“Oktubre 31–Nobyembre 6. Daniel 1–6: ‘Walay Iban nga Dios nga Sarang Makaluwas,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)

“Oktubre 31–Nobyembre 6. Daniel 1–6,” Dali, Magsunod sa Akon—Para sa Mga Indibidwal kag Mga Pamilya: 2022

Litrato

Si Daniel nga nagapaathag sang damgo sang hari

Daniel Interprets Nebuchadnezzar’s Dream [Si Daniel nga Nagapaathag sang Damgo ni Nabucodonosor], ni Grant Romney Clawson

Oktubre 31–Nobyembre 6

Daniel 1–6

“Walay Iban nga Dios nga Sarang Makaluwas”

Si Elder Richard G. Scott nagpaathag nga ang pagsulat sang inspirasyon “nagapakita sa Dios nga ang Iya komunikasyon sagrado sa aton. Ang pagsulat nagapadako pa gid sang aton ikasarang nga magdumdom sang rebelasyon” (“How to Obtain Revelation and Inspiration for Your Personal Life,” Ensign ukon Liahona, Mayo 2012, 46).

Isulat Ang Imo Mga Panghunahuna

Laban-laban wala sang may magpahog sa imo nga ihaboy ka sa nagadabadaba nga hurno ukon sa kuweba sang mga leon tungod sang imo pagtuo kay Jesucristo. Pero wala sing isa sa aton nga makalampuwas sining kabuhi nga indi makaagi sang pagtilaw sang pagtuo. Tanan kita makabenepisyo sa halimbawa sang mga tawo nga pareho nanday Daniel, Sadrac, Mesac, kag Abednego, nga ginbihag nga mga solterito pa sang gamhanan nga Imperyo sang Babilonia (tan-awa sa 2 Mga Hari 24:10–16). Ining mga pamatan-on ginpalibutan sang indi pamilyar nga kultura nga may lain nga mga panindugan, kag nangatubang sila sang dalagko nga tentasyon nga bayaan ang ila mga ginapatihan kag matarong nga mga tradisyon. Pero nagpabilin sila nga matuod sa ila nga kasugtanan. Pareho kay Jose sa Egipto kag Ester sa Persia, si Daniel kag ang iya kaabyanan sa Babilonia nagkapyot sa ila pagtuo sa Dios, kag ang Dios naghikot sang mga milagro nga sa gihapon nagainspirar sang mga tumuluo tubtob subong.

Paano sila nakakita sang kusog nga magpabilin nga matinuohon? Ginhimo nila inang magagmay kag simple nga mga butang nga ginapangayo sang Dios nga himuon sang tagsa sa aton—magpangamuyo, magpuasa, magpili sang maayo nga kaabyanan, magsalig sa Dios, kag mangin kasanag para sa iban. Samtang ginapabakod kita sang paghimo sang pareho nga magagmay kag simple nga mga butang, masarangan naton atubangon ang mga leon kag ang nagadabadaba nga mga hurno sa aton mga kabuhi nga may pagtuo.

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Daniel 1; 3; 6

Makasalig ako sa Ginuo kon ginatilawan ang akon pagtuo.

Kon pamensaron gid, tanan kita nagapuyo sa Babilonia. Ang kalibutan sa palibot naton puno sang madamo nga tentasyon nga ikompromiso ang aton mga talaksan kag duhaduhaan ang aton pagtuo kay Jesucristo. Samtang imo ginabasa ang Daniel 1, 3, kag 6, tandai ang mga paagi nga ginpilit sila ni Daniel, Sadrac, Mesac, kag Abednego sa paghimo sang mga butang nga nahibal-an nila nga sala. Nakabatyag ka na bala nga ginpilit nga ikompromiso ang imo mga ginapatihan? Ano ang imo matun-an sa sining mga pamatan-on nga makabulig sa imo nga magsalig sa Ginuo kon nagapangatubang ka sang oposisyon?

Ang libro ni Daniel kag ang madamo pa nga balaan nga kasulatan nagarekord sang mga eksperiyensya kon diin ang dako nga pagtuo nagdala sang dalagko nga mga milagro. Pero paano kon ang aton pagtuo wala nagadala sang mga milagro nga aton ginapangayo? (tan-awa halimbawa, sa Alma 14:8–13). Base sa imo nabasahan sa Daniel 3:13–18, paano sa banta mo sabton ni Sadrac, Mesac, kag Abednego ining pamangkot? Paano makaapekto ang ila ehemplo sa paagi nga ginaatubang mo ang mga pagtilaw sang imo pagtuo?

Ang libro ni Daniel nagapakita man kon paano ang matarong nga mga pagpili sang isa ka indibidwal makagiya sa iban padulong sa mas dako nga pagtuo sa Ginuo. Ano nga mga halimbawa sini ang imo makita sa mga kapitulo 1, 3, kag 6? Binagbinaga ang mga epekto sang imo mga pagpili sa iban (tan-awa sa Mateo 5:16).

