Come, Follow Me [Kari, Magsunod sa Akon], ni Scott Sumner

Oktubre 24–30

Ezequiel 1–3; 33–34; 36–37; 47

“Ibutang Ko ang Espiritu nga Bag-o sa Sulod Ninyo”

Si Ezequiel simboliko nga gin-agda nga “kaunon” ang pulong sang Dios—nga busgon ang iya kaugalingon sa sini (tan-awa sa Ezequiel 2:9–3:3, 10). Paano mo busgon ang imo kaugalingon sa pulong sang Dios sini nga semana?

Isulat Ang Imo Mga Panghunahuna

Si Ezequiel isa ka propeta nga nabihag. Upod sa iban nga mga Israelnon, nadakpan sia kag ginpadala sa Babilonia sa sulod sang pila ka tuig antes mawasak sang ulihi ang Jerusalem. Sa Jerusalem, kuntani isa ka pari si Ezequiel nga nagasebisyo sa templo. Sa Babilonia, isa sia sang “mga [binihag],” kag sia “naglingkod didto” (Ezequiel 3:15), pila ka gatos ka milya halin sa templo kag may diutay lang nga paglaum nga makabalik sa pinalangga nga balay sang Dios. Dayon isa ka adlaw may panan-awon si Ezequiel. Nakita niya “ang himaya sang Ginuo” (Ezequiel 1:28)—indi didto sa templo sa Jerusalem kundi didto sa Babilonia sa tunga sang mga bihag. Ang kalainan sa Jerusalem, iya nahibal-an, naglala na gid nga ang presensya sang Dios wala na didto (tan-awa sa Ezequiel 8–11; 33:21).

Isa sa mga ulobrahon ni Ezequiel amo ang paandaman ang mga Israelnon parte sa mga konsikwensya sang ila pagrebelde—paandam nga wala ginsapak. Pero may dugang pa sa mensahe ni Ezequiel: nagpropesiya sia nga, bisan nga naglain na ang tanan, may paagi nga magbalik. Kon batunon sang katawhan sang Dios ang imbitasyon nga “pamatii ang pulong sang Ginuo” (Ezequiel 37:4), ang butang nga patay na mabuhi pa liwat. Ang “batubatuhon nga tagipusuon” sarang maislan sang “bag-ong tagipusuon” (Ezequiel 36:26). “Pasudlon [ko] ang akon espiritu sa inyo,” siling sang Ginuo sa ila, “kag mabuhi kamo” (Ezequiel 37:14). Kag sa ulihing mga adlaw, magatukod ang Ginuo sang bag-o nga templo kag bag-ong Jerusalem, “kag ang ngalan sang banwa kutob niyan mangin, Ang Ginuo [ato] didto” (Ezequiel 48:35).

Mga Ideya para sa Personal nga Pagtuon sang Balaan nga mga Kasulatan

Ezequiel 1–3

“Ipamulong mo ang akon mga pulong.”

Ang pagbasa parte sa pagtawag kay Ezequiel sa pag-alagad sa Ezequiel 1–3 mahimo nga magtulod sa imo nga hunahunaon ang mga oportunidad nga ginhatag sang Dios sa imo nga “ipamulong ang [Iya] mga pulong” sa iban (Ezequiel 3:4). Sa Ezequiel 2–3, pat-ini ang Iya mga pulong sang pagpaisog kag instruksyon kay Ezequiel. Bisan pa nga ang imo mga ginaalagaran siguro daw indi pareho karebelde sa katawhan ni Ezequiel, pamensara kon paano maapektuhan sang mga pulong sang Dios kay Ezequiel ang imo panan-awan parte sa imo pagserbisyo sa Simbahan, sa balay, kag sa bisan diin.

Tan-awa man sa Ezequiel 33:1–9.

Ezequiel 33:10–19

Gusto sang Ginuo nga magpatawad.

“[Kon] ang amon … mga sala yari sa amon,” nahunahuna sang ginbihag nga mga Israelnon, “paano bala nian nga mabuhi kami?” (Ezequiel 33:10). Bilang sabat, gintudloan sila sang Ginuo sang importante nga mga kamatuoran parte sa paghinulsol kag kapatawaran. Ining mga pamangkot mahimo nga makabulig sa imo nga binagbinagon inang mga kamatuoran:

• Ano sa banta mo ang buot silingon sang “magsalig [ka] sa [imo] pagkamatarong”? (tan-awa sa Ezequiel 33:12–13).

• Ano ang imo ihambal sa tawo nga pamatyag niya ang matarong kag malain nga tawo nga ginalaragway sa Ezequiel 33:12–19 wala ginatrato sing patas? (tan-awa man sa Mateo 21:28–31; Lucas 18:9–14).

• Ano nga mga dinalan ang imo makita sa sining mga bersikulo nga makabulig sa imo nga maintiendihan kon ano ang buot silingon sang maghinulsol? Ano ang dugang nga mga ihibalo nga imo makita sa Ezequiel 36:26–27 kag Alma 7:14–16?

Ezequiel 34

Ang Manluluwas nagaimbitar sa akon nga pahalbon ang Iya carnero.

