“Oktubre 3–9. Isaias 58–66: ‘Ang Isa ka Manunubos Magaabot sa Sion,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)

“Oktubre 3–9. Isaias 58–66,” Dali, Magsunod sa Akon—Para sa Mga Indibidwal kag Mga Pamilya: 2022

Litrato

Si Jesus nga nagatudlo sa sinagoga

Jesus in the Synagogue at Nazareth [Si Jesus sa Sinagoga sa Nazaret], ni Greg K. Olsen

Oktubre 3–9

Isaias 58–66

“Ang Isa ka Manunubos Magaabot sa Sion”

Samtang imo ginatun-an ang Isaias 58–66, pamensara kon paano ang mga pulong ni Isaias magadala sa imo sang kalipay kag paglaum sa palaabuton.

Isulat Ang Imo Mga Panghunahuna

Sang damlag pa sa Iya dutan-on nga pag-alagad, nagbisita si Jesucristo sa isa ka sinagoga sa Nazaret, ang baryo kon diin Sia nagdako. Didto nagtindog Sia para basahon ang balaan nga mga kasulatan, ginbuksan ang libro ni Isaias, kag ginbasa ang karon ginakilala naton nga Isaias 61:1–2. Dayon Iya ginpahibalo, “Karon natuman ining kasulatan sa inyo mga idulungog.” Isa ini sa pinakaprangka nga mga deklarasyon sang Manluluwas nga Sia amo ang Isa nga Pinili, nga “[magaayo sang nasakit ang balatyagon]” kag “[magbantala] sing pagbuhi sa mga bihag” (tan-awa sa Lucas 4:16–21). Ining kasulatan matuod gid nga natuman sina nga adlaw. Kag, pareho sa madamo nga mga propesiya ni Isaias, padayon ini nga nagakatuman sa aton panahon. Ang Manluluwas padayon nga nagapaayo sang tanan nga nasakit ang balatyagon nga nagapalapit sa Iya. May madamo pa nga mga bihag nga kinahanglan ibantala ang pagbuhi. Kag may mahimayaon nga palaabuton nga dapat handaan—ang tion nga sa diin ang Ginuo “[magatuga] sang bag-ong mga langit kag bag-ong duta” (Isaias 65:17) kag “magapatubo sang pagkamatarong kag pagdayaw sa atubangan sang tanan nga pungsod” (Isaias 61:11). Ang pagbasa sang Isaias nagabukas sang aton mga mata sa kon ano ang nahimo na sang Ginuo, kon ano ang Iya ginahimo, kag kon ano ang Iya pa himuon para sa Iya katawhan.

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Isaias 58:3–12

Ang pagpuasa nagadala sang mga bugay.

Ang ining mga bersikulo nagapahangop nga sa madamo nga dumaan nga Israelnon, ang puasa daw mas kabudlayan sangsa bugay. Madamo sa aton ang makaintiendi sinang balatyagon kon kaisa. Kon gusto mo nga makakita pa sang dugang nga kahulugan kag katuyuan sa imo pagpuasa, basaha ang Isaias 58:3–12 para makita ang mga sabat sang Ginuo sa pamangkot kon “Ngaa nagapuasa kita?” Sa imo eksperiyensya, paano ang pagpuasa “[nagahubad] sang mga gapos sang pagkamalaut” kag “[nagapalos] sang mga higot sang gota”? (Isaias 58:6). Paano gindala sang imo pagpuasa ang mga bugay nga ginlaragway sa Isaias 58:8–12? Paano nakaapekto sa imo panghunahuna ang Isaias 58:3–12 parte sa puasa?

Isaias 59:9–21; 61:1–3; 63:1–9

Si Jesucristo ang akon Manluluwas kag Manunubos.

Sa Isaias 58–66 makita mo ang madamo nga mga pagtumod sa nagabayad-sala nga misyon ni Jesucristo. Ari ang pila sa mga halimbawa, upod sa pila ka mga pamangkot agud buligan ka nga binagbinagon ang mga ini.

Isaias 59:9–21. Paano mo palip-uton ang espirituhanon nga kondisyon sang katawhan nga ginalaragway sa mga bersikulo 9–15? Ano ang nanamian mo parte sa paglaragway sang “manugpatunga” sa mga bersikulo 16–21 kag sa kasugtanan nga Iya ginahimo upod sa mga nagaliso sa Iya?
Isaias 61:1–3. Paano ka ginbugayan ni Jesucristo sa mga paagi nga ginlaragway sa sining mga bersikulo? Ano nga “maayo nga mga balita” ang Iya gindala sa imo? Paano ka Niya ginhatagan sang purung-purong sa baylo sang mga abo?
Isaias 63:7–9. Ano nga “malig-on nga paghigugma sang Ginuo” ang sarang mo sambiton? Ano nga mga balatyagon para sa Manluluwas ang ginainspirar sining mga bersikulo sa imo tagipusuon?

