“Nobyembre 14–20. Amos; Abdias: ‘Pangitaa ang Ginuo, kag Magakabuhi Kamo,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)
“Nobyembre 14–20. Amos; Abdias,” Dali, Magsunod sa Akon—Para sa Mga Indibidwal kag Mga Pamilya: 2022
Bread of Life [Tinapay sang Kabuhi], ni Chris Young
Nobyembre 14–20
Amos; Abdias
“Pangitaa ang Ginuo, kag Magakabuhi Kamo”
Ang Balaan nga Espiritu sarang magbukas sang imo hunahuna kag tagipusuon sa mga mensahe sa pulong sang Dios nga para gid sa imo. Ano sa pamatyag mo ang gusto sang Ginuo nga imo matun-an sini nga semana?
Isulat Ang Imo Mga Panghunahuna
Ginpili sang Dios ang mga kaliwatan ni Abraham nga mangin Iya katawhan sa kasugtanan agud sila “mangin pagpakamaayo” sa tanan nga katawhan (tan-awa sa Genesis 12:2–3). Pero ang natabo, sang tiyempo sang pag-alagad ni Amos, madamo sa mga katawhan sa kasugtanan nagapamigos sang mga imol kag nagabale-wala sang mga propeta, nga nagahimo sang ila mga akto sang pagsimba nga wala sing sinseridad kag kahulugan (tan-awa sa Amos 2:6–16). Matuod, ang mga pungsod nga nagapalibot sa ila nagahimo man sang dalagko nga mga sala (tan-awa sa Amos 1; 2:1–5), pero indi ina magamit nga rason para sa katawhan sang Dios (tan-awa sa Amos 3:2). Gani nagpadala ang Dios sang manugpahalab halin sa Juda nga ang ngalan si Amos para magwali sang paghinulsol sa Ginharian sang Israel. Sang ulihi, gindeklarar man sang Dios paagi kay propeta Abdias nga bisan pa nawasak ang Ginharian sang Juda, pagatipunon liwat sang -Ginuo kag bugayan ang Iya katawhan. Ang mga katawhan sa kasugtanan nagpalayo sa Ginuo, panaksihon sang duha ka mga propeta, pero indi sila pag-isikway hasta mientras. Kon ginapahayag sang Dios ang Iya mga sekreto sa Iya mga alagad nga mga propeta (tan-awa sa Amos 3:7), kabigon naton ini nga tanda nga gusto Niya kita sa gihapon buligan nga magpangabuhi suno sa aton mga kasugtanan nga ginhimo upod sa Iya.
Mga Ideya para sa Personal nga Pagtuon sang Balaan nga mga Kasulatan
Ang Ginuo nagapahayag sang kamatuoran paagi sa Iya mga propeta.
Sa Amos 3:3–6, nagpresentar ang propeta nga si Amos sang pila ka mga halimbawa sang kawsa kag resulta: tungod nakakita ang leon sang tulukbon, ang leon nagangurob; tungod may siod nga ginplastar para makadakop sang pispis, nasiod ang pispis. (Pat-ini nga sa Joseph Smith Translation sang bersikulo 6, ang tinaga nga “done [nahimo]” gin-islan sang “known [nahibaloan].” Sa mga bersikulo 7–8, gingamit ni Amos ining lohika sa mga propeta. Ano ang rason nga nagapropesiya ang propeta? Ano pa ang imo matun-an parte sa mga propeta samtang imo ginabasa ang Amos 7:10–15? Binagbinaga kon ngaa nagapasalamat ka nga ang Ginuo sa gihapon “[nagapahayag sang] iya tinago sa iya mga alagad nga mga manalagna” (Amos 3:7). Ano ang ginapahangop sining kamatuoran sa imo parte sa Dios?
Tan-awa man sa Doktrina kag mga Kasugtanan 1:38; 21:4–8; 35:13–14.
“Pangitaa ang Ginuo, kag magakabuhi kamo.”
Samtang imo ginabasa ang Amos 4:6–13, tandai ang mga paghukom nga ginpadala sang Ginuo sa katawhan sang Israel. Ano ang ginapahangop sining mga bersikulo parte sa ginalauman sang Ginuo nga matabo pagkatapos sang tagsa sining mga eksperiyensya? (tan-awa man sa Helaman 12:3). Panumduma ang isa ka pagtilaw nga imo naeksperiyensyahan sining karon lang. Bisan nga mahimo nga ang imo pagtilaw wala ginpadala sang Dios, binagbinaga kon paano ka mahatagan sini sang mga oportunidad nga pangitaon Sia.
Basaha ang Amos 5:4, 14–15, kag binagbinaga kon paano ang Ginuo nangin “maayo” (bersikulo 15) sa imo samtang ginapangita mo Sia, bisan sa tion sang imo pagtilaw.
Ang pulong sang Ginuo sarang magbusog sang espirituhanon nga kagutom kag kauhaw.
Tanan kita nagaeksperiyensya sang tinion sang espirituhanon nga kagutom kag kauhaw, pero indi naton kinahanglan nga “magdalangdalang kutob sa dagat pa-dagat” (Amos 8:12) sa pagpangita sang makabusog sa aton. Nakahibalo kita kon ano ang makabulong sinang espirituhanon nga kagutom, kag ginbugayan kita sang pulong sang Ginuo sing abunansya. Samtang imo ginabasa ang Amos 8:11–12, pamensara kon ngaa maayo nga paanggid ang tiggulutom sa pagpangabuhi nga wala ang pulong sang Dios. Ano ang dugang nga ihibalo ang imo makita sa Mateo 5:6; Juan 6:26–35; 2 Nefi 9:50–51; 32:3; Enos 1:4–8?
Sarang kita mangin mga manluluwas sa Bukid nga Sion paagi sa paghimo sang buluhaton sa templo kag family history.
Sin-o ang mga “manluluwas … sa bukid nga Sion”?
Si Pangulong Gordon B. Hinckley naghatag sang isa ka posible nga interpretasyon sang dinalan nga “mga manluluwas sa bukid nga Sion,” nga ginaangot ang dinalan nga ini sa buluhaton sa templo kag family history: “[Sa sulod sang templo] literal kita nga nangin mga manluluwas sa Bukid nga Sion. Ano ang buot silingon sini? Pareho nga ginhatag sang aton Manunubos ang Iya kabuhi bilang tal-os nga halad para sa tanan nga tawo, kag sa paghimo sini nangin aton Manluluwas, sa amo man kita, sa gamay nga paagi, kon maghikot kita sang tal-os nga buluhaton sa templo, mangin mga manluluwas sa ila nga ara sa pihak nga kabuhi nga wala sing paagi nga makauswag luwas kon may buhaton para sa ila ang inang mga ara sa duta” (“Closing Remarks,” Ensign ukon Liahona, Nob. 2004, 105).
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Amos 3:7.Pwede ninyo rebyuhon ang pila sa nagligad lang nga mga mensahe sang Pangulo sang Simbahan kag hambalan kon ano ang ginapahayag sang Ginuo sa inyo pamilya paagi sa iya. Ngaa importante nga may propeta nga nagapamuno sa Simbahan? Paano naton nahibal-an nga isa sia ka matuod nga propeta? Ano ang aton ginahimo para sundon ang iya laygay?
-
Amos 5:4.Pwede maghimo ang inyo pamilya sang poster nga ipakabit sa inyo balay nga nasulat ining bersikulo. Ano ang buot silingon sang pangitaon ang Ginuo? Paano naton Sia pangitaon? Ano nga mga bugay ang aton mabaton kon himuon naton ini? Mahimo mo agdahon ang mga miyembro sang pamilya nga mag-istorya kag hambalan ang iban pa nga mga dinalan nga nagatudlo parte sa pagpangita sa Ginuo, pareho sang Mateo 7:7–8; Eter 12:41; kag Doktrina kag mga Kasugtanan 88:63.
-
Amos 8:11–12.Basi masadyahan ang mga kabataan sang paghimo-himo sang mga aksyon nga nagabagay sa mga dinalan sa sining mga bersikulo. Kon ang aton mga lawas ginagutom ukon ginauhaw, ano ang aton ginahimo? Kon ang aton mga espiritu ginagutom ukon ginauhaw, ano ang aton ginahimo? Paano ginabusog sang Pagpanumbalik sang ebanghelyo ang aton espirituhanon nga kagutom?
-
Abdias 1:21.Ano ayhan ang buot silingon sang mangin “mga manluluwas … sa Bukid nga Sion”? (Para sa isa ka posible nga paathag, tan-awa sa pahayag ni Pangulong Gordon B. Hinckley sa “Mga Ideya para sa Personal nga Pagtuon sang Balaan nga mga Kasulatan.”) Sin-o sa aton mga katigulangan ang nagakinahanglan sang nagapangluwas nga mga ordinansa? Ano ang aton himuon para mabuligan sila?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Ginapanugyan nga kanta: “Salamat, O Dios, sa Manalagna,” Mga Himno kag mga Ambahanon sang Kabataan, no. 36.
Pagpauswag sang Personal nga Pagtuon
Maggamit sang musika para imbitahon ang Espiritu kag magtuon sang doktrina. Ang pagpamati ukon pagbasa sang himno makabulig sa imo nga matun-an ang mga prinsipyo sang ebanghelyo. Halimbawa, pwede mo pamatian ukon basahon ang “Salamat, O Dios, sa Manalagna” (Mga Himno kag mga Ambahanon sang Kabataan, no.36) para mag-inspirar sang mas dako nga pagtuo sa buhi nga mga propeta. (Tan-awa sa Teaching in the Savior’s Way, 22.)
Templo sang Santo Domingo Dominican Republic