Healing the Blind Man [Nagaayo sang Bulag nga Tawo], ni Carl Heinrich Bloch

Septyembre 19–25

Isaias 40–49

“[Paumpawi] Ninyo ang Akon Katawhan”

Si Isaias masami nagagamit sang lenggwahe nga may simbolo. Bantayi ang mga panghunahuna kag mga balatyagon nga ginadala sining mga simbolo sa imo kaisipan kag tagipusuon. Mahimo nga makabulig ini sa imo nga mas maintiendihan ang iya gintudlo.

Isulat Ang Imo Mga Panghunahuna

“[Paumpawi]” ang una nga tinaga sa Isaias kapitulo 40. Tanda ini sang panugod sang lain nga tono, lain nga pagpatalupangod sa mensahe sang propeta. Ang nauna nga mga sinulatan ni Isaias nagpaandam sa Israel kag Juda parte sa kalaglagan kag pagkabihag nga magaabot tungod sang ila mga sala, ang ulihi nga mga propesiya nagatuyo nga paumpawan ang mga Judio sa palaabuton nga 150 ka tuig—pagkatapos nga naguba ang Jerusalem, ginhalitan ang templo, kag ginbihag sang Babilonia. Pero ining mga propesiya naglab-ot sing malayo pa gid sa palaabuton luwas sa napiyerde, ginaluyahan nga mga Israelnon. Nagahambal ini sa aton, nga kon kaisa nagabatyag sang pagkapiyerde, pagluya, kag bisan pagtalang-talang.

Ang mensahe ni Isaias sa ila kag sa aton simple lang: “Dili ka magkahadlok” (Isaias 43:1). Wala madula ang tanan. Wala ka malimti sang Ginuo, kag Sia may gahum sa mga sitwasyon nga daw indi mo kontrolado. Indi bala ang Ginuo amo “sia nga nagtuga sang mga langit, kag … sia nga naghumlad sang duta, kag … sia nga nagahatag sang ginhawa sa katawhan sa ibabaw sini”? (Isaias 42:5). Indi bala Sia mas gamhanan sangsa Babilonia, sangsa sala, sangsa bisan ano nga nagabihag sa imo? “Balik sa akon,” ayo Niya, “kay gintubos ko ikaw” (Isaias 44:22). Sarang Sia mag-ayo, mag-uli, magpabakod, magpatawad, kag magpaumpaw—kon ano man ang imo kinahanglanon, sa imo kaso, para matubos.

Para mahibal-an kon paano ginpaangid ni Nefi kag Jacob ang Isaias 48–49 sa ila katawhan, tan-awa sa 1 Nefi 22 kag 2 Nefi 6.

Mga Ideya para sa Personal nga Pagtuon sang Balaan nga mga Kasulatan

Isaias 40–49

Si Jesucristo sarang magpaumpaw sa akon kag maghatag sa akon sing paglaum.

Siguro makaluluya, ukon masubo kaayo, para sa mga Israelnon nga masalapuan nila ang ila mga kaugalingon nga bihag sang Babilonia. Siguro madamo ang nagapamangkot kon bala nadulaan na sila sang lugar bilang mga pinili, katawhan sang Dios sa kasugtanan. Samtang imo ginabasa ang Isaias 40–49, pangitaa ang mga dinalan nga mahimo nakahatag sang kaumpawan kag paglaum. Sa tagsa ka dinalan nga imo makita, binagbinaga kag isulat kon ano ayhan ang ginahambal sang Ginuo sa imo sa sining mga bersikulo. Ari ang pila ka mga bersikulo nga pwede mo sugdan:

• 40:11, 29–31:

• 41:10–13, 17–18:

• 42:6–7:

• 43:1–7, 25:

• 44:1–4, 21–24:

• 46:3–4:

• 49:7–16:

Paano mo ipaambit ining mga mensahe sa tawo nga nagakinahanglan sang pagpaisog ukon paglaum? (tan-awa sa Isaias 40:1–2).

   

Sa pagtuman sa Ginuo, makaangkon kita sang “paghidaet … [subong] sang suba” (Isaias 48:18).

Isaias 40:3–8, 15–23; 42:15–16; 47:7–11

Ang gahum sang Dios mas dako sangsa kalibutanon nga gahum.

Sulit-sulit nga ginpahanumdom ni Isaias sa iya katawhan ang wala tupong nga gahum sang Dios, bisan pa gani sa pagkumparar sini sa mapiguson nga kalibutanon nga gahum nga nagalibot sa ila. Pangitaa ining mensahe samtang imo ginabasa ang Isaias 40:3–8, 15–23; 42:15–16; kag 47:7–11 (tandai nga ang kapitulo 47 ginapatungod sa nagbihag sa Israel, ang Babilonia). Ano ang ginatudlo sining mga dinalan sa imo parte sa kalibutanon nga mga butang? Ano ang ginatudlo sini sa imo parte sa Dios? Binagbinaga kon ngaa ayhan nangin malahalon ining dinalan sa mga Judio nga bihag. Ngaa malahalon ini para sa imo?

Tan-awa man sa “Abide with Me!” Hymns, no. 166.