Ano ang iban pa nga mga pagtumod sa Manluluwas ang imo makita sa Isaias 58–66?

Tan-awa man sa Mosias 3:7; Doktrina kag mga Kasugtanan 133:46–53.

Isaias 60; 62

“Ang Ginuo mangindayon nga kapawa sa imo.”

Ang Isaias 60 kag 62 nagahambal parte sa kasanag kag kadulom, mga mata kag panan-awan, para magtudlo kon paano ang ebanghelyo ni Jesucristo magabugay sa kalibutan sa ulihing mga adlaw. Pangitaa ining mga konsepto labi na gid sa Isaias 60:1–5, 19–20; 62:1–2. Samtang imo ginabasa ining mga bersikulo, binagbinaga kon paano ginatipon sang Dios ang Iya mga anak pa-gwa sa kadulom padulong sa Iya kasanag. Ano ang imo papel sa sining buluhaton?

Tan-awa man sa 1 Nefi 22:3–12; 3 Nefi 18:24; Doktrina kag mga Kasugtanan 14:9.

Isaias 64:1–5; 65:17–25; 66

Si Cristo magahari sa kalibutan sa Milenya.

Si Isaias naghambal parte sa adlaw nga “ang una nga mga kalisdanan ginakalipatan” (Isaias 65:16). Bisan nga ining propesiya may pila na ka katumanan, sa bug-os sini nga kahulugan, ang inang adlaw magaabot pa lang—kon diin si Jesucristo magabalik sa kalibutan kag magtukod sang panahon sang kalinong kag pagkamatarong nga ginatawag Milenya. Ginlaragway ni Isaias ining palaabuton nga adlaw sa Isaias 64:1–5; 65:17–25; 66. Pat-ini kon kapila niya gingamit ang mga tinaga nga pareho sang “magkasadya” kag “pagkasadya.” Binagbinaga kon ngaa ang pagbalik sang Manluluwas mangin adlaw sang pagkasadya sa imo. Ano ang sarang mo himuon agud maghanda para sa Iya pagkari?

Tan-awa man sa Mga Artikulo sang Pagtuo 1:10.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Isaias 58:3–11.Mahimo nga mas maintiendihan sang mga miyembro sang pamilya ang mensahe ni Isaias parte sa puasa kon drama-dramahon nila ang klase sang puasa nga ginlaragway sa Isaias 58:3–5 kag ang klase sang puasa nga ginlaragway sa Isaias 58:6–8. Paano naton himuon ang aton mga puasa nga mas pareho sa “puasa nga ginpili sang [Dios]”? Ano nga mga bugay ang aton nakita bangud sa pagpuasa?

Isaias 58:13–14.Ano ang kinalain sang “paghimo sang [aton] nahamut-an” kag “magakalipay … sa Ginuo” sa Adlaw nga Inugpahuway? Paano naton himuon ang Adlaw nga Inugpahuway nga “kalipay”?

Isaias 60:1–5.Samtang inyo ginabasa ang Isaias 60:1–3, pwede nga pasigahon sang mga miyembro sang pamilya ang suga kon malawag ang kasanag kag patyon ini kon mamitlang sang mga bersikulo ang kadulom. Sa ano nangin pareho ang ebanghelyo ni Jesucristo sa kasanag para sa aton? Ano ang nakita ni Isaias nga matabo samtang ginapaambit sang katawhan sang Dios ang kasanag sang ebanghelyo? (tan-awa sa Isaias 60:3–5).

Isaias 61:1–3.Paano gintuman sang Manluluwas ang mga propesiya ni Isaias sa sining mga bersikulo? Pwede mo hagaron ang mga miyembro sang pamilya nga pangitaon ang mga litrato sang Maluluwas nga pamatyag nila nagapakita sining mga aspeto sa Iya misyon (ang mga litrato pwede makita sa mga magasin sang Simbahan ukon sa Libro sang mga Larawan nga Pang-Ebanghelyo). Pwede man kamo magkanta sang kanta parte sa kon paano kita ginabugayan sang Manluluwas.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Ihanda ang imo palibot. Ang aton palibot makaapekto sa aton ikasarang nga magtuon. Magpangita sang lugar sa pagtuon sang balaan nga mga kasulatan kon sa diin mabatyagan mo ang impluwensya sang Espiritu. (Tan-awa sa Teaching in the Savior’s Way, 15.)