Si Cristo nga nagasuksok sang korona sang mga tunok kag ginayaguta sang soldado

The Mocking of Christ [Ang Pagyaguta kay Cristo], ni Carl Heinrich Bloch

Septyembre 26–Oktubre 2

Isaias 50–57

“Ginpas-an Niya ang Aton mga Kalisud, kag Gindala ang Aton mga Kasubo”

Binagbinaga ang mga panghunahuna halin sa Isaias 50–57 nga nagabulig sa imo nga mas magpalapit sa Manluluwas. Isulat ang mga panghunahuna nga imo mabaton.

Isulat Ang Imo Mga Panghunahuna

Sa bilog niya nga pag-alagad, nagahambal si Isaias parte sa isa ka gamhanan nga manluluwas (tan-awa, halimbawa sa, Isaias 9:3–7). Ining mga propesiya mas nangin malahalon kuntani sa mga Israelnon madamo nga siglo ang nagligad samtang nabihag pa sila sa Babilonia. Ang tawo nga makatumba sang mga pader sang Babilonia mangin tama kuntani kagamhanan. Pero indi ina ang klase sang Mesias nga ginlaragway ni Isaias sa mga kapitulo 52–53: “Gintamay sia kag ginsikway sang mga tawo; lalaki sa mga kasubo, kag nakakilala sang kalisud: kag subong sang isa nga gikan sa iya ang mga tawo nagatago sang ila nawong.… Ginkabig naton sia nga ginpilas, ginbunal sang Dios, kag ginsakit” (Isaias 53:3–4). Paagi sa pagpadala sang subong kawala ginapaabot nga manluluwas, gintudloan kita sang Dios parte sa matuod-tuod nga pagluwas. Para luwason kita sa pagpamigos kag pagpanakit, ginpadala sang Dios ang Isa nga Mismo “ginpigos, kag … ginsakit.” Kon diin nagapaabot ang iban sang leon, nagpadala Sia sang cordero (tan-awa sa Isaias 53:7). Matuod gid, ang mga dalanon sang Dios indi naton dalanon (tan-awa sa Isaias 55:8–9). Ginahilway kita ni Jesucristo indi lang paagi sa pagbukas sang bilanggoan kundi paagi sa pagbulos sa aton didto. Ginapapahuway Niya kita sa mga gapos naton sang kalisud kag kasubo paagi sa pagdala sang mga ini sa Iya Kaugalingon (tan-awa sa Isaias 53:4–5, 12). Wala Niya kita ginaluwas nga nagatulok halin sa malayo. Nagaantos Sia upod sa aton, sa isa ka buhat sang “dayon nga paghigugma” nga “indi magataliwan sa imo” (Isaias 54:8, 10).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Isaias 50–52

Masanag ang palaabuton para sa katawhan sang Ginuo.

Bisan pa nga nagpuyo ang mga Israelnon sang madamo nga tinuig sa pagkabihag—kag bisan pa nga ang ina nga pagkabihag resulta sang ila indi maayo nga mga pagpili—gusto sang Ginuo nga magtulok sila sa palaabuton nga may paglaum. Ano nga mga mensahe sang paglaum ang imo makita sa Isaias 50–52? Ano ang ginatudlo sang Ginuo sa aton parte sa Iya Kaugalingon sa sining mga kapitulo, kag ngaa nagahatag ini sa imo sing paglaum? (tan-awa halimbawa, sa Isaias 50:2, 5–9; 51:3–8, 15–16; 52:3, 9–10).

Pwede mo man listahon ang tanan nga ara sa mga kapitulo 51–52 nga ginahagad sang Ginuo ang mga Israelnon sa paghimo para mangin realidad ining puno-paglaum nga palaabuton. Ano sa banta mo ang ginaagda sang Ginuo nga imo himuon paagi sa sining mga pulong? Halimbawa, ano sa banta mo ang buot silingon sang “magmata” kag “magsuklob sing kusog”? (Isaias 51:9; tan-awa man sa Isaias 52:1; Doktrina kag mga Kasugtanan 113:7–10). Ngaa sa banta mo nga ang imbitasyon nga “dungga” (ukon “magpamati nga may tuyo sa pagtuman”) pirme gid ginasulit? (Russell M. Nelson, “Pamatii Sia,” Liahona, Mayo 2020, 89).

Tan-awa man sa Mosias 12:20–24; 15:13–18; 3 Nefi 20:29–46.

iskultura ni Cristo nga nagapas-an sang krus

Because of Love [Tungod sa Gugma], ni iskultor Angela Johnson

Isaias 53

Gindala ni Jesucristo sa Iya Kaugalingon ang akon mga sala kag mga kasubo.

Diutay lang nga mga kapitulo sa balaan nga kasulatan ang nagalaragway sang nagatubos nga misyon ni Jesucristo nga mas matahum pa sangsa Isaias 53. Hatagi sang tiyempo nga binagbinagon ining mga pulong. Sa tagsa ka bersikulo, magpundo para binagbinagon kon ano ang gin-antos sang Manluluwas—ang mga “kalisud,” “mga kasubo,” kag “mga kalautan” gindala Niya—para sa tanan nga katawhan kag labi na gid para sa imo. Pwede mo islan ang mga tinaga pareho sang “kita” kag “aton” sang “ako” kag “akon” samtang nagabasa ka. Ano nga mga balatyagon ukon panghunahuna ang ginainspirar sining mga bersikulo sa imo? Pamensara nga isulat ang mga ini.

