“Disyembre 5–11. Hageo; Zacarias 1–3; 7–14: ‘Balaan sa Ginuo,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)
“Disyembre 5–11. Hageo; Zacarias 1–3; 7–14,” Dali, Magsunod sa Akon—Para sa Mga Indibidwal kag Mga Pamilya: 2022
Templo sang Laie Hawaii
Disyembre 5–11
Hageo; Zacarias 1–3; 7–14
“Balaan sa Ginuo”
Ang pagbasa sang balaan nga mga kasulatan nagaimbitar sang rebelasyon. Mangin bukas sa mga mensahe nga ipahayag sang Balaan nga Espiritu sa imo samtang imo ginabasa ang Hageo kag Zacarias.
Isulat Ang Imo Mga Panghunahuna
Pagkatapos sang dinekada nga pagkabihag, isa ka grupo sang mga Israelnon, posible lakip ang mga propeta nga sanday Hageo kag Zacarias, ang gintugtan nga makabalik sa Jerusalem. Pila sa sining grupo nakadumdum kon ano ang hitsura sang Jerusalem antes ini mawasak. Pamensara ang ila mga balatyagon sang makita nila ang kahalitan sa sadto ila mga balay, mga lugar nga ila ginasimbahan, kag ila templo. Sa mga nagpamangkot kon bala ang templo mangin pareho pa liwat sa “balay [sang Ginuo] sa iya una nga himaya” (Hageo 2:3), ginhambal sang propeta nga si Hageo ang mga pulong sang pagpaisog sang Ginuo: “Magpakabakod, tanan kamo nga katawhan sang duta, nagasiling ang Ginuo, [kag] magpangabudlay: kay nagaupod ako sa inyo, … dili kamo magkahadlok.” “Pun-on ko ining balay sing himaya, … kag sa sining duog ihatag ko ang paghidaet.” (Hageo 2:4–5, 7, 9.)
Pero indi lamang ang balaan nga templo ang kinahanglan tukuron liwat. Sa madamo nga paagi, ang katawhan sang Dios sa espirituhanon wasak man. Kag ang pagtukod liwat sang balaan nga katawhan nagakinahanglan sing mas masobra pa sangsa pagpanghakot sang bato kag pagplastar sini para magpatindog sang pader sang templo. Sa karon, ang mga templo may marka nga “Balaan sa Ginuo,” kag ang amo nga mga pulong magamit indi lamang sa pagtukod kundi sa pagpangabuhi. Ang pagkurit sining mga tinaga sa “mga kiling-kiling sang mga kabayo” kag sa “tagsa ka kolon sa Jerusalem” (Zacarias 14:20–21) makabulig lamang kon ginkurit man ang mga ini sa tagsa ka tagipusuon. Ang matuodtuod nga pagkabalaan nagapangayo nga ang mga pulong kag layi sang Ginuo “maglambot” (Zacarias 1:6) sa aton, nga ginatugotan ang Iya gahum nga bag-uhon ang aton mga kinaiya agud mangin balaan kita pareho sa Iya (tan-awa sa Levitico 19:2).
Mga Ideya para sa Personal nga Pagtuon sang Balaan nga mga Kasulatan
“Patugsilingi ang inyo mga dalanon.”
Madamo ang importante nga buluhaton para tukuron liwat ang Jerusalem. Pero pagligad sang halos 15 anyos halin sang pagbalik sang mga Israelnon, wala malipay ang Ginuo nga ang pagpatukod liwat sang templo wala ginhatagan sang mas mataas nga prayoridad (tan-awa sa Hageo 1:2–5; tan-awa man sa Esdras 4:24). Samtang imo ginabasa ang Hageo 1; 2:1–9, pamensara ang mga pamangkot pareho sang mga ini: Ano ang mga konsikwensya nga gin-atubang sang mga Israelnon tungod wala nila matapos ang templo? Ano nga mga bugay ang ginpromisa sang Ginuo sa ila kon matapos nila tukod ang Iya balay? Mahimo mo man gamiton ining oportunidad para “patugsilingan ang imo mga dalanon”—nga hunahunaon ang imo mga prayoridad kag kon paano mo ini bagayon sa mga prayoridad sang Ginuo.
Tan-awa man sa Doktrina kag mga Kasugtanan 95.
Sarang ako pakabalaanon sang Ginuo.
Si Sister Carol F. McConkie nagtudlo: “Ang pagkabalaan amo ang paghimo sang mga pagpili nga magapatiner sang Balaan nga Espiritu bilang aton giya. Ang pagkabalaan amo ang pagpahigad sang aton kinaugali nga mga huyog kag mangin ‘isa ka santos paagi sa pagbayad-sala ni Cristo nga Ginuo,’ [Mosias 3:19]. … Ang aton paglaum sa pagkabalaan nasentro kay Cristo, sa Iya kaluoy kag sa Iya grasya” (“The Beauty of Holiness,” Ensign ukon Liahona, Mayo 2017, 9–10). Tandai ining mga pinanudlo samtang imo ginabasa ang mga pulong sang Ginuo, nga ginhatag paagi sa propeta nga si Zacarias, nga nagapangabay sa Israel nga mangin mas balaan: Zacarias 1:1–6; 3:1–7; 7:8–10; 8:16–17. Tandai ang mga butang nga ginpahimo sang Ginuo sa Israel para mahimo Niya sila nga balaan. Paano ka Niya ginabuligan nga mangin mas balaan?
