod gid nga istorya sang gugma sang Dios sa Iya katawhan sa kasugtanan.

Sa imo pagbinagbinag sang imo nabasahan sa Daan nga Katipan sini nga tuig, ano ang nakita mo nga ebidensya sang pagpalangga sang Dios? Mahapos mangita sang madamo nga mga halimbawa sang tawhahon nga kahuyang kag pagkarebelde. Pero sa tunga sina tanan, wala mag-untat ang Dios sa paglab-ot bangud sa gugma. Sang ginmaltrato sang mga anak ni Jacob ang ila utod nga si Jose, naghanda gihapon ang Ginuo sang paagi nga maluwas sila sa tiggulutom (tan-awa sa Genesis 45:4–8). Sang magkumod-kumod ang Israel sa kamingawan, ginpakaon sila sang Dios sang mana (tan-awa sa Exodo 16:1–4). Bisan nga gintalikdan Sia sang Israel, nagdangop sa iban nga dios-dios, kag naglinapta, wala sila lubos nga gintalikdan sang Dios kundi nagpromisa nga kon maghinulsol sila, tipunon kag tubuson Niya sila “sa may dalagko nga kaluoy” (tan-awa sa Isaias 54:7).

Kon tan-awon sa sining paagi, ang Daan nga Katipan isa ka istorya sang pasensyoso, nagadugay nga gugma sang Dios. Kag ining istorya nagapadayon sa karon. “Magasubang ang Adlaw sang Pagkamatarong, nga may pag-ayo sa iya mga pakpak,” ginpropesiya ni Malaquias (Malaquias 4:2). Nag-abot matuod si Jesucristo, nga nagadala sang pisikal kag espirituhanon nga pagpang-ayo sa tanan nga magakari sa Iya. Sia ang pinakadako nga ebidensya sang gugma sang Dios para sa dumaan nga Israel kag para sa aton tanan.

 

Mga Ideya para sa Personal nga Pagtuon sang Balaan nga mga Kasulatan

Malaquias 1–4

“Balik kamo sa akon, kag magabalik ako sa inyo.”

Sang tiyempo ni Malaquias, natukod na liwat sang mga Israelnon ang templo sa Jerusalem, pero bilang katawhan kinahanglan nila gihapon nga tukuron liwat ang ila kaangtanan sa Ginuo. Samtang imo ginatun-an ang Malaquias, pangitaa ang mga pamangkot nga ginpamangkot sang Ginuo sa mga Israelnon ukon ila ginpamangkot sa Iya. Hunahunaa nga pamangkuton ang imo kaugalingon sang pareho nga mga pamangkot (ang pila ka mga halimbawa ara sa idalom) para buligan ka nga tan-awon ang imo relasyon sa Ginuo kag mas magpalapit sa Iya.

• Paano ko nabatyagan ang pagpalangga sang Ginuo sa akon? (tan-awa sa Malaquias 1:2).

• Ang akon bala nga mga halad sa Ginuo matuod nga nagatahod sa Iya? (tan-awa sa Malaquias 1:6–11).

• Sa ano nga mga paagi ako “makabalik” sa Ginuo? (tan-awa sa Malaquias 3:7).

• Ginakawatan ko bala ang Dios sa bisan ano nga paagi? (tan-awa sa Malaquias 3:8–11).

• Paano ginapakita sang akon pamatasan sa tion sang kabudlayan ang akon balatyagon tuhoy sa Ginuo? (tan-awa sa Malaquias 3:13–15; tan-awa man sa 2:17).

 

Malaquias 1:6–14

Ang Ginuo nagapangayo sang “isa ka dulot nga putli.”

Ang mga pulong sang Ginuo sa Malaquias 1 nagapakita nga ang Israelnon nga mga pari nagahalad sang may depekto kag masakiton nga mga sapat bilang mga halad sa templo, nga ginadumilian sang Ginuo (tan-awa sa Levitico 22:17–25). Ano ang ginapahangop sining mga halad parte sa balatyagon sang mga pari para sa Ginuo? (tan-awa sa Malaquias 1:13). Ngaa ginapangabay sa aton sang Ginuo nga ihatag sa Iya ang pinakamaayo naton nga halad? Pamensara ang mga halad nga ginpahimo sang Ginuo sa imo. Ano ang pwede mo himuon para hatagan Sia sing “halad nga putli”? (Malaquias 1:11; tan-awa man sa 3:3).