Isaias 41:8–13; 42:1–7; 43:9–12; 44:21–28; 45:1–4; 48:10; 49:1–9

“Ikaw akon alagad.”

Sa bilog nga Isaias 40–49 nagahambal ang Ginuo parte sa Iya “alagad” kag sa Iya “mga saksi.” Sa pila ka mga dinalan ining mga tinaga daw nagatumod kay Jesucristo (tan-awa sa Isaias 42:1–7), ang iban nagatumod sa balay sang Israel (tan-awa sa Isaias 45:4), kag ang iban pa gid nagatumod kay Haring Ciro, nga nagtugot sa mga Judio nga magbalik sa Jerusalem kag tukuron liwat ang templo (tan-awa sa 44:26–45:4). Ugaling sa tagsa ka kaso, pwede mo man pamensaron kon paano magamit sa imo ang mga dinalan bilang alagad kag saksi sang Ginuo. Halimbawa, binagbinaga ang mga pamangkot pareho sini:

Isaias 41:8–13; 42:6; 44:21. Ano ang gintawag sang Ginuo nga ipahimo sa imo? Pamensara ang pormal nga mga calling sa Simbahan lakip na ang iban nga mga responsibilidad sa kasugtanan nga mag-alagad sa Iya. Paano ka Niya ginasuportahan kag “ginauyatan ang [imo] kamot” (Isaias 42:6) samtang nagaalagad ka? Paano ka Niya “ginporma” para mangin Iya alagad? (tan-awa man sa Isaias 48:10).

Isaias 43:9–12. Sa ano nga paagi ka isa ka saksi ni Jesucristo? Ano nga mga eksperiyensya sa imo kabuhi ang nagpakita sa imo nga Sia amo ang Manluluwas?

Isaias 49:1–9. Ano nga mga mensahe ang imo makita sa sining mga bersikulo nga makabulig kon ang imo mga pagpaninguha kag serbisyo daw “wala sing pulos, kag sa kadayawan”? (bersikulo 4).

Tan-awa man sa Mosias 18:9.  

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Isaias 40:3–4.Para tun-an kon ano ayhan ang buot silingon sang “amana … ang dalan sang Ginuo,” pwede nga tadlungon sang inyo pamilya ang bagay nga tiko, hawanan ang nagalinapta nga salog, ukon hawanan ang alagyan sa batuhon nga duta. Pwede mo man ipakita ang mga litrato ni Juan Bautista kag Joseph Smith (tan-awa sa Libro sang mga Larawan nga Pang-ebanghelyo, no. 35, 87). Paano nila ginhanda ang dalanon para sa pagkari sang Ginuo? (tan-awa sa Lucas 3:2–18; Doktrina kag mga Kasugtanan 135:3). Paano kita makabulig nga ihanda ang dalanon para sa Iya? (halimbawa, tan-awa sa Doktrina kag mga Kasugtanan 33:10).

Isaias 40:28; 43:14–15; 44:6.Ano nga mga ngalan ukon titulo ni Jesucristo ang aton makita sa sining mga bersikulo? Ano ang ginatudlo sa aton sang tagsa ka ngalan parte sa Iya?

Isaias 41:10; 43:2–5; 46:4.Ining mga bersikulo makita sa himno “How Firm a Foundation [Kamong mga Santos]” (Mga Himno kag mga Ambahanon sang Kabataan, no. 6). Basi masadyahan ang inyo pamilya sa pagkanta sang himno sing ululupod kag sa pagpangita sang mga dinalan diri nga pareho sa mga dinalan sa sining mga bersikulo. Ano ang ginatudlo sa aton sining mga dinalan parte kay Jesucristo?

Isaias 44:3–4; 45:8.Pagkatapos basahon ining mga bersikulo, pwede nga bunyagan sang inyo pamilya ang isa ka tanom samtang ginaistoryahan ang mga bugay nga ginbubo sang Ginuo sa ila. Ano ang matabo sa tanom kon bunyagan naton ini? Ano ang ginapaabot sang Ginuo sa aton samtang ginabugayan Niya kita?

Isaias 48:17–18.Hunahunaa ang pagpakita sang mga litrato ukon video sang mga suba ukon balod sang dagat. Sa ano makumparar ang paghidaet sa suba? Sa ano makumparar ang pagkamatarong sa mga balod?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “How Firm a Foundation [Kamong mga Santos],” Mga Himno kag mga Ambahanon sang Kabataan, no. 6.

Pagpauswag sang Personal nga Pagtuon

Ipahangop ang mga tinaga. Tilawi nga pangitaon ang mga kahulugan sang mga tinaga sa balaan nga mga kasulatan nga indi mo maintiendihan—kag bisan ang mga tinaga nga sa banta mo naintiendihan mo na. Kon kaisa ang mga kahulugan makabulig sa imo nga lainon ang pagbasa sang isa ka bersikulo kag mag-angkon sang bag-o nga espirituhanon nga mga panan-awan.

“[Ginpaumpawan] sang Ginuo ang iya katawhan, kag magakaluoy sa iya mga [ginlisdan]” (Isaias 49:13). Balm of Gilead [Banyos sang Galaad], ni Ann Adele Henrie