Sa Ezequiel 34, gintumod sang Ginuo ang mga lider sang Iya katawhan bilang “mga manugpahalab.” Samtang nagabasa ka, pamensara kon ano ang ginapanugyan sa imo sining hayo parte sa kahulugan sang mangin lider. Sin-o ang “carnero” nga gusto sang Ginuo nga imo pahalbon? Paano mo sundon ang ehemplo nga ginpakita sang Manluluwas bilang aton manugpahalab? (tan-awa sa mga bersikulo 11–31).

Tan-awa man sa Juan 21:15–17.

Nakita ni Ezequiel sa panan-awon ang suba nga nagailig halin sa templo kag gin-ayo ang Dagat nga Patay.

Ezequiel 37

Ginatipon sang Ginuo ang Iya katawhan kag ginahatagan sila sang bag-ong kabuhi.

Ang pagtipon sang Israel ginapakita sa Ezequiel 37 sa duha ka simbolo. Samtang imo ginabasa ang parte sa una—mga tul-an nga ginabuhi liwat (tan-awa sa mga bersikulo 1–14)—binagbinaga kon ano ang imo matun-an parte sa pagtipon sang Israel sa magtimbang nga bahin sang belo (tan-awa man sa Ezequiel 36:24–30).

Ang ikaduha nga simbolo (tan-awa sa mga bersikulo 15–28) may kaangtanan sa duha ka lipak, nga ginahangop sang madamo nga mga iskolar bilang kahoy nga sululatan nga ginaangot sang bisagra. Ang lipak ni Juda mahimo nga nagarepresentar sang Biblia (tungod kadam-an sa Biblia ginsulat sang mga himata ni Juda), kag ang lipak ni Jose mahimo nga nagarepresentar sang Libro ni Mormon (tungod ang pamilya ni Lehi mga himata ni Jose sang Egipto). Nga ginapamensar ina, ano ang ginatudlo sining mga bersikulo sa imo parte sa papel sang balaan nga mga kasulatan sa pagtipon sang Israel? Ano ang ginadugang sang 2 Nefi 3:11–13 (isa ka propesiya parte kay Joseph Smith kag Libro ni Mormon) sa imo pag-intiendi?

Tan-awa man sa 2 Nefi 29:14.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Ezequiel 33:1–5.Para ilarawan ining mga bersikulo, pwede nga magpakuno-kuno ang isa ka miyembro sang pamilya nga “manugbantay” nga nagatulok sa gwa sang bintana kag ginahambalan ang bilog nga pamilya kon ano ang nagakatabo sa gwa. Sa ano ang buhi nga propeta daw pareho sang manugbantay naton?

Ezequiel 33:15–16.Ano ang ginatudlo sining mga bersikulo sa aton parte sa kapatawaran nga aton mabaton paagi kay Jesucristo?

Ezequiel 36:26–27.Ipakita sa inyo pamilya ang pila ka mga bato samtang inyo ginahambalan kon ano ang buot silingon sang mag-angkon sang “batubatuhon nga tagipusuon.” Tugoti sila nga magsambit sang mga tinaga nga nagalaragway sang “bag-ong tagipusuon” kag “espiritu nga bag-o” nga ginahatag sang Manluluwas sa aton (tan-awa sa Mosias 3:19; 5:2).

Ezequiel 37:15–28.Pwede magpangita ang mga miyembro sang pamilya sang duha ka lipak kag sulatan ang isa Para kay Juda (Biblia) kag ang isa Para kay Jose (Libro ni Mormon) (tan-awa sa mga bersikulo 16–19). Dayon pwede sila magpaambit sang mga sugilanon ukon balaan nga mga kasulatan halin sa Biblia kag sa Libro ni Mormon nga nagabulig sa ila nga makabatyag nga mas malapit sa Manluluwas kag mangin “[Iya] katawhan” (bersikulo 23).

Ezequiel 47:1–12.Ining mga bersikulo nagalaragway sang panan-awon ni Ezequiel sang tubig nga nagailig halin sa templo kag nagaayo sang Dagat nga Patay—dagat nga tama ka parat nga ang isda kag mga tanom indi mabuhi diri. Mahimo nga masadyahan ang mga kabataan sa pagdrowing sang litrato sining panan-awon. Ano ayhan ang ginasimbolo sang tubig nga nagailig halin sa templo? Paano kita ginaayo sang templo? (tan-awa sa Ezequiel 47:8–9, 11).

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

 

Pagpauswag sang Aton Pagpanudlo

Indi pag-ubosa ang tanan nga topiko. Mahimo nga indi ninyo matun-an ang tanan nga kamatuoran sa Ezequiel upod sa imo pamilya. Magpangayo sang espirituhanon nga giya para mahibal-an kon ano ang tutokan. (Tan-awa sa Teaching in the Savior’s Way, 7.)

“Yari karon, ang mga tubig nga nagailig gikan sa idalom sang atangan sang templo.… Gani mabuhi ang tagsa ka butang nga malambutan sang suba” (Ezequiel 47:1, 9). Imahe gingamit nga lisensyado sa shutterstock.com.