Tan-awa man sa Moroni 7:5–14.

Malaquias 3–4

Ang mga propesiya ni Malaquias nagakatuman na sa ulihing mga adlaw.

Sang magbisita ang Manluluwas sa kadutaan sang Amerika, ginsambit Niya ang Malaquias 3–4 sa mga Nefinhon (tan-awa sa 3 Nefi 24–25). Sang 1823, si anghel Moroni nagpaambit sang mga bahin sining amo man nga mga kapitulo kay Joseph Smith (tan-awa sa Joseph Smith—Kasaysayan 1:36–39; tan-awa man sa Doktrina kag mga Kasugtanan 2). Ngaa sa banta mo nga ang mga pulong ni Malaquias pirme ginasulit-sulit sa balaan nga mga kasulatan? (tan-awa man sa Doktrina kag mga Kasugtanan 27:9; 110:13–16; 128:17–18). Sa imo opinyon, ano nga mga mensahe sa Malaquias 3–4 ang daw importante gid sa aton panahon?

Sang ginsambit ni Moroni ang Malaquias 4:5–6 kay Joseph Smith, ginhimo niya ini nga “may diutay nga kinalain sangsa paagi nga mabasa naton ini” sa Biblia (Joseph Smith—Kasaysayan 1:36). Ano ang kinalain nga gindugang ni Moroni sa aton paghangop sining propesiya? Para sa dugang nga pagtuon parte sa pagkari ni Elias kag kon paano nagakatuman ining propesiya sa karon, tan-awa sa Doktrina kag mga Kasugtanan 110:13–16.   Ngaa nagapasalamat ka nga nagkari si Elias?

Larawan ni Elias nga nagapakita kay Joseph Smith kag Oliver Cowdery sa Templo sang Kirtland, ni Robert T. Barrett

Malaquias 3:8–12

Ang pagbayad sang ikapulo nagabukas sang mga bintana sang langit.

Samtang imo ginabasa ang Malaquias 3:8–12, pamensara ang imo kaugalingon nga mga eksperiyensya sa pagbayad sang ikapulo. Ano ang kahulugan sa imo sang dinalan nga “[buksan] sa inyo ang mga talambuan sang langit” (bersikulo 10)?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Malaquias 1:2.Paano sabton sang inyo pamilya ang pamangkot nga makita sa Malaquias 1:2—“Sa diin bala [nga] ginhigugma kami sang [Ginuo]?” Ano ang pila sa mga ebidensya sang gugma sang Ginuo sa aton?

Malaquias 3:8–12.Samtang inyo ginabasa ang Malaquias 3:8–12, agdaha ang mga miyembro sang pamilya nga iistorya ang ila mga panghunahuna ukon balatyagon parte sa ikapulo. Ano ang temporal kag espirituhanon nga mga bugay ang aton nakita tungod sa pagbayad sang ikapulo?   Basi masadyahan ang mga miyembro sang pamilya sa pagdrowing sang mga litrato nga nagarepresentar sining mga bugay kag sa pagpakabit sining mga litrato sa bintana.

Malaquias 3:13–18.Ano ang kahulugan sa aton sang mangin kabahin sang Ginuo kag mangin isa sa Iya “[mga hiyas]”?

Malaquias 4:5–6.Pagkatapos nga basahon ining mga bersikulo, pwede nga pangitaon sang inyo pamilya ang mga sabat sa masunod nga mga pamangkot parte sa propesiya ni Malaquias: Sin-o? Ano? San-o? Diin? Ngaa? (tan-awa man sa Doktrina kag mga Kasugtanan 2).

Paano naton lisuon ang aton mga tagipusuon sa aton mga ginikanan? Paano kita ginabugayan kon himuon naton ini?   Ano ang himuon naton bilang pamilya para mabaton ining mga bugay?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

 

Pagpauswag sang Personal nga Pagtuon

Magpamangkot samtang nagatuon. Samtang nagatuon ka sang balaan nga mga kasulatan, mahimo nga may mga pamangkot nga magsulod sa imo kaisipan. Hunahunaa sing maayo ining mga pamangkot, kag magpangita sang mga sabat.

Mourning’s Hosanna [Hosana ni Mourning], ni Rose Datoc Dall. Isa ka babayi nga ang ngalan Mourning nagatindog sa kalibutan sang espiritu, nga ginapalibutan sang iya mga himata. Ginaselebrar niya ang ila kahilwayan sa espirituhanon nga pagkabihag.