“Septyembre 5–11. Isaias 1–12: ‘Ang Dios [Amo Ang] Akon Kaluwasan,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)
“Septyembre 5–11. Isaias 1–12,” Dali, Magsunod sa Akon—Para sa Mga Indibidwal kag Mga Pamilya: 2022
The Prophet Isaiah Foretells Christ’s Birth [Ginapropesiya ni Propetang Isaias ang Pagkabun-ag ni Cristo], ni Harry Anderson
Septyembre 5–11
Isaias 1–12
“Ang Dios [Amo Ang] Akon Kaluwasan”
Magpangayo sang espirituhanon nga giya samtang nagatuon ka. Maintiendihan naton sing pinakamaayo ang mga pulong ni Isaias kon kita “napuno sang espiritu sang panagna,” pareho sang gintudlo ni Nefi (2 Nefi 25:4).
Isulat Ang Imo Mga Panghunahuna
Bisan una mo ini nga bes nga magbasa sang libro ni Isaias, mahimo ka nga makakita sang mga dinalan nga daw pamilyar pamatian. Ina tungod, sa tanan nga mga propeta sa Daan nga Katipan, si Isaias isa sa pinakamasami sambiton sa iban pa nga mga libro sang balaan nga kasulatan, lakip na sang Manluluwas Mismo. Ang mga pulong ni Isaias nagagwa man pirme sa mga himno kag iban pa nga sagrado nga musika. Ngaa pirme ginasambit si Isaias?
Sigurado isa sa rason amo nga si Isaias may talento sa pagpahayag sang pulong sang Dios sa maathag, indi malimtan nga lenggwahe. Pero mas labaw pa ini dira. Gin-inspirar ni Isaias ang mga propeta sa sulod sang mga henerasyon tungod ang mga kamatuoran nga iya gintudlo wala lamang nagasakop sa iya kaugalingon nga panahon—sa mga Israelnon nga nagapuyo sa tunga-tunga sang 740 kag 701 BC. Ang iya papel amo nga buksan ang aton mga mata sa dako nga buluhaton sang pagtubos sang Dios, nga mas dako pa sangsa isa ka nasyon ukon panahon. Kay Isaias, natun-an ni Nefi nga sia kag ang iya katawhan, bisan pa nga naseparar sa Israel, sa gihapon kabahin sang katawhan sa kasugtanan sang Dios. Sa Isaias, nakita sang mga manunulat sang Bag-o nga Katipan ang mga propesiya parte sa Mesias nga nagakatuman sa ila mismo atubang. Kag sa Isaias, nakita ni Joseph Smith ang inspirasyon para sa buluhaton sa ulihing adlaw nga pagtipon sang Israel kag pagtukod sang Sion. Kon imo basahon ang Isaias, ano ang imo makita?
Para sa dugang nga impormasyon parte sa panahon sang nagkabuhi si Isaias, tan-awa sa 2 Mga Hari 15–20 kag 2 Mga Cronica 26–32.
Mga Ideya para sa Personal nga Pagtuon sang Balaan nga mga Kasulatan
Paano ko mas maintiendihan ang mga pinanudlo ni Isaias?
Parte sa mga sinulatan ni Isaias, ang Manluluwas nagsiling, “[Usisaa sing maukod ining mga butang; kay gamhanan ang mga pulong ni Isaias” (tan-awa sa 3 Nefi 23:1–3). Pero sa madamo, ang Isaias mabudlay intiendihon. Ari ang pila ka mga panugyan nga makabulig sa imo nga mas maintiendihan ang mga pulong ni Isaias:
-
Binagbinaga ang mga simbolo kag mga paanggid nga gingamit ni Isaias. Halimbawa, binagbinaga kon ano ang gusto ipalab-ot ni Isaias sang magsulat sia parte sa ulubasan (tan-awa sa Isaias 5:1–7), sa mga tubig sang Siloe (tan-awa sa Isaias 8:5–10), sang hayahay [ensign] (tan-awa sa Isaias 5:26), kag sang hayahay [flag] (tan-awa sa Isaias 11:10, 12).
-
Sa kada kapitulo nga imo basahon, pamangkuta ang imo kaugalingon, “Ano ang akon ginatun-an parte kay Jesucristo?” (tan-awa sa 1 Nefi 19:23).
-
Magpangita sang mga topiko nga pamatyag mo mapuslanon sa aton panahon, pareho sang kabuhi kag misyon ni Jesucristo, sang paglapta kag pagtipon sang Israel, sang ulihing mga adlaw, kag sang Milenya. Pwede ka man magtago sang mga lista sang balasahon sa Isaias nga nagatudlo parte sa sining mga topiko.
-
Tan-awa man sa 2 Nefi 25:1–8.
“Isikway ang malaut nga mga buhat.”
Padayon nga ginpaandaman ni Isaias ang Ginharian sang Juda parte sa ila espirituhanon nga kahimtangan. Pagkatapos nga basahon ang Isaias 1, 3, kag 5, paano mo ilaragway ang espirituhanon nga kondisyon sang katawhan? Ano nga mga paandam ang imo nakita nga bagay sa aton panahon sa karon?