Ang Zacarias 2:10–11; 8:1–8; 14:9–11, 20–21 nagalaragway kon daw mangin ano ang kabuhi sa palaabuton kon magapuyo na kita tanan upod sa Ginuo sa kahimtangan sang pagkabalaan. Ano ayhan ang nangin kahulugan sining mga paglaragway sa ila nga nagatukod liwat sang Jerusalem sang tiyempo ni Zacarias? Ano ang mga kahulugan sini sa imo?
“Yari karon, ang imo Hari nagaabot sa imo: matarong sia kag may kaluwasan; mapainubuson kag nagasakay sa asno” (Zacarias 9:9). Triumphal Entry [Madinalag-on nga Pagsulod], ni Harry Anderson
Zacarias 9:9–11; 11:12–13; 12:10; 13:6–7; 14:1–9
Si Jesucristo amo ang ginpromisa nga Mesias.
Pila sa mga sinulatan ni Zacarias nagatumod sa dutan-on nga pag-alagad ni Jesucristo kag sa Iya man nga palaabuton nga Ikaduhang Pagkari. Ikumparar ang masunod nga mga propesiya sa Zacarias sa kaanggid nga mga dinalan sa iban pa nga mga libro sang balaan nga kasulatan:
-
Zacarias 9:9–11 (tan-awa sa Mateo 21:1–11; 1 Pedro 3:18–19)
-
Zacarias 11:12–13 (tan-awa sa Mateo 26:14–16; 27:1–7)
-
Zacarias 12:10 (tan-awa sa Juan 19:37; Bugna 1:7)
-
Zacarias 13:6–7; 14:1–9 (tan-awa sa Mateo 26:31; Doktrina kag mga Kasugtanan 45:47–53)
Ano ang imo natun-an parte sa Manluluwas samtang imo ginatun-an ining mga dinalan? Ngaa importante sa imo nga imo maintiendihan ining mga dinalan?
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Hageo 1:2–7.Ining mga bersikulo mahimo nga magtulod sa inyo pamilya nga “patugsilingan ang inyo mga dalanon.” Basi pwede nga drama-dramahon sang mga miyembro sang pamilya ang mga dinalan sa bersikulo 6. Ano ang ginatudlo sining bersikulo parte sa paghatag balor sa mga butang sang kalibutan labaw sangsa mga butang sang Dios? Mahimo ninyo hambalan sing ululupod ang mga prayoridad sang inyo pamilya. Buligi ang imo pamilya nga timbangon kon ano ang inyo ginahimo nga maayo kag ang mga aspeto nga pwede pa ninyo pauswagon.
-
Hageo 2:1–9.Para ipresentar ining mga bersikulo, pwede mo iistorya ang sugilanon sang Templo sa Provo City Center, nga ginpatindog liwat halin sa pinalangga nga tabernakulo nga nasunog (tan-awa sa litrato sa sining outline). Samtang ginabasa sang inyo pamilya ang Hageo 2:1–9, pwede mo pangabayon ang mga miyembro sang pamilya nga magpamensar sang butang sa aton mga kabuhi nga daw pareho sa pagpatindog liwat sang templo nga nawasak na. Paano kita ginatukod liwat sang Ginuo pagkatapos sang trahedya ukon kabudlayan?
-
Zacarias 3:1–7.Samtang inyo ginabasa ining mga bersikulo, pwede mo ipakita sa inyo pamilya ang pila ka mahigko nga mga bayo. Ano ayhan ang nabatyagan ni Josue sang magtindog sia sa atubangan sang anghel nga nagasuksok sang mahigko nga mga bayo? Sa ano nangin pareho ang sala sa mahigko nga mga bayo? Ano ang ginatudlo sang Zacarias 3:1–7 sa aton parte sa pagpatawad? Pwede ninyo dayon labhan ang mga bayo sing ululupod kag hambalan ang parte sa nagapangtinlo nga gahum sang Pagbayad-Sala sang Manluluwas .
-
Zacarias 8:1–8.Ano ang nanamian naton sa panan-awon ni Zacarias sa palaabuton sang Jerusalem? Ano ang aton nakita didto nga gusto naton makita sa aton komunidad? Paano naton agdahon ang Manluluwas nga “magpuyo sa tunga [naton]”?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Ginapanugyan nga kanta: “Teach Me to Walk in the Light [Tudloi Ako sang Iya Gugma],” Mga Himno kag mga Ambahanon sang Kabataan, no. 66.
Pagpauswag sang Personal nga Pagtuon
Magpangita sang mga oportunidad para tulotimbangon ang kaugalingon. Sa imo pagtuon sang balaan nga mga kasulatan, masami ka nga mainspirar sa pagbinagbinag sang imo kaugalingon nga pangako sa Amay nga Langitnon kag kay Jesucristo. Aktohi ang mga panghunahuna nga imo mabaton.