Basi gusto mo nga rebyuhon ang Mosias 14; 15:1–13 para makita kon paano gingamit sang propeta nga si Abinadi ang mga pulong ni Isaias para magtudlo parte sa Manluluwas.

Isaias 54; 57:15–19

Luyag ni Jesucristo nga magbalik ako sa Iya.

Tanan kita may mga tinion nga pamatyag naton malayo kita sa Ginuo tungod sang aton mga sala ukon kahuyang. May iban gani nga nadulaan na sang paglaum nga patawaron pa Niya sila. Ang Isaias 54 kag 57 mga manami basahon nga mga kapitulo parte sa pasalig kag pagpaisog sa amo sini nga mga tinion. Labi na gid sa Isaias 54:4–10; 57:15–19, ano ang imo matun-an parte sa kaluoy sang Manluluwas kag sa Iya mga balatyagon parte sa imo? Ano ang ginatuga nga kinalain sa imo kabuhi sang paghibalo sining mga butang parte sa Iya?

Paano magamit ang mga bugay nga ginlaragway sa Isaias 54:11–17 sa imo?

Isaias 55–56

Ang Ginuo nagaagda sang tanan nga “magkapyot sa akon kasugtanan.”

Sa mga henerasyon, ginkilala ang Israel nga katawhan sang Dios sa kasugtanan. Ugaling, ang plano sang Dios pirme nagalakip sang masobra pa sangsa isa lang ka nasyon, kay “ang tagsatagsa nga ginauhaw” ginaagda nga “[magkari] … sa mga tubig” (Isaias 55:1). Tandai ini samtang imo ginabasa ang Isaias 55 kag 56, kag binagbinaga kon ano ang buot silingon sang mangin katawhan sang Dios. Ano ang mensahe sang Dios sa mga nagabatyag nga “[lubos] nga napain” sa Iya? (Isaias 56:3). Hunahunaa nga markahan ang mga bersikulo nga nagalaragway sang mga pamatasan kag mga aksyon sadtong mga “[nagakapyot] sing malig-on sa akon katipan” (tan-awa sa Isaias 56:4–7).

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Isaias 51–52.Samtang inyo ginahambalan ang mga imbitasyon sang Ginuo sa sining mga bersikulo, pwede mo hagaron ang mga miyembro sang pamilya nga drama-dramahon ini. Halimbawa, daw ano lantawon ang “itangla ang inyo mga mata sa kalangitan,” “magmata, magtindog,” ukon “[magpanaktak] ka sang yab-ok”? (Isaias 51:6,17; 52:2). Ano ang ginatudlo sa aton sining mga dinalan parte sa pagsunod kay Jesucristo?

Isaias 52:9.Pagkatapos nga basahon ining bersikulo, mahimo nga magkanta sing ululupod ang inyo pamilya sang himno ukon kalantahon sang kabataan nga nagapasadya sa ila. Ano nga mga promisa sa Isaias 52 ang kabangdanan nga “magkalipay [kita] sing tingob”?

Isaias 52:11; 55:7.Ining mga bersikulo pwede magsugod sang diskusyon parte sa posible kahulugan sang dinalan nga “Paninloi ang inyo kaugalingon”. Bilang bahin sining diskusyon, pwede ninyo rebyuhon ang mga topiko sa Para sa Kusog sang mga Lamharon (booklet, 2011) ukon basahon ang balaan nga mga kasulatan parte sa mga bugay sang pagkatinlo sa espirituhanon (tan-awa sa 3 Nefi 12:8; Doktrina kag mga Kasugtanan 121:45–46).

Isaias 53.Para sugdan ang paglaragway ni Isaias sa Manluluwas, pwede nga istoryahan sang inyo pamilya kon paano ginalaragway ang mga baganihan nga nagaluwas sang mga tawo sa mga sugilanon, mga sine, kag iban pa nga media. Pwede mo ikumparar inang mga paglaragway sa mga paglaragway sa Manluluwas nga inyo mabasa sa Isaias 53. Pwede ninyo hambalan kon paano ang mga propesiya sa Isaias 53 natuman. Ano ang pila sa mga kalisud kag mga kasubo nga ginadala sang Manluluwas para sa aton?

Isaias 55:8–9.Ano ang kinalain sang mga butang sa panulukan kon ara ka sa mataas nga lugar? Ano ang kahulugan sa imo sang ang mga dalanon kag hunahuna sang Dios mas mataas sangsa aton?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “I Stand All Amazed [Ako Nahalawhaw Gid],” Mga Himno kag mga Ambahanon sang Kabataan, no. 22.

Pagpauswag sang Personal nga Pagtuon

Maggamit sang musika. Ang mga himno nagatudlo sang mga prinsipyo sang ebanghelyo sing mabaskog. Pamensara ang pagpamati ukon pagbasa sang pang-sakramento nga mga himno para buligan ka mga maintiendihan ang mga kamatuoran parte sa Pagbayad-Sala ni Jesucristo nga gintudlo sa Isaias 53. (Tan-awa sa Teaching in the Savior’s Way, 22.)

larawan ni Cristo

His Light [Ang Iya Kasanag], ni Michael T. Malm