Dugang pa sa mga paandam, pwede mo man pat-inan ang mga mensahe sang paglaum para sa makasasala nga Israel (tan-awa halimbawa, sa Isaias 1:16–20, 25–27; 3:10). Ano ang imo matun-an parte sa Manluluwas sa sining mga mensahe?
Ang Dios magahimo sang dako nga buluhaton sa ulihing mga adlaw.
Madamo sa mga sinulatan ni Isaias mga propesiya nga may partikular nga kahulugan sa aton panahon. Diin sa mga paglaragway ni Isaias sa ulihing mga adlaw sa mga kapitulo 2; 4; 11–12 ang nakainspirar gid sa imo? ( Ang Doktrina kag mga Kasugtanan 113:1–6 nagahatag sang mapuslanon nga mga pagpahangop parte sa Isaias 11.) Ano ang imo matun-an parte sa pagtipon sang Israel kag sa pagtubos sang Sion? Ano ang ginapabatyag sa imo nga imo himuon pagkatapos nga basahon ining mga kapitulo?
Tan-awa man sa Isaias 5:26; 10:20.
Ang mga propeta ginatawag sang Dios.
Sa kapitulo 6, gin-istorya ni Isaias ang pagtawag sa iya bilang propeta. Samtang imo ginabasa ining kapitulo, ano ang nanamian mo parte sa eksperiyensya ni Isaias? Paano ginaimpluwensyahan sining kapitulo ang imo panghunahuna parte sa Ginuo, sa Iya mga propeta, kag sa buluhaton nga ginapahimo sa ila?
“Kay sa aton natawo ang isa ka bata, sa aton ginhatag ang isa ka anak nga lalaki” (Isaias 9:6).
Si Isaias nagpropesiya parte kay Jesucristo.
Sang temprano pa sa pag-alagad ni Isaias, ang Ginharian sang Israel (nga ginatawag man nga Efraim) nakig-alyansa sa Siria para pangapinan ang iya kaugalingon batok sa Asiria. Gusto sang Israel kag Siria nga piliton si Acaz, ang hari sang Juda, nga mag-entra sa ila alyansa. Pero ginpropesiya ni Isaias nga mapaslawan ang alyansa kag ginlaygayan si Acaz nga magsalig sa Ginuo (tan-awa sa Isaias 7–9, labi na gid sa Isaias 7:7–9; 8:12–13).
Samtang ginalaygayan ni Isaias si Acaz, ginhambal man niya ang pila ka kilala nga mga propesiya, pareho sang mga makita sa Isaias 7:14; 8:13–14; 9:2, 6–7. Bisan indi klaro kaayo kon ano ang buot silingon sining mga propesiya sang tiyempo ni Acaz, maathag nga parte ini kay Jesucristo (tan-awa man sa Mateo 1:21–23; 4:16; 21:44; Lucas 1:31–33). Ano ang imo matun-an parte sa Manluluwas sa sining mga bersikulo?
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Isaias 1:16–18.Para buligan ang mga miyembro sang pamilya nga maintiendihan ining mga bersikulo, pwede ninyo basahon ang seksyon nga “Some of Us Feel We Can Never Be Good Enough” sa mensahe ni Sister Sharon Eubank nga “Christ: The Light That Shines in Darkness”. Ukon pwede mo ipakita kon paano kakason ang mga mantsa sa bayo. Ano ang kinalain sang mensahe sang Ginuo sa sining mga bersikulo sa gusto ni Satanas nga aton patihan?
-
Isaias 2:1–5.Pwede magpili ang mga miyembro sang pamilya sang isa sining mga bersikulo kag drowingon kon ano ang ginalaragway sini. Ano ang ginatudlo sa aton sang templo parte sa mga pamaagi sang Ginuo? Paano kita ginabugayan samtang “[nagalakat] kita sa [kasanag] sang Ginuo”? (Isaias 2:5).
-
Isaias 4:5–6.Ano ang ginapromisa sang Ginuo sa aton sa sining mga bersikulo? Ano ayhan ang kahulugan sining mga promisa? Paano Niya ginatuman ang mga ini? (Tan-awa man sa Exodo 13:21–22.)
-
Isaias 7:14; 9:1–7.Maggamit sang mga drowing ukon mga litrato halin sa mga magasin sang Simbahan, pwede kamo maghimo sang poster nga nagapakita sang pila sa mga butang nga aton matun-an parte kay Jesucristo sa sining mga bersikulo.
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Ginapanugyan nga kanta: “High on the Mountain Top [Sa Ibabaw Bukid],” Mga Himno kag mga Ambahanon sang Kabataan, no. 5.
Pagpauswag sang Personal nga Pagtuon
Magpangayo sa Ginuo sang bulig. Para maintiendihan ang balaan nga mga kasulatan, kinahanglan naton sang personal nga rebelasyon. Ang Ginuo nagpangako, “Pangayo, kag kamo hatagan; pangita, kag kamo makakita; panuktok, kag kamo pagabuksan” (Mateo 7:7).
Si Isaias nagtudlo nga ang tabernakulo mangin “dalangpan” kag “pasilungan sa unos kag gikan sa ulan” (Isaias 4:6). Templo sang Idaho Falls Idaho