Larawan ni Daniel kag sang iya kaabyanan nga nagabalibad sang pagkaon sang hari, ni Brian Call

Daniel 2

Ang Simbahan ni Jesucristo sang mga Santos sa Ulihing mga Adlaw amo ang ginharian sang Dios sa duta.

Paagi sa rebelasyon, nakita ni Daniel nga ang damgo ni Nabucodonosor nagasugid parte sa palaabuton nga dutan-on nga mga ginharian, subong man sang palaabuton nga ginharian sang Dios, nga “dili gid malaglag” (Daniel 2:44). “Ang Simbahan amo inang ginpropesiya nga ginharian sa ulihing adlaw,” gintudlo ni Elder D. Todd Christofferson, “indi ang hinimo sang tawo kundi ang gintukod sang Dios sang langit kag nagadaligdig bilang bato nga ‘natiphag sa bukid sa wala sing mga kamot’ agud pun-on ang duta” (“Why the Church,” Ensign ukon Liahona, Nob. 2015, 111). Pamensara ang ginharian sang Dios sa ulihing adlaw samtang imo ginabasa ang mga deskripsyon sang bato sa Daniel 2:34–35, 44–45. Ano ang mga pagpalareho nga imo makita sa bato kag sa ginharian? Paano mo nakita ang ginharian sang Dios nga ginapuno ang kalibutan sa karon?

Daniel 3:19–28

The Manluluwas magasuporta sa akon sa akon mga pagtilaw.

Ano nga mga panghunahuna ang nagaabot sa imo samtang imo ginabasa ang parte sa ikaapat nga porma nga nakita sa nagadabadaba nga hurno upod nanday Sadrac, Mesac, kag Abednego? Paano makabulig sa imo ining panaysayon sa mga pagtilaw nga imo ginaatubang? Mahimo nga makakita ka sang dugang nga ihibalo sa Mosias 3:5–7; Alma 7:11–13; Doktrina kag mga Kasugtanan 61:36–37; 121:5–8.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Daniel 1–2.Samtang imo ginabasa ang Daniel 1 kag 2 sing ululupod, pwede ninyo pangitaon ang mga bugay nga nabaton ni Daniel kag sang iya kaabyanan bangud sang paglikaw sa pagkaon sang karne kag alak sang hari. Pwede mo ikumparar ina nga mga bugay sa mga ginpromisa sang Ginuo sa aton samtang aton ginatuman ang Iya mga kasuguan, pareho sang Pulong sang Kaalam (tan-awa sa Doktrina kag mga Kasugtanan 89:18–21). Paano kita ginbugayan sang Ginuo bangud sang pagpangabuhi sang Pulong sang Kaalam?

Daniel 3.Paano mo mabuligan ang imo pamilya nga matun-an ang parte sa sugilanon sa Daniel 3? “Ang Sadrac, Mesac, kag Abednego” sa Mga Sugilanon sa Daan nga Katipan mahimo nga makabulig. Ano ang aton nanamian parte kanday Sadrac, Mesac, kag Abednego? Ano nga mga sitwasyon ang aton ginaatubang nga nagahangkat sang aton pagtuo kag nagapangayo sa aton nga ipakita ang aton pagsalig sa Dios?

Daniel 6:1–23.Mahimo nga masadyahan ang inyo pamilya sa pagdrama-drama sang mga bahin sang sugilanon sa Daniel 6:1–23 (halimbawa, sa mga bersikulo 10–12 ukon 16–23). Ano ang aton matun-an sa ehemplo ni Daniel? Ano ang sarang naton himuon para mangin mas pareho sa iya?

Daniel 6:25–27.Suno sa sining mga bersikulo, paano naapektuhan si Haring Dario sang ginluwas sang Ginuo si Daniel sa mga leon? Pwede man ninyo basahon sa Daniel 2:47; 3:28–29 kon paano naapektuhan si Haring Nabucodonosor sa pareho man nga paagi. Ano ang mga oportunidad nga ara sa aton para impluwensyahan ang iban? Hambali ang mga ehemplo nga inyo nakita kon paano ang pagtuo sang iban nga mga tawo, lakip na sang mga miyembro sa pamilya, nakaimpluwensya sa iban para sa kaayuhan.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Itudlo ang doktrina. Ang ebanghelyo sang Ginuo matahum sa iya kasimple (tan-awa sa Doktrina kag mga Kasugtanan 133:57). Ang simple nga aktibidades kag mga paghinambalanay nga nakatutok sa doktrina sarang mag-imbitar sang Balaan nga Espiritu sa pagdala sang mensahe sang ebanghelyo sa mga tagipusuon sang inyo